1 Corintios 15
15
Mashic nca'leuec nqohin so Cristo
1Nagui qamiri ỹaqaỹa', sahotaque quiyim sqa 'laxachihe da na'qaatec chicqaugui da nca'laxa dá'maq saanema qamiri. Ma' dajo na'qaatec dá'maq coñiguit na'le, ca' ñaqaida lo'xoitañi. 2Chaqai chicqochigui dajo na'qaatec quiyim qanca'laxaterec qamiri, no'm quiijlgoto nauá'maq sa'xatema qamiri, chaqai no'm sqai 'ñiỹa'guesa' ca rpi'ỹaxaguii.
3Dá'maq 'avichiguiñi nqaishin quiyim sa'deenaxanaxañiigue dá'maq napaxaguinataxanaxac qanañaañim. Ca vichiguiño' sapaxaguiñiigue quiyim so Cristo ileualgoto naua qarasauaxasete', ipaquichigui dá'maq 'nerac yaua naneresañi la'qaatqa ñi qota'a. 4Qai'neeta sapaxaguinque qamiri quiyim so Cristo qaishinñi. Qam co'na' ỹovirerec saua tres na'xata', ca lotqai liỹa nca'leuec nqohin, ca lotqai ipaquichigui nqohin dá'maq 'nerac yaua naneresañi la'qaatqa ñi qota'a. 5Ime, ca lotqai so'maxare nachaxana so Pedro, ime, lotqai nachaxanalo saua liỹa' lelaatqa. 6Ime, ca lotqai nachaxana so paguelec quinientos nqaỹaripi. Queso qomyipi 'xoic nagui na ñaq nca'leetauec, qam mashic 'vii saua ileue'. 7Ime, ca' lotqai nachaxana so Jacobo, ime, ca lotqai nachaxana sá'ogue so lelaatqaipi.
8Ca' co'uaataxantam, na' ime sá'ogue, ca lotqai nachaxana aỹim qai'neeta, 'eno' ỹim shinta ca noctoqui' se nouoc ne'qaañi. 9Ma' ỹim qaica ca imaqachic, sqai shinta só'maq liỹa lelaatqaipi so Jesús, chaqai sqa taiguit quiyim qaỹamatahic ỹim lelaatec so'maxare, ma' socantac quen na'le ná'maq huelec ñi qota'a. 10Qam sovira'a dá'maq shintari' nagui, ma' ñi qota'olec 'uo' da lqouagaxa caỹim, ca dá'maq lqouagaxa caỹim se ishit quiyim qaica quet ca ñigui. Ma' ỹim ỹapacauec da ỹo'ueenataxanaxac quesá'ogue so liỹa nelaatqaipi, 'eno'm mesqaỹim, qam chaqaiñi ñí'maq qota'olec quedá'maq chi lqouagaxa, ca' ro'ueenataxantapigui aỹim. 11Qam 'eno'chaqai aỹim ỹapacauec da ỹo'ueenataxanaxac, loqo'm saua'maxare, qam chaqaida dá'maq qara'qaataxanaxac dá'maq qamiri viilec.
Ma' liỹa nca'leuec nqohin ná'maq mashic ileu
12Qam no'm qomi' sa'xatqatac quiyim so Cristo liỹa qanca'laxatec quiñi qota'a queso lelauaxa, qam ¿chi'neco' caqamiri quiyim 'ue na 'naac quiyim tot nca'leuec cá'maq mashic ileu? 13Ca no'm llic quiyim tot nca'leuec nqohin cá'maq mashic ileu, ca qai'neeta se ishit nca'leuec nqohin so Cristo. 14Chaqai no'm so Cristo se nca'leuec nqohin, ca dá'maq na'qaatec sa'xatqatac qaica ca 'negue, chaqai dá'maq rpi'ỹaxaguii qai'neeta. 15Ca no'm chaqaida, ca' qomi' 'ec qomi' 'maatqaqa, ma' qomi' sa'xatqatac ñi qota'a quiyim liỹa nca'leuec nqai'en so Cristo. Ca no'm sqai llic quiyim liỹa nca'leuec nqohin na leuaxaiquipi, ca' ñi qota'a se ishit quiyim liỹa nca'leuec nqai'en so Cristo. 16Ca no'm se ishit nca'leuec nqohin na leuaxaiquipi, ca só'maq Cristo qai'neeta se nca'leuec nqohin. 17Ca no'm se ishit nca'leuec nqohin so Cristo, ca dá'maq rpi'ỹaxaguii qamiri qaica ca 'negue. Ca' qaiyiita viitaugui na nasauaxaset. 18Chaqai no'm chaqaida, ca ná'maq mashic ileu quená'maq mashic huelec so Cristo, ca ná'ogue na'laañi. 19Ca no'm qaidaata da qanachaalataxac nagui quiyim selloqotaugui da qanaquitaxac so Cristo, ca ỹaatqajam chalego qare'xoric, mesqai shinqata na liỹaripi.
20Qam dá'maq ỹaatqajam llic quiyim so Cristo na' ileu, qam liỹa nca'leuec nqohin quiñi qota'a. Ca' chaqaiso só'maq la'auaxanec quiyim qanca'laxatec quena leuaxaiquipi quená'maq tai'a quiyim qanca'laxatec qai'neeta. 21Ma' dajo nelauaxa chicqochiquio' so 'oonoqui' qom, ca' 'nejem qai'neeta chicqochigui so liỹa qom quiyim ishit liỹa qanca'laxatec na leuaxaiquipi. 22Ca' chaqaida da 'neeta quiyim ná'ogue na qomyipi ileu, ma' na'deetau'a so Adán, ca' qai'neeta ná'ogue nca'leuec nqohin ná'maq na'deetau'a so Cristo. 23Qam quiñi 'óna ỹaatqata quecá'maq chi lalamaxat noỹaxanaxac. Qam só'maq Cristo só'maq 'au nca'leuec nqohin. Ime, ca lotqai qalam ná'maq lalamqateripi so Cristo, ma' liỹa rapil. 24Ca' ma'le, ca' novi' ca nqodoc. Ca ma'le, ca' so Cristo nopoxoỹaxajñi ná'ogue na lquesaxanaxa na ỹoreta'oguit relaataxantaquipi neta'allipi se re'xogui queda piguim. Ca hua'ñi, ca' ỹaanot da lo'ueenataxanaxac quiyim ỹoiquentac ná'ogue najo ñi qota'olec. 25Ma' so Cristo qaiyiita queetalec quiyim nashi, toco' ma' ỹovita ca na'xa'a quiyim ñi qota'a co'uelec nqai'en ná'ogue na npa'guenaxauaripi. 26Ca' só'maq pa'aatec pa'guenaxaua só'maq qanopoxoỹaxajñi, ca chaqaiso' so nelauaxa. 27Ma' ñi qota'a mashic pataxalec quiyim ỹoiquentac ná'ogue najo so Cristo. Qam ma' naua naneresañi na'qaatqa 'nerac quiyim qaipataxalec ná'ogue najo so'maxare, ca' ñi qota'a se ỹalego quena'maxare, ma' chaqaiñi ñí'maq pataxalec ná'ogue nanchaqaina so'maxare. 28Ca qam ma' ỹovita quiyim ime qaipataxalec ná'ogue quiyim ỹoiquentac so Cristo, ca' ma'le, ca chaqaiso só'maq Cristo, ma' llaalec ñi qota'a, ca' chi nañaanalta' quiñi qota'olec, ñí'maq chicqochigui quiyim qaipataxalec quiyim ỹoiquentac ná'ogue najo. Ca' quiyi, ca ñi qota'a ỹomata'ta' quiyim ỹoiquentac ná'ogue najo.
29Chaqai da liỹa quiyim mashic 'ue na qanachilaxangui da 'neeta queca leuaxaic. ¿Chi'neco' ma' 'ne'teco' dajo? No'm se liỹa nca'leuec nqohin ná'maq mashic ileu, ¿chi'neco' ma' nañaanlco' quiyim qanachilaxan quena'maxare?
30Chaqai ¿chi'neco' ma' qomi' hueetalgoto naua lichigue' naua na'xata' seuqatauguilo? 31Naua'que naua na'xata' seueta'guit da lichic so nelauaxa. Ca cá'maq dajo ỹaatqajam llic, 'nejem da ñitoonaxac ñitoonta'guelo qamiri, ma' mashic qamiri viilec so qara'gaxala' Jesucristo. 32Ỹim shiquiaxam ỹaatqajam seloguiỹa'e' na iseripi na'le quiyi Efeso; qam ¿nega'ỹo' ca ỹaueguec quedajo? No'm llic quiyim tot nca'leuec nqohin ná'maq mashic ileu, ca' ỹaatqajam 'chiñi quiyim llic da na'qaatec 'neetasa': “Squi'ỹaq, chaqai ñi'taq, ma' ma' nete'e, ca qareleu.”
33Sqai 'xañiigue quiyim 'ue ca nayinaxaguii. 'Nejem da 'neeta da na'qaatec: “Ca qom se no'uen ishit na'axat ca no'uen no'ueenataxac ca liỹa.” 34Pilliu'a dá'maq chaalataxac co'teeta, se raỹaacotac, chaqai 'xañiñi da reualoxonqaishiguii, ma' 'ue na saqa' iuanapega ñi qota'a caqamiri. Ca' dajo shinac, qaiyi 'ue ca rayiloxohi.
Dá'maq 'neeta ma' liỹa qanca'laxatec na leuaxaiquipi
35Qam 'uo' ma'le ca renataxan: “¿Negue' cá'maq 'neeto' ma' liỹa qanca'laxatec na leuaxaiquipi? ¿Negue' ca 'neeto' ca loshicmaxa ỹantañi?” 36Dajo nenataxanaxac ỹaatqajam hualoxonaq, ma' quena' qoỹanñi aca nanecse ala, ca' aso nanecse se ishit ñaxat no'm saqa' ileu aso ala. 37Aca qoỹanñi mesqai acá'maq llaqtaxai, qasoota só'maq ala, no'm trigo loqo'm acanchaqaca liỹa ala. 38Ime, ca' ñi qota'a ỹaanem aso llaqtaxa cá'maq 'neeta ca no'ueenataxac añi 'oono'lli' nanecse, ipaquichigui nqai'en dá'maq chi no'ueenataxac. 39Mesqai ná'ogue na 'ueenataxac 'oonoqui'. Ca 'neeta na loshicmaxa na qom 'oonoqui' da no'ueenataxac, chaqai na iseripi lotqai ỹoqa'a, chaqai na ỹo lotqai ỹoqa'a, chaqai na nalliñipi lotqai ỹoqa'a. 40Chaqai qai'neeta 'ue na no'ueenataxac na hueeto'ot na piguim, chaqai quená'maq hueetalec na 'laua. Qam da loyac da no'ueenataxac ná'maq hueeto'ot na piguim sqai 'nejem na loyac na hueetalec na 'laua. 41Na lauaq añi ra'aasa mesqai 'nejem na lauaq ñi shiraigo, chaqai cana huaqajñi; caná'maq chi neuaqajñishaxaua qai'neeta ỹoricchi na lauaq cañi 'óna. 42Ca' chaqaida 'neeta ma' qanca'laxatec na leuaxaiquipi. Quená'maq qaishinñi tai'a quiyim sogui nichiga', qam cá'maq nca'leuec, ca tai'a quiyim tot ileu. 43Ca cá'maq qaishinñi qaica ca loyac, qam cá'maq qanca'laxatec ỹaatqajam 'ue da lemaqachic. Qaishinñi cá'maq qaica ca la'ñaxac, qam ma' qanca'laxatec, ca ỹaatqajam 'ue da lquesaxanaxa. 44Qaishinñi na re'qoochigui noshicmaxa, qam ma' qanca'laxatec, ca' na'al. 'Ue na noshicmaxa re'qoochigui, chaqai 'ue na noshicmaxa na'al.
45Ca' chaqaida 'nerac naua nerecse' la'qaatqa ñi qota'a: “Só'maq 'auaxaic qom, leenaxat Adán, co'na' qaỹo'uet, ca qoỹanagui quiyim ỹaatqajam nca'leetauec nqohin.” Qam so Cristo só'maq pa'aatec Adán, ca' chaqaiso só'maq na'al só'maq ishit ca'laqataxan. 46Qam só'maq na'al mesqaiso só'maq 'auaxaic. Ta'ta'a dá'maq re'qoochigui, ca co'uaataxanta só'maq na'al. 47So 'auaxaic qom qaỹachigoxotaugui na 'laua, ca so'maxare 'lauasec. Qam só'maq co'uaataxanta qom, só'maq qara'gaxala', so'maxare chicqo'ot na piguim. 48Ca' da no'ueenataxac na loshicmaxa na qom quena 'laua 'nejem dá'maq no'ueenataxac so 'auaxaic qom, ma' na' qaỹo'uet, qaỹachigoxotaugui na 'laua. Chaqai dá'maq no'ueenataxac na piguim le'ec, ca 'nejem dá'maq no'ueenataxac só'maq qara'gaxala' chicqo'ot na piguim. 49Ca 'nejme' qomi' nagui sanqatañi da no'ueenataxac só'maq 'lauasec, ca' 'nejem qai'neeta cá'maq na'xa'a quiyim qomi' sanaxañi da no'ueenataxac só'maq piguimsec.
50Ca dá'maq sahotaque sa'xatema qamiri ỹaqaỹa' 'neetasa': quená'maq re'qoochigui qaroshicmaxa, ma' ileu, se ishit inoxoneu'a ca lo'ueenataxanaxac ñi qota'a ñaqa naata, ma' quená'maq 'ue lqodoc se ishit ỹalecau'a ná'maq sqaica lqodoc. 51Qam sahotaque 'yiiñii dá'maq se re'xogui, ma' mesqai qomá'ogue qareleu, qam qomá'ogue ma'le qomi' qaỹadalaxate'. 52Qalaxam ỹaatqajam ne'laqataxanchiguiñi ma'le dajo, 'nejem ca quiyim nqatagoxoñi ca qom, ma' qaỹa'xaỹaque aso co'uaataxanta npe'taxanaxac. Ma' qaipe'taxanlecna, ca na leuaxaiquipi liỹa nca'leuec nqohin, ca' quiyi, ca tot ishit ileu. Qam qomi' chi qaỹadalaxate' qomi'. 53Ca quená'maq qaroshicmaxa ma' 'ue lqodoc, ca' ỹouen quiyim qoỹañigui cá'maq sqaica lqodoc. Chaqai ná'maq ileu, ca' ỹouen quiyim qoỹañigui cá'maq se ileu. 54Ca ná'maq qaroshicmaxa ma' 'ue lqodoc ỹovita quiyim qoỹañigui cá'maq sqaica lqodoc, chaqai ná'maq ileu qoỹañigui cá'maq se ileu, ca' ipaquichigui dá'maq 'nerac yaua naneresañi la'qaatqa ñi qota'a: “Da nelauaxa mashic qanaqajñi, ca qaiuagaxatac. 55Qami' nelauaxa, ¿hua'gue ca hueeta'gue ca rquesaxanaxa'e' quiyim qomi' qarque'maqachichi'? Qami' nelauaxa, ¿negue' ca hueeta'gue ca 'ñiisapega rquesaxanaxa'e' 'ñiisapega rauegaxan?” 56Dá'maq ỹachigoxotetapougui da lquesaxanaxa da nelauaxa quiyim qomi' que'maqachite', chaqaida dá'maq nasauaxaset, chaqai na lelaataxanaxaquipi ñi qota'a chaqaida dá'maq nqo'naxatec da lquesaxanaxa da nasauaxaset. 57Qalaxam nagui 'xoic da qana'aachic quiñi qota'a, ma' ỹaanema qomi' quiyim sauegaxanaq, chicqochigui nqai'en so qara'gaxala' Jesucristo.
58Ca' vichiguiño' qamiri ñauochaxaua' ỹaqaỹa', sqaico' ca nqovilliguiỹaque, ỹaatqajam quiito'ot 'viichitac da lo'ueenataxanaxac so qara'gaxala'. Ma' qamiri 'yiiñita da ro'ueenataxanaxaguii quiyim 'ueenataxañitacot so'maxare, ma'le ỹaatqajam 'ue ca 'negue.
Currently Selected:
1 Corintios 15: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.