1 Corintios 7
7
Da naqataxac taỹaugui da no'naxac
1Ca' nagui sa'ue na lopilaxaset da renataxanaxaguii na' secoñiguit aca lere renataxanaxalachii. Ca' ỹim nagui shinac lo'yaxanec queca ỹale no'm mesqai 'on. 2Qam mashic ỹapaguelec da dequenaxac, ca quecá'maq ỹale 'maxaraic ỹa'ue aca lalamaxarete loua, chaqai aca 'aalo ỹo'uet ca lalamaxaret loua. 3Qam cá'maq mashic 'on no'uen quiyim ỹaatqajam ra'ijlec ca louaỹaxac, chaqai qai'neeta aca 'aalo ra'ijlec ca loua. 4Chaqai aca 'aalo mashic 'on, ca tot lalamaxat na chi loshicmaxa, ta'ta'a cá'maq loua cá'maq lalamaxaret. Ca 'nejem ca ỹale qai'neeta tot lalamaxat ca chi loshicmaxa, ta'ta'a acá'maq loua cá'maq lalamaxaret. 5Se ỹa'maxañi quiyim 'ue ca se nasen caqamiri, ta'to'o' no'm na'yiiñiỹata' quiyim vii ca raloqojñigui quiyim sqa qamiri napa' quiyim viitaque ralamaxaijlec ca nqouagaxainaxaguii. Qam ma' ime, ca lotqai qamiri napa'. Ma' no'm 'ue ca se nasen, ca sqoue ca se nalo'guit ca 'neeta, ca' so na'ỹaapec 'ue ca lligo quiyim ỹa'ue ca nasauaxaset.
6Dá'ogue dá'maq sa'xatetac caqamiri, da'maxare 'eco' chaqai ỹilnataxanaxac, da'maxare mesqai ỹaatqajam nelaataxanaxac. 7Ca' ỹim quiyim chaqaỹim, ca' sahotaque quet quiyim qamiá'ogue 'ñiita'ogue maỹim. Qam ñi qota'a ỹoreta'oguit na ỹaanem quiñi 'óna queca 'óna 'neetayi ca leloxoỹaxac chaqai ca liỹa lotqai ỹoqa'a ca leloxoỹaxac ca neme.
8Qam ná'maq saqa'laca aca loua chaqai ana pa'ỹe, shinapega 'maxaraic quiyim sqo 'on 'neetari' maỹim. 9Qam no'm tot nalo'guit ca 'neeta, ca' liyi 'on, ma' paguec la'maxa quiyim 'on, ca sqai queetapegueu'a ca le'xoric queda lpa'ỹaaxa.
10Qam quená'maq mashic shi'gue 'on, saqata quiyim aca 'aalo se ỹalat ca loua. Dajo ỹaqataxac mesqai ỹalamaxaret, da'maxare ỹaatqajam lelaataxanaxac so qara'gaxala'. 11Qam no'm aca 'aalo ỹalat ca loua, ca no'm se ishit pilliguit ca'maxare, ca' aca 'aalo se ishit quiyim liỹa 'on. Ca' qai'neeta cá'maq ỹale se ishit ỹalat aca loua.
12Ca' quena liỹaripi shinapega, qam chaqaỹim shinac, ma' dajo sqai 'naac so qara'gaxala': No'm 'ue ca qarqaỹa 'ue aca loua saqa' icoñiguit da na'qaatec, qam aca'maxare ỹa'maxarenta quiyim reloqota'guit ca'maxare, ca cá'maq ỹale se ishit ỹalat aca loua. 13Chaqai no'm 'ue aca 'aalo, loua ca ỹale saqa' icoñiguit da na'qaatec, qam no'm ỹa'maxarenta quiyim reloqota'guit aca'maxare, ca acá'maq 'aalo se ishit ỹalat ca loua. 14Ma' no'm cá'maq ỹale saqa' icoñiguit da na'qaatec, qam qaỹa'maxarenta quiñi qota'a, ma' mashic ncoñira'guit aca loua mashic icoñiguit da na'qaatec. Chaqai aca 'aalo no'm saqa' icoñiguit da na'qaatec, qam qaỹa'maxarenta quiñi qota'a, ma' mashic ncoñira'guit ca loua mashic icoñiguit da na'qaatec. Qam no'm mesqaida, ca caua qachaalaxahi 'nejme' quet ca llaalqa ca saqa' icoñiguit da na'qaatec. Qalaxam nagui chaqaida dá'maq quiyim qaỹa'maxarente' quiñi qota'a. 15Qam ca ỹale loqo'm aca 'aalo saqa' icoñiguit da na'qaatec, no'm ipacalec quiyim ỹahotaque ralataxan, hua'yi, ỹo'uet. Ca' quedajo, no'm 'neeta ca qarqaỹa ỹale loqo'm aca 'aalo, ca 'eco' nosoochiguiñi. Ma' ñi qota'a roỹaxanalo qomi', ỹahotaque quiyim qara'maqachiguiñi, sqaicanqaida. 16Ma' qami' 'aalo, ¿sqa 'yiiñi'o' quiyim chicqochigui qami' quiyim sqoue nca'laxachirec ca roua'e'? Loqo'm qami' ỹale, ¿sqa 'yiiñi'o' quiyim chicqochigui qami' quiyim sqoue nca'laxachirec aca roua'e'?
17Quecanchaqai 'neeta, qam queca 'óna quejlec da leloxoỹaxac cá'maq qoỹaanem quiñi qara'gaxala', chaqai dá'maq 'neetari' na' qaroỹaxana quiñi qota'a. Ca' dajo ỹaqataxac quená'ogue na no'ueenaxanaxaquiripi. 18No'm 'ue ca roỹaxana ñi qota'a quená'maq mashic 'ue na netanec quena loshicmaxa, ca' chaqaida 'neetari'. Chaqai no'm roỹaxana ca saqa'leca ca netanec na loshicmaxa, ca no'uen quiyim chaqaida 'neetari', se ỹa'ue ca netanec na loshicmaxa. 19Qaicanqai 'negue quiyim 'ue ca netanaxaset na noshicmaxa, loqo'm qaica, qam quedá'maq 'xoic nepagaxallic quiyim qana'xaỹaxane'talo naua lelaataxanaxaco ñi qota'a. 20Ca qom no'uen quiyim chaqaidaata dá'maq 'neetari' na' qaroỹaxana quiñi qota'a. 21No'm qami' na'ac na' qaroỹaxañiraxaua', qaica huapigui qavilli'. Qam no'm shichi' quiyim qaỹosootec qami', no'uen quiyim nquipichirec. 22Ma' cá'maq na'aco' na' qaroỹaxana quiyim huelec so qara'gaxala', ca' nagui ca ỹale qaỹosootec quiyim queetalec so'maxare. Ca chaqai 'nejem cá'maq se na'ac na' qaroỹaxana, ca nagui lotqai na'ac queso Cristo. 23Ñi qota'a ỹaatqajam chalego lecaic aca lishiuetenaxanqate na' ishiuetene' qamiri. Vichiguiño' sqai 'xañiigue quiyim 'neeta'gue qamiri la'ac ca chaqai qom. 24Ca' chaqaida, ỹaqaỹarolqa, quiyim qaidaata quiitalec dá'maq 'ñiitari' na' qaroỹaxañiỹaxaua' quiñi qota'olec.
25Qam quená'maq saqa' 'on, sqaica ca hueetaỹot ỹaatqajam lelaataxanaxac so qara'gaxala'. Qam sa'xat dá'maq hueetapigui iuel, ma' shintari' ca mashic qaipi'ỹa'a chicqochigui da le'xorenataxanaxa so qara'gaxala'. 26Aỹim dá'maq ỹa'deenataxanaxac 'neetasa': 'Maxaraic quiyim ca ỹale chaqaidaata dá'maq 'neetari', ma' 'xoic nanchaqaina quenaua na'xata' seuqatauguilo. 27No'm mashic 'ue aca roua'e', ca liyi sqa lachi', chaqai no'm saqa'laca aca roua'e', 'maxaraic quiyim liyi sqai daañiraque. 28Qam no'm o'ñi', qaica ca rasauaxashichi'. Chaqai qai'neeta aca nequetegaxai no'm 'on, qaica ca lasauaxaset. Qam ca mashic 'on, ca 'xoic ma'le nanchaqaina ỹovira'a da nachaalataxac, ca' 'eda dá'maq sahotaque quiyim se ỹovira'a.
29Qamiri ỹaqaỹarolqa, dá'maq sahotaque sa'xat 'neetasa': Ma' mashic tot qoỹoxorec naua na'xata' seuqatauguilo, ca' nagui taachi'ñi quená'maq mashic 'ue aca loua, 'neetari' quet quiyim 'ec qaca aca loua, 30chaqai quená'maq 'ue ca lasauaxanec, 'neetari' quet quiyim se rachicota, chaqai quená'maq 'ue ca lemaqachic, 'neetari' quet quiyim mese netoontac, chaqai ná'maq reshiujnaxantaque na louenqaipi, 'neetari' quiyim 'ec se lalamaxat na lishiujnaxanaxat, 31chaqai quená'maq ro'ueenataxantapega ná'maq huelec na 'laua, 'neetari' quet quiyim 'ec se ro'ueenataxana na'maxare. Ma' ná'maq re'qoochigui huelecna, tai'a quiyim qaỹaloq imeho.
32Ma' dá'maq sahotaque caqamiri quiyim ỹaatqajam nosohichiguiñi, qaica ca huapigui qavillii. Ma' no'm ca ỹale saqa'laca loua, ỹaatqajam quejlec so qara'gaxala', ma' ỹahotaque qaỹa'maxarenta. 33Qam cá'maq mashic 'on, ca imelec na no'ueenatqaipi huelecna, ma' ỹahotaque ỹa'maqachigui lauel aca loua. 34Chaqai qai'neeta aca 'aalo mashic 'ue ca loua mesqai 'nejem aca qaica ca loua. Ma' cá'maq qaica ca loua ỹaatqajam ỹalamqajlec quelec so qara'gaxala', ma' ỹahotaque nomatalta' ỹaanot ñi qota'a da no'ueenataxac. Qam acá'maq mashic 'on ỹaatqajam imelec na no'ueenatqaipi huelecna, ma' ỹahotaque ỹa'maqachigui lauel ca loua.
35Ma' dajo ỹa'qaatec chi ra'maxahi ma'le, da'maxare mesqai squepaxate' qamiri. Ta'ta'a sahotaque quiyim ỹaatqajam 'chichiguiñi 'maxaraic cá'maq 'ñiitari' quiyim quiitalec so qara'gaxala'.
36Qam no'm 'ue ca ỹa'deena'a quiyim 'maxaraic ỹo'naxan ca llaale, ma' shim napacalec ca laloqo' quiyim 'on, ca ca'maxare retan quiyim ỹouen ca loua aca'maxare, 'maxaraic quiyim ỹo'uet cá'maq ỹahotaque. Se qaỹollapeguem ca lo'naxac, ma' da'maxare se nasauaxaset. 37Qam no'm 'ue ca liỹa ỹale no'm qaica quet cá'maq 'neeta quiyim ipacalec ỹo'naxan aca llaale, chaqaidaata quiyim nanoiquentac quecá'maq shim 'ne'tegue ca la'deenataxanaxac quiyim se ỹo'naxan aca llaale, ca' ỹa'maqachiguiñi se ỹo'naxan. 38Vichiguiño' cá'maq ỹo'naxan aca llaale ỹa'maqachiguiñi da 'ne'tegue, chaqai cá'maq se ỹo'naxan aca llaale paguec la'maxa da 'ne'tegue.
39Aca 'aalo mashic 'on se ishit qaỹosogoñi da lo'naxac no'm ñaq nca'leetauec ca loua. Qam no'm ileu ca loua, ca aca'maxare ỹaatqajam no'uene'tegue quiyim o'ñiguit cá'maq nqo'ta. Qam no'm mashic icoñiguit da na'qaatec 'nejem aca'maxare. 40Qam aca'maxare paguec la'maxa queta' tot liỹa 'on. 'Eda dá'maq ỹa'deenataxanaxac, chaqai seuelec quiyim aỹim qai'neeta hueetaỹot ca Espíritu chicqo'ot ñi qota'olec.
Currently Selected:
1 Corintios 7: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.