Éxodo 5
5
So Moisés chaqai so Aarón retaxaira'pegue' so Faraón
1Ca co'na' ime dajo, ca' so Moisés chaqai so Aarón querepegue' so Faraón, ca 'neraco':
—Ñi qara'gaxala', ñí'maq qota'olec queso Israel llaalqaipi, 'neetasa' da la'qaatec: 'Xañirec ñaqai eec na qomyipi, quepegue' yi 'laua qaica ca qom, qaiyi ỹo'uet ca lemaqachic quiyim yimaqachin.
2Qam so Faraón 'naaco':
—¿Negue' cá'maq ra'gaxalari quiyim ña'xaỹaxana, ca' saxanec quiyim eec na Israel llaalqaipi? Se seuanapega cá'maq na'gaxala', ca' sqai saxanec quiyim eec na Israel llaalqaipi.
3Co'na'le, ca' saua'maxare 'neraco':
—Ñi qota'olec quena hebreo laseripi ỹanaxata'guita qomi'. Ca' qomi' qolaq, saxague da 'laua qaica qom. Yi'maxare ỹovite' caua tres na'xata' queeta ca qom, ca' ỹovita. Ca ma'le, ca' savigaxataq ca qarachitaxanataxanaxat, ca' saanqot ñi qara'gaxala' qota'olec, 'neeto' quiyim inaxalgoto qomi' ca ne'ne', loqo'm ỹahote'e ca lecat llaaxa.
4Qam so nashi quiyi Egipto 'naaco':
—Qami' Moisés chaqai qami' Aarón, ¿chi'negue ma' ỹaxanñi nqai'ñii na qomyipi da lo'ueenataxanaxac? ¡Mohi, quiitalec da ro'ueenataxanaxaguii!
5Chaqai qai'neeta 'naaco' so Faraón:
—Nagui mashic 'xoic na Israel llaalqaipi quenajo 'laua, ca' ¿sham ỹaxanñi nqai'ñii da lo'ueenataxanaxac?
6Ca' chaqaiso só'maq na'xa'a, ca' so Faraón ỹilen so neloxoỹaripi chaqai so lashillipi so qomyipi, 'naaco':
7—Ca' tot nodoitau'a ca 'uaqapi na Israel llaalqaipi quiyim ỹo'uet ca losoc, dá'maq 'ñiita'gue quen queso quiyim 'ỹaañite'em. ¡Ca na'maxare chi idaanaco' cá'maq 'uaqapi! 8Qam 'ñiỹapego' quiyim se naqaguiñi nqai'en ca lo'ueenatec liỹorete' ca losoc. ¡Quenagui se naqaguiñi ca 'oonoqui' losoc! Ma' na'maxare hualaiquipi, chi ỹaualqatagui, 'naac: “Qolaq, so'ueetaq aca qarachitaxanataxanqate, savigaxataq, ca' saanqot ñi qota'olec coqomi'.” 9Paguec lquesaxanaxa nqai'ñii ca lo'ueenataxanaxac yijo qomyipi. Ca' chaqaida 'neetari' nqai'ñii se nocoỹaxachishiguim, qaiyi sqai huelec ca na'maachic.
10Ca' so idaaneguelec chaqai so lashillipi so qomyipi eec, ca 'naapega so qomyipi:
—Ñi Faraón 'naac coqomi' quiyim tot qoỹaante'ema qamiri nagui na 'uaqapi. 11Ca' nagui, ca' chaqaqamii daañiỹaque chaqai lapooñii quecá'maq hua'ñi nachiỹa. Qam se naqaguiñi cá'maq liỹorete' ca ro'ueenachiguii losoc.
12Ca' so Israel llaalqaipi neuagaxajlec yá'ogue yi Egipto, imitetaque na nanecsec lovi, ỹahotaque ro'ueenataxana, 'ec nqai'en na 'uaqapi. 13Ca' na neloxoỹaq queso no'ueenataxanyipi ỹaatqajam iỹalqachit so qomyipi ỹahotaque quiyim ipaquichigui cá'maq lo'ueenatec na' ñaq qanodoota na 'uaqapi. 14Chaqai qai'neeta qaiỹalqachit qaỹouaxantalec ná'maq nashillipi quena no'ueenatec queso Israel llaalqaipi, ca' qohinapega:
—¿Chi'negue ma' scavit chaqai nagui sqo viri cá'maq ỹorete' quen cá'maq ro'ueenachiguii?
15Ca' na la'gaxala' da no'ueenatec queso Israel llaalqaipi eec quepegue' so Faraón. Ca' 'naapega, 'naaco':
—¿Chi'neco' dá'maq 'ñitetegue quená'maq najo relaataxai'pi? 16Ma' tot qanodoota nagui na 'uaqapi, qam qaiyiita qaỹahotaque quiyim ipaquichigui yí'maq qaro'ueenatec quen losoc, chaqai qaỹouaxantalgoto qomi'. Ca' se ỹa'maxañi dá'maq 'neetoxoric na relaataxai'pi.
17Qam so Faraón 'naaco' quesaua'maxare:
—¡Caqamiri qaica quet cá'maq liỹa, chaqai qamiri hualaiquipi! Vichiguiño' 'ñiỹac: “Savigaxataq aca qarachitaxanataxanqate, ca' saanqot ñi qara'gaxala'.” 18¡Mohi, quii, 'ueenataxañii! Ca 'eno'm tot qanodootau'alo qamiri nagui na 'uaqapi, qam qaiyiita viritac cá'maq chaqai'en ỹorete' ca losoc ro'ueenachiguii.
19Ca' saua la'gaxalate' da no'ueenataxanaxac quena Israel llaalqaipi ỹaatqajam 'ue da leuogoxo na' qohinapega quiyim ipaquichigui yí'maq ỹo'uet losoc quiyi na'xa'a. 20Ca co'na' nenoxonec quiyim retaqata'pegue' so Faraón, ca nachiñi'chiguita saua Moisés chaqai so Aarón rauaanaxanta'pe. 21Ca' qohinapegalo':
—Ñi qara'gaxala' ỹa'ajanta'pe qamiri chaqai quiyim ỹouaxane' qamiri queda 'ñii'tegue. Ma' rasauaxashichii quiyim ñi Faraón chaqai na lotauaripi ỹaatqajam qa'viỹa'que qomi' chaqai ỹaan na lo'goxonqateripi, qaiyi qaralauat.
Da nqouagaxainaxac so Moisés
22Ca' so Moisés 'naaco' na'le quiñi qara'gaxala' na' nqouagaxaintac:
—Qami' ỹa'gaxala', ¿chi'negue ma' 'ñitetego' dajo quena qomyipi? ¿Chi'neco' ma' yilachi'o' na'le? 23Ma' na' ime quiyim sechoxotem ñi Faraón dá'maq 'ñirac quiyim shinapega, ca ñi'maxare lama'xa da lqa'viic quena qomyipi, qam qami' sqai 'ootaxañirelec.
Currently Selected:
Éxodo 5: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.