युहन्न 3
3
नीकोदेमस् येसुत खतु लबरी खबल
1हुजुरी यहुदी महासभाकी नीकोदेमस् पङ्बे म्ही गी मुबल। थे फरीसी मुबल। 2तीरेत् म्हुना नीकोदेमस् येसुइज खज्यीम् पङ्ज्यी, “लोप्पोन्, थेङ् ङ्यीमात लोप्परी पर्मेस्वर्चे पीत्युजेत्पल य्हीन्ब बी ङ्यीमाचे स्येःब। तलेपङ्सम् पर्मेस्वर्चे र्हो अस्य्हेङ्जेत्पल य्हीन्सम् थेङ्चे स्य्हेङ्जेत्पे चु तेःङेन्की लक् खल्चेएनो स्य्हेङ् अखम्।”
3येसुचे थेत सुङ्ज्यी, “ङ एत देमेन्नो पङ्ब, खलपङ्लेनो देबेएनो अन्हसम् थेचे पर्मेस्वर्की य्हुल् म्रङ्अखम्।”
4ओसेम् नीकोदेमस्चे ङ्योत्ज्यी, “खेक्प तबे म्ही देबेएनो खले न्हब खम्ब? थे अमइ फोरी देबेएनो वङ्ज्यीम् न्हब खम्ब?”
5येसुचे जोहप् न्हङ्ज्यी, “ङ एत देमेन्नो पङ्ब, यीतेङ् आत्मा ग्यम्से अन्हज्यी पङ्सम् खलेएनो पर्मेस्वर्की य्हुल्री वङ्ब अखम्। 6ल्हीः ग्यम्से न्हबल ल्हीः य्हीन्ब, तर पबीत्र आत्मा ग्यम्से न्हबल आत्मा य्हीन्ब 7ङचे एत देबेएनो न्हनोथोब पङ्बे तम्री ए तेःङेन् थतउ। 8लाब खनचे ङ्यीइ म्हेन्ज्यी होलेचेनो ङ्यीब। एचे लाबइ केत् थ्येःब, तर हुजु खनचे खबल, ओसेम् खन य्हर्टीब बी अस्ये। आत्मा ग्यम्से न्हबे म्हीमाएनो होतेब तब।”
9नीकोदेमस्चे थेङ्त, “चोतेब खले तब खम्ब?” बी ङ्योत्ज्यी।
10येसुचे जोहप् न्हङ्ज्यी, “एम् इस्राएलीमाकी ङ्हच्छ्यङ् लोप्पोन् य्हीन्ब, एचेएनो चु तम् अगो? 11ङ एत देमेन्नो पङ्ब, ङ्यीमाचे ता स्येःज्यी हुजुनो पङ्ब, ओसेम् ङ्यीमाचे ता म्रङ्ज्यी हुजुनो स्येत्प। तर एङ्यीमाम् ङ्यीमाचे पङ्बे तम्मात पतइअती। 12ङचे चु जम्बुलीङ्की तम् पङ्मएनो एङ्यीमाचे बीस्वास् अल, झेन् स्वर्गइ तम् पङ्ज्यी पङ्सम् एङ्यीमाचे खले बीस्वास् लब खम्ब? 13स्वर्ग ग्यम्से दुङ्री युबे म्हीइ ज बीम ल्हो-ल्हो खलेएनो स्वर्गरी ङ्यीबल अरे। 14मोसाचे उजाड् ग्लारी पीतल्की पुख्रीत कोत्प र्हङ्लेनो म्हीइ ज कोत्थोब। 15होत्तज्यीम् खल खलचे थेङ्त बीस्वास् लब थेङ्यीमाचे खेमेएनो अबेबे जीवन् यङ्स्ये मुब। 16तलेपङ्सम् पर्मेस्वर्चे जम्बुलीङ्की म्हीमात य्हक्को म्होइज्यीम् र्हङ्की गीकीनो मुबे जत पीत्युजेत्ज्यी। खल्चे पर्मेस्वर्की जत बीस्वास् स्य्हेङ्ब थेङ्यीमा खलेएनो नास् तस्ये अरे तर थेङ्यीमाचे खेमेएनो अबेबे जीवन् यङ्स्ये मुब। 17पर्मेस्वर्चे जम्बुलीङ्त दोस् ङोन्बरी थेङ्की जत पीत्युजेत्पल अय्हीन्, तर जम्बुलीङ् थे ग्यम्से थर्खइ बी पीत्युजेत्पल य्हीन्ब। 18थेङ्त बीस्वास् स्य्हेङ्बलमा दोसी तस्ये अरे, तर थेङ्त बीस्वास् अस्येङ्बलमाम् दोसी तज्यीन्बल मुब। तलेपङ्सम् थेङ्यीमाचे पर्मेस्वर्की गीकीनो मुबे जत बीस्वास् स्य्हेङ्बल अरे। 19होलेतज्यीम् थेङ्यीमा चोले दोसी तस्ये मुब, य्हल् जम्बुलीङ्री खबल मुब, तर म्हीमाचे य्हल्त बीमम् म्हुन्दुङ्त म्होइज्यी, तलेपङ्सम् थेङ्यीमाकी लक् दुस्ट मुबल। 20दुस्ट लक् स्य्हेङ्बलमाचे य्हल्त अखो। ओसेम् थेङ्यीमाकी लक् म्रङ्ल पङ्ज्यीम् य्हल्री अख। 21तर देमेन्त म्हन्दीबे म्हीमाम् य्हल्री खब, होत्तज्यीम् थेङ्यीमाचे स्य्हेङ्बे लक्मा पर्मेस्वर्री स्य्हेङ्बल य्हीन्ब बी ज्यनले म्रङ्ब।”
बप्तीस्मा पीन्बे युहन्न
22हुजुलीप्चे येसु र्हङ्की डबमातेङ् बक्च्य यहुदीया प्रदेस्री स्येःज्यीम् तोव बेलोसम्म डबमातेङ् बक्च्य हुजुरीनो स्य्हुज्यी, ओसेम् म्हीमात बप्तीस्मा न्हङ्ज्यी। 23युहन्नचेएनो सालीम् पङ्बे ज्यीद सहर्की रेइकी एनोन् पङ्बे ग्लारी बप्तीस्मा पीन्टीब मुबल, तलेपङ्सम् हुजुरी यी य्हक्को मुबल। ओसेम् म्हीमा बप्तीस्मा कीन्बरी खस्यीनोटीबल मुबल। 24(होदे बेलो सम्मा युहन्नत जेल्री च्युप्पल अरेबल।)
25हुजु बेलोरी युहन्नइ डबमातेङ् यहुदी गीकी गुङ्री ख्रुज्यीम् दाबे बारेरी तम् ज्योप्ज्यी। 26होत्तज्यीम् थेङ्यीमा युहन्नइज खज्यीम् पङ्ज्यी, “लोप्पोन्, यर्दन् ग्येन्दीइ क्योम्सङ् मुबे बेलोरी थेङ्तेङ् म्ही गी मुबल। हुजु म्हीइ बारेरी थेङ्चे ङ्यीमात स्येत्जेत्पल मुबल। देरेम् हुजु म्हीचे बप्तीस्मा पीन्टीबल मुब, ओसेम् जम्मनो बप्तीस्मा कीन्बरी हुजुइज ङ्यीटीबल मुब।” 27युहन्नचे जोहप् पीन्ज्यी, “पर्मेस्वर्चे अन्हङ्गदे खल्चेएनो तेएनो यङ्ब अखम्। 28‘ङ मुक्ती न्हङ्बे ख्रीस्ट् अय्हीन्, ङम् थेङ्की ङोन्ग्यम् पीत्युबलकीनो य्हीन्ब’ बी ङचे पङ्बल एङ्यीमाचे र्हङ्चेनो थ्येःबल मुब। 29दुलही दुलहल य्हीन्ब, ओसेम् दुलहकी रेइरी रप्पे र्हो दुलहइ केत् थ्येःज्यीम् य्हक्को तङ्ब। चोले ङइ तङ्ब देरेम् टोप् तबल मुब। 30थेङ् ङ्हच्छ्यङ् तबोर्थोब, तर ङम् ज्यीद तबोर्थोब।”
स्वर्ग ग्यम्से ब्योन्युबे म्ही
31स्वर्गचे ब्योन्युबलमी गोदोब्न्हङ् ङ्हच्छ्यङ् य्हीन्ब। जम्बुलीङ्री न्हबलमम् जम्बुलीङ्लनो य्हीन्ब, ओसेम् जम्बुलीङ्की तम्नो लब। तर स्वर्गसे ब्योन्युबलमी गोदोब्न्हङ् ङ्हच्छ्यङ् य्हीन्ब। 32थेङ्चे र्हङ्चे म्रङ्जेत्पलतेङ् सेन्जेत्पे तम्मानो सुङ्ब, होलेतलेनो थेङ्चे सुङ्बे तम्त खल्चेएनो बीस्वास् अल। 33तर थेङ्चे सुङ्बे तम्त बीस्वास् स्य्हेङ्बलमाचेमी पर्मेस्वर् देमेन्नो य्हीन्ब पङ्बे तम् ङोन्ब। 34पर्मेस्वर्चे पीत्युजेत्पलचे पर्मेस्वर्की फ्रोइनो सुङ्ब, तलेपङ्सम् पर्मेस्वर्चे थेङ्त पबीत्र आत्मा दप्ज्यीम् अय्हीन् अदब्नले न्हङ्बल मुब। 35अपचे जत म्होइजेत्प, ओसेम् जम्मनो तम्मा थेङ्की फ्यारी न्हङ्बल मुब। 36ओसेम् खल्चे पर्मेस्वर्की जत बीस्वास् लब थेतेङ् खेमेएनो अबेबे जीवन् मुब। खल्चे जचे कुल्बे अर्ती अङ्येन्, थेचे खेमेएनो अबेबे जीवन् खेमेएनो यङ्स्ये अरे, तर पर्मेस्वर्की बोमो थेइ जोरी तस्यीनो टीस्ये मुब।
Currently Selected:
युहन्न 3: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.