1 Corintios 5
5
Dá'maq se ỹa'maxañi no'naxac
1Mashic shi'gue qaỹa'den quiyim 'ue ca 'óna caqamiri o'ñiguit aca la'uale late'e. Dajo no'naxac ỹaatqajam chalego la'aaxa. Ma' vire'ta ná'maq se iuanapega ñi qota'a se ishit ỹo'uet dajo. 2¡Qam qaiyiita nemaqajñitac qamiri! Qamiri chigoita quet 'ñiitari' ca 'ue ca lasauaxanec, chaqai cajo ỹale ỹo'ueetetac dajo chalego la'aaxa ỹaatqajam o'yiỹauec quet, paguec la'maxa quiyim se ỹalegouguilo qamiri. 3'Eno'm se re'qoochigui aỹim quiyim salequetauguilo qamiri, qam shiquiaxam salequetauguilo qamiri. Chaqai shi'gue ñimiteta'pegue' queda ỹa'deenataxanaxac queca 'nejemda, ca qaỹo'daauec cajo ỹale ma' ỹo'ueetetac da chalego la'aaxa nasauaxaset, 'ec quiyim salequetauguilo qamiri. 4Lapoiỹata' quet queda leenaxat so qara'gaxala' Jesucristo, chaq aỹim 'ec salequetauguilo qamiri, chaqai da lquesaxanaxa so qara'gaxala' Jesús qai'neeta hueetauguilo qamiri. 5Ime, ca' cajo ỹale qoỹaanem so na'ỹaapec, qaiyi qaỹosogui da nachaalataxac, qam qanca'laxatec ca la'al ma' novi' so qara'gaxala' Jesús.
6Qamiri se ỹa'maxañi quiyim nemaqajñii quedá'maq 'viichitac. ¿Sqa 'yiiñio' da na'qaatec ma' 'naac: “Ca cocho'qui' lalegue' na pan ishit pe'taxachigui cá'ogue ca naqaulatec 'aríña”? 7Ca vichiguiño' naqachii aca ñauapec lalequete na pan, ma' chaqaca aca na'aqte' qamiri, qaiyi 'ñiita aca dalaxai naqaulata se qaỹa'ue aca lalequete quena' qaỹa'ue na pan tai'a qaỹa'ic ma' ỹovire'oga ca napoxoqui leenaxat lapascua. Ma' qamiri 'ñiitam aca dalaxai naqaulata qaca lalequete pe'taxachigui na pan. Ma' so Cristo mashic shi'gue qaỹalauat, ileualgoto qomi', ca' chaqaiso so 'eco' qagreta llaalec qaỹa'ic ma' ỹovire'oga cajo na'xa'a lapascua. 8Vichiguiño' quiyim soqolqata'pegue' ñi qota'a, no'uen quiyim qolqata'gue da 'chichiguiñi ñicyaxac chaqai da ỹaatqajam lliqueta leloxoỹaxac da na'qaatec, dá'maq 'nejem aca naqaulata qaca aca lalequete. Se ishit quiyim qolqatalec da se ỹa'maxañi chaqai se no'uen, ma' da'maxare 'nejem aca ñauapec nalequetenaxanqate.
9Caso liỹa ilaata selatalo qamiri, shinac na'le quiyim se ỹa'maxañi quiyim lliguita'piguit na nedequenaxairipi. 10Mesqai shinac quiyim totqa lliguiỹougui ná'ogue na qomyipi quená'maq nedequenaxairipi, loqo'm quena namataxaiquipi, loqo'm ca cuataxaic, loqo'm ca nqouagaxainot ca nashiilec. Ma' no'm totqa lliguiguit na'maxare, ỹouen quiyim ỹaatqajam oquiỹa'e na 'laua. 11Dá'maq shinac na'le 'neetasa': Se ishit lliguita'piguit cá'maq 'naac rqaỹahi rpi'ỹaxauahi, qam queetalec da nedequenaxac, loqo'm ca namataxalaic, loqo'm ca nqouagaxainot ca nashiilec, loqo'm ca la'axaqa lo'o', loqo'm ca ne'taaxai, loqo'm ca cuataxaic. Chaqai ỹovira'a quiyim se rqui'ỹaxauahi ca qom mashic 'neetari' dajo. 12-13Ma' ỹim se seshit quiyim sa'aualec quiyim semit ca saqa' icoñiguit da na'qaatec, ma' ñi qota'a ñí'maq imit ma'le ca'maxare. Qam qamiri ishit quiyim 'ñiỹapega ná'maq mashic icoñiguit da na'qaatec. Ca vichiguiño' naqachii cajo sauaqhuaic neetanguilo qamiri.
Currently Selected:
1 Corintios 5: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.