মার্ক 15
15
পীলাত মুজুঙোত্ যীশু
(মথি ২৭:১-২৬; লূক ২৩:১-২৫; যোহন ১৮:২৮-১৯:১৬)
1আজল্ ধর্মগুরুগুনে বেন্যেপোত্যে বুড়ো নেতাগুনো লগে, ধর্ম-মাষ্টরুনো লগে আর দাঙর্ তেম্মাঙত্ বেক মানুচ্চুনো সমারে এক্কান্ সল্লা গুরিলাক্। সে পরেদি তারা যীশুরে বানি নেযেইনে তারে রোমীয় আজল্ শাসনগুরিয়্যে পীলাত আঢত্ দিলাক্। 2সেক্কে পীলাতে যীশুরে পুযোর্ গুরিলো, “তুই কি যিহূদীগুনোর্ রাজা?”
যীশু জোব্ দিলো, “তুই ঠিগ্ কধা কোইয়োচ্।”
3আজল্ ধর্মগুরুগুনে যীশুরে ভালোক্কানি দুষ্ দিলাক্। 4সেক্কে পীলাতে আরঅ যীশুরে পুযোর্ গুরিলো, “তুই কি জোব্ ন-দিবে? চাহ্, তারা তমারে কদক্ দুষ্ দেদন্।”
5মাত্তর্ যীশু আর কনঅ জোব্ ন-দিলো। সেক্কে পীলাতে আমক্ অলঅ।
6উদ্ধোর-পরব সময়োত্ মানুচ্চুনে যে বন্ধীবোরে চেদাক্ পীলাতে তারে ইরি দিদো। 7সেই সময়োত্ বারাব্বা নাঙে এক্কো মানুচ্ জেল্খানাত্ বন্দী এলঅ। বিদ্রোহর্ সময়োত্ তে বিদ্রোহীগুনো সমারে থেইনে খুন্ গোজ্যে। 8মানুচ্চুনে পীলাত ইধু এইনে কলাক্, “তুই আমিযে যিয়েন্ গুরি থাচ্ ইক্কিনে সিয়েনই গর্।”
9পীলাতে তারারে কলঅ, “তুমি কি চঅ যে, মুই যিহূদীগুনোর্ রাজাবোরে ইরি দুয়োং?” 10পীলাতে গমেডালে হবর্ পেদঅ যে আজল্ ধর্মগুরুগুনে ইংসে গুরিনে যীশুরে তা আঢত্ তুলি দুয়োন্। 11মাত্তর্ আজল্ ধর্মগুরুগুনে মানুচ্চুনোরে খাট্যেয়োন্ যেন তারা যীশুর বদলে বারাব্বারে মাগি লন্।
12পীলাদে আরঅ মানুচ্চুনোরে পুযোর্ গুরিলো, “সালে তুমি যিবেরে যিহূদীগুনোর্ রাজা কঅ তারে নিইনে মুই কি গুরিম্?”
13মানুচ্চুনে রঅ ছারিনে কলাক্, “তারে ক্রুশোত্ দে।”
14পীলাতে কলঅ, “কিত্তে, তে কি দুষ্ গোজ্যে?”
মাত্তর্ মানুচ্চুনে আরঅ জুরে রঅ ছাড়িনে কুয়ো ধুরিলাক্, “তারে ক্রুশোত্ দে।”
15সেক্কে পীলাতে মানুচ্চুনোরে হুজি গুরিবাত্তে বারাব্বারে তারা ইধু ইরি দিলো, আর যীশুরে জদবদে চাবুক্ মারিবার্ উগুম্ দিইনে ক্রুশোত্ দিবাত্তে দিলো।
সৈন্যগুনোর্ ঠাট্টা-তামাজা
(মথি ২৭:২৭-৩১; যোহন ১৯:২,৩)
16সে পরেদি সৈন্যগুনে যীশুরে তা রাজঘর জাগান ইধু ভিদিরে নেযেলাক্ আর বেক্ সৈন্যগুনোরে ডাগিনে এগত্তর্ গুরিলাক্। 17তারা যীশুরে বেগুনো রঙর্ কাবড় উরেই দিলাক্, আর কাদা-লুদিলোই এক্কো মুকুট্ বানেইনে তা মাঢাবোত্ পিনেই দিলাক্। 18সে পরেদি তারা যীশুরে কুয়ো ধুরিলাক্, “যিহূদী-রাজ, জয় ওক্!”
19তারা এক্কো মুগোর্লোই যীশু মাঢাবোত্ বার্বার্ মারা ধুরিলাক্ আর তা কিয়্যেত্ সেফ্ ফেলেই দিলাক্, আর আঢু পারিনে তারে সর্মান দেগেবার্ ভান্ গুরিলাক্। 20যেক্কেনে তারা যীশুরে তাট্টা তামাজা গরানা শেজ্ গুরিলাক্ সে পরেদি তারা তা বিগুনী রঙর্ ঢিলেঢালা পোজাক্কান্ খুলি নেযেলাক্ আর তারার্ নিজো পোজাক্কানি উরে দিইনে তারে ক্রুশোত্ দিবাত্তে নেযা ধুরিলাক্।
ক্রুশো উগুরে প্রভু যীশু
(মথি ২৭:৩২-৪৪; লূক ২৩:২৬-৪৩; যোহন ১৯:১৭-২৭)
21নিগিলিনে যেবার্ পধত্ তারা শিমোন নাঙে শঅরর্ এক্কো মান্জ্যর্ লগে দেগা অলঅ, যিবে দেজর্ শঅরত্তুন্ এজের্ আর সৈন্যগুনে তারে যীশুর ক্রুশ্চান বুয়োই নেযেবাত্তে বাধ্য গুরিলাক্। শিমোনে অলঅ কূরীণী শঅরর্ মানুচ্ আর আলেক্সান্দর আহ্ রূফোর বাপ্। 22তারা যীশুরে গল্গথা, অত্তাৎ কুলোচারা নাঙে এক্কান জাগাত্ নেযেলাক্। 23সিয়েনত্ তারা যীশুরে আংগুর-রস লগে এক বাবোত্যে তিদে রস হেবাত্তে দিলাক্, মাত্তর্ তে সিয়েন হেবাত্তে ন-চেলঅ। 24ইয়েনর্ পরেদি তারা যীশুরে ক্রুশোত্ দিলাক্ আর সৈন্যগুনে চাম্বা চেইনে যীশুর লাম্বা সিলুম্মো তারা নিজো ভিদিরে ভাগাভাগি গুরিলাক্, সিলুম্মো উগুরি লুঙি মারিনে কা ভাগ্যত্ কি পড়ে সিয়েন যগা চাদন্।
25বেন্যে নয়টা সময়োত্ তারা যীশুরে ক্রুশোত্ দিলাক্। 26যীশু বিরুদ্ধে দুষ্-নামাগানত্ লেগা এল, “যিহূদীগুনোর্ রাজা।” 27তারা দ্বিজন ডাগেদরেয়ো যীশু লগে ক্রুশোত্ দিলাক্, একজনরে ডেনেদি আর অন্যজনরে বাঙেদি। 28সেক্কে পবিত্র বোইয়োর্ এ কধাগান্ পূরোণ অলঅ: “তারে অন্যেয় গুরিয়্যেগুনো লগে গোণা অলঅ।”
29যিদুক্কুন্ মানুচ্ সেই পথ্তানদি যাদন্ তারা মাঢাগুন্ লাড়েইনে যীশুরে অগমান্ গুরিলাক্, “ওহ্, তুই নাহি উবোসনা-ঘরান্ ভাঙিনে আরঅ তিন দিনো ভিদিরে সিয়েন বানেই দি পারচ্! 30ইক্কিনে ক্রুশোত্তুন্ লামি এইনে নিজোরে রোক্ষ্যে গর্!”
31সেই অক্তত্ আজল্ ধর্মগুরুগুনে আর ধর্ম-মাষ্টরুনেয়ো যীশুরে ঈচ্ গরা ধুরিলাক্, একজন আরেক জনরে কুয়োকি গরা ধুরিলাক্, “তে অন্যগুনোরে রোক্ষ্যে গুরিদো, মাত্তর্ নিজোরেয়ো রোক্ষ্যে গুরি ন-পারে। 32মশীহরে চগি, ইস্রায়েলীয়গুনোর রাজাবোরে! ইক্কিনে ক্রুশোত্তুন্ লামি আয় আর আমি যেন তারে দেগিনে বিশ্বেজ্ গুরি পারিই।”
আর যীশু লগে যিগুনোরে ক্রুশোত্ দিয়্যে ওইয়্যে তারায়ো তারে অগমান গরা ধুরিলাক্।
প্রভু যীশুর মরণ্
(মথি ২৭:৪৫-৫৬; লূক ২৩:৪৪-৪৯; যোহন ১৯:২৮-৩০)
33সেদিন্ন্যে দিবুজ্যে বারটাত্তুন্ ধুরি বেল্যেমাদান্ তিন ঘন্টা সং গোদা দেজ্চান আন্ধারে ঢাক্যে এলঅ। 34বেল্যে তিনটা সময় যীশু জুরে রঅ ছাড়িনে কলঅ, “এলোই, এলোই, লামা শবক্তানী,” অত্তাৎ “গোজেন মর্, গোজেন মর্, কিত্তে তুই মরে ফেলে যেইয়োচ্?”
35যিগুনে সিয়েনত্ থিয়্যেই এলাক্ তারাত্তুন্ কয়েকজনে এ কধাগান্ শুনিনে কলাক্, “শুনো, শুনো, তে এলিয়রে ডাগের্।”
36সেক্কে এক্কো মানুচ্ ধাবা যেইনে এক্কো স্পঞ্জত্ সির্কাত্ ভিজেল আর এক্কো মুগোর মাঢাত্ বাজেইনে সিবে যীশুরে হেবাত্তে দিলো।
তে কলঅ, “থাগ্, চেই এলিয় তারে লামেই নিবাত্তে এজে না কি।” 37ইয়েনর্ পরেদি যীশু দাঙর্ গুরি রঅ ছাড়িনে শেজ্ নিজেচ্চো ফেলেইনে গেলগোই। 38সেক্কে উবোসনা-ঘরর্ পর্দাগান উগুরেত্তুন্ ধুরি তলেদি সং ফাদিনে দ্বিভাগ্ ওই গেলঅ। 39যে আর্মি অফিসার্বো ক্রুশ্চান মুজুঙোত্ থিয়্যেইনে কিবাবোত্যে গুরি যীশু মুরি যায় সিয়েন চেলঅ, তে কলঅ “এই মানুচ্চো ঘেচ্চেক্গুরি গোজেনর্ পুয়ো এলঅ।”
40কয়েক্কো মিলে দূরোত্ থিয়্যেইনে ইয়েনি বেক্কানি দেগদন্। তারা ভিদিরে এলাক্ মগ্দলীনী মরিয়ম, দ্বিবে যাকোব ভিদিরে চিগোন্ যাকোব আহ্ যোষেফ মাবো মরিয়ম আর শালোমী। 41যীশু যেক্কে গালীলোত্ এলঅ সেক্কে এ মিলেগুনে তা সমারে বেক্ জাগাইধু যেদাক্ আর তারে সেবা গুরিদাক্। আরঅ বোউত্ মিলে, যিগুনে যীশু লগে লগে যিরূশালেমত্ এচ্চোন্, তারায়ো সিয়েনত্ এলাক্।
প্রভু যীশুর কবর্
(মথি ২৭:৫৭-৬১; লূক ২৩:৫০-৫৬; যোহন ১৯:৩৮-৪২)
42সেদিন্নো এলদে আয়োজনর্ দিন, অত্তাৎ জিরেবার্ আগ দিন। 43যেক্কে সাজোন্যে ওই এলঅ সেক্কে অরিমাথিয়া আদামর্ যোষেফে সাহস গুরিনে পীলাত ইধু যেইনে যীশুর কিয়্যেগান চেলঅ। তে দাঙর্ সভাত্ এক্কো নাঙ-গোজ্যে মানুচ্ এলঅ আর তে নিজে গোজেন রেজ্যত্তে বাজ্জেই আঘে। 44পীলাতে আমক্ অলঅ যে, যীশু এদক্ যাদিমাদি মুরি গেলঅ। ঘেচ্চেক্গুরি যীশু মোজ্যে না হি, সিয়েন সেনাপতিবোরে ডাগিনে তে পুযোর্ গুরিলো। 45যেক্কে সেনাপতিবোত্তুন্ তে হবর্ পেলঅ, ঘেচ্চেক্গুরি তে মোজ্যে সেক্কে কিয়্যেগান্ যোষেফরে দিলো। 46যোষেফে যেইনে কাবড় কিনি আনিলো আর যীশুর মরা কিয়্যেগান্ লামেইনে সে কাবড়ান্ উরেই দিলো, আর মুড়ো কাবিনে বানেয়্যে এক্কো গোরত্ সে কিয়্যেগান্ থলঅ। সে পরেদি তে গোর মুয়োনত্ এক্কো পাত্তর্ গোজ্যেই দিলো। 47মগ্দলীনী মরিয়ম আর যোষেফর মা মরিয়মে রিনি চেই আঘন্ আর যীশুর কিয়্যেগান কন্ জাগানত্ সিয়েন দেগিলাক্।
Currently Selected:
মার্ক 15: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society