2 Timoteo 2
2
Cá'maq ỹaatqajam no'uen nale so Jesucristo
1Qam qami' ỹaalec, coñichiguit da rquesaxanaxa'e' queda qanqouagaxa dá'maq qomi' qoỹaanema ma' ña'daqatau'a so Cristo Jesús. 2Dá'maq ỹaatqajam 'qa'ichirigui caỹim quiyim shinac, chaqai 'xoic na 'qaachigui quena liỹa qomyipi, ca' chaqaida dá'maq pataqairelec ná'maq qomyipi quiyim piichira'a ỹapaxaguin ca liỹa.
3Qam qami' na'ñaxachichiguit ná'ogue na ne'xoric, 'ñiisari' cá'maq ỹaatqajam no'uen nale so Jesucristo. 4Ma' qaica ca nouaataxanaq le'ec queetalec cá'maq chi lo'ueenataxanaxac, ma' mashic hueeta'ñot da lelaataxanaxac ca nouaataxanaq lashi. 5Ca chaqai 'nejem ca qom quiyim mashic ỹalecau'a ca comitaxac, qam no'm se ipaquichigui nqai'en dá'maq leloxoỹaxac, ca' sqaica ma' 'ue quet ca laueguec. 6Chaqai cá'maq ro'ueenataxantac queca lanaxanqa', ca' chaqaica cá'maq 'au ỹacoñiguit ca laseue' ca laỹaxac ca lanecsec. 7'Yiiñisapego' da shinapega qami', ca' so qara'gaxala' ra'deenaxanaxañitegue dá'ogue dajo.
8'Neeto' lotqai coua'isaque so Jesucristo só'maq liỹa nca'laxatec ñi qota'a só'maq chigoxougui so nashi David. Ca' dajo dá'maq na'qaatec chicqaugui da nca'laxa dá'maq ỹim sa'xatetac. 9Ca' chaqaida dá'maq 'em ña'ñaxachiguit da i'xoric, ca' chi ỹovireta'a quiyim qaycoñiretari', qohinta'gue quiyim 'ec aỹim 'xoic ca ỹasauaxaset. Qam da la'qaatec ñi qota'a se ncoñiretari'. 10Vichiguiño' ña'ñaxachiguit ná'ogue nanchaqaina, ma' sahotaque quiyim na qota'a lca'acseripi ỹovira'oga da nca'laxa chalego loyac chaqai sqaica lqodoc. Dajo nca'laxa taỹoto qomi', ma' mashic ña'daqatau'a so Cristo Jesús.
11Ca' dajo dá'maq ỹaatqajam lliqueta:
Quiyim qolqata'ñi' so Jesús, ca' qai'neeta qarca'laxaua so'maxare;
12quiyim 'ue ca qare'xoric, ca' qai'neeta salecqau'a ma'le ma' ỹoiquentac ná'ogue najo.
Qam no'm shinqac se sa'deenaq so'maxare, ca' so'maxare qai'neeta 'naac se ỹauanapegalo qomi'.
13Chaqai no'm ñapacqalec ca qara'qaatec, qam so'maxare se napacalec ca la'qaatec,
ma' ñi qota'a se nqo'in, chaqai se ỹadalaxat ca leloxoỹaxac.
Cá'maq no'ueenataxanqajnec ỹaatqajam qaỹa'maxarenta
14No'uenaxanaxañitegue dajo na qomyipi, ca ỹauanchigui qami' ñi qara'gaxala' ma' 'ñirapega quiyim ỹaxanñi quiyim nco'uaatapiguilo na na'qaatqaipi. Ma' dajo co'uaxac qaica ca 'negue. Chaqaidaata quiyim na'axat ná'maq na'xaỹaxantac. 15Ỹaatqajam nañaañitot ñi qota'a, 'ñiite'm ca no'ueenataxanqajnec ỹaatqajam ỹaqamqata. Ca' qaica ca nayiloxontaque, ta'ta'a quiyim ỹaqamaxateta ỹa'xat dá'maq na'qaatec ỹaatqajam lliqueta. 16Rovichira'alo naua netaxaỹaxaco chaqai hueralec najo, qaica ca 'netegue, ma' ná'maq ỹa'xateta'pe nauajo paguec iyinñi queda se no'uen. 17Chaqai naua lapaxaguinataxanaxaco noquiiquesauec, 'ec aca ne'neete noquiiquetauec ca lichiguec. Ca' chaqaida 'neete' saua Himeneo chaqai so Fileto. 18Ma' saua'maxare ỹoxorec, ỹite' dá'maq ỹaatqajam leloxoỹaxac, ma' 'nerac shi'gue ỹoxogue dá'maq quiyim qanca'laxatec ná'maq shi'gue leuaxaiquipi. Ca chaqaida dá'maq 'em mashic na'axat da lpi'ỹaxac na liỹa. 19Qam ñi qota'a mashic ỹa'yiñi só'maq 'eco' no'xonaxanaxala' queda lo'ueenataxanaxac, ca' qaica ca idaxan. Ca' so'maxare naneretalec so nerec, 'neetasa': “Ñi qara'gaxala' ỹa'deenta ná'maq mashic lalamaxat”; chaqai: “Ná'ogue ná'maq ỹodootac da leenaxat so Cristo ỹaatqajam ca'e ná'ogue na se no'uen.”
20Queca 'imec lodegaxat mesqaicaata ca nouenec lo'yaxanec chicqaugui na oro loqo'm ca plata hueetaugui. Qai'neeta 'ue na chicqaugui na qo'paq, loqo'm na 'laua. 'Ue na ta'chiguit 'ueetaxat, chaqai 'ue na chi nouenec. 21Ca no'm 'ue ca ỹahotaque ta'chiguit quiyim qaỹouenaxana queso qara'gaxala', ca' no'uen quiyim nco'taxat quená'ogue na se no'uen, qaiyi ishit qarouenaxana quecanchaqaica no'uen.
22'Iichirapeguem na lqo'itaxanqachic na nocchishic. Quiisalco' da lalamaxa da chaalataxac queda npi'ỹaxac, chaqai da ne'xorenataxanaxa chaqai da neuagaxa, 'neeta ná'maq ỹaatqajam co'teeta añi le'taxanata, roỹaxantacot da leenaxat so qara'gaxala' Jesús quena' nqouagaxain. 23Chaqai se na'xaỹaxañita na co'uaxaquipi, ma' qaica ca 'negue. Chaqai mashic 'yiiñite' na'maxare ma' chicqaugui da napetaxanaxac. 24Ma' cá'maq lelaatec so qara'gaxala' se ishit queetalec da lapetaxanaxac, ta'ta'a quiyim huagaxaraic quená'ogue na liỹaripi. Chaqai ỹa'den quiyim rapaxaguinataxan, chaqai 'xoic da leualaxavic, 25chaqai neneequesenta quiyim ralamqataxan quená'maq pa'guenaxantac, sha'apiguito' quiyim ñi qota'a netogochigui lauel nqai'en, ma' ỹahotaque quiyim ỹa'den dá'maq ỹaatqajam lliqueta, 26qaiyi 'ec nelouec, ca' qohit cañi loqoinaxanaxaqui so na'ỹaapec, ma' ỹahotaque quiyim coñirari', ca' ỹoiquentac quecá'maq sham 'neeta'gue.
Currently Selected:
2 Timoteo 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.