মার্ক 1
1
বাপ্তিষ্মদিয়্যে যোহনর প্রচার্
(মথি ৩:১-১২; লূক ৩:১-১৮; যোহন ১:১৯-২৮)
1গোজেন পুয়ো যীশু খ্রীষ্ট পৌইদ্যেনে গম্ হবরর্ আরাম্ভ।
2ভাববাদী যিশাইয় বোইয়োত্ গোজেনর্ কোইয়্যে এ কধাগান্ লেগা আঘে:
চাহ্, তঅ আগেদি
মুই মর্ হবর্ কোইয়্যেবোরে পাদাঙর্।
তে তঅ পথ্তান্ যুক্কোল্ গুরিবো।
3ধূল্যেচর-চাগালাত্ একজন রঅ জগার্ পারিনে কত্তে,
তুমি প্রভুর্ পথ্তান ঠিগ্ গরঅ,
তা পথ্তান উজু গরঅ।
4সে কধামজিম্ বাপ্তিষ্মদিয়্যে যোহনে ধূল্যেচর-চাগালাত্ যেইনে মানুচ্চুনোরে বাপ্তিষ্ম দের্ আর ফগদাং গরের্ যেন মান্জ্যে পাপর্ খেমা পেবাত্তে পাপত্তুন্ মনানি ফিরেন্ আর বাপ্তিষ্ম লন্। 5সেক্কে যিহূদিয়া রেজ্যত্ আর যিরূশালেম শঅরর্ বেক্কুনে নিগিলিনে যোহন ইধু এজা ধুরিলাক্। তারা যেক্কে নিজোর্ পাপ্পানি স্বীগের্ গুরিলাক্ আর সেক্কে যোহনে যর্দন গাঙত্ তারারে বাপ্তিষ্ম দিলো।
6যোহনে উটোর্ কেজ কাবড় উরিদো আর তা কমরত্ চামড় কমর্-বিজোনি এলঅ, আর তার্ হানাগান এলঅ ঝার মধু আর পুগ্-যুগ্। 7তে যিয়েন্ ফগদাং গুরিদো সিয়েন অলঅ, “মঅ পরেদি এক্কো এজের্। তে মত্তুন্ বেশ্ খেমতাবলা। মাঢা নিগিরিনে তার্ জদার্ ফিতেগানি খুলিবার্ যগাজ্যেয়ো মুই নয়। 8মুই তমারে পানিত্ বাপ্তিষ্ম দুয়োঙর্ মাত্তর্ তে পবিত্র আত্মালোই তমারে বাপ্তিষ্ম দিবো।”
প্রভু যীশুর বাপ্তিষ্ম আর পোরোক্ষ্যে
(মথি ৩:১৩-৪:১১; লূক ৩:২১,২২; ৪:১-১৩)
9সে অক্তত্ যীশু গালীল রেজ্যর্ নাসরত্ আদামত্তুন্ এলঅ, আর যোহনে তারে যর্দন গাঙত্ বাপ্তিষ্ম দিলো। 10পানিত্তুন্ উদি এজানার্ লগে লগে যীশু দেগিলোদে, আগাজ্চান ফাদি যেইয়্যে আর পবিত্র আত্মা কোদোর ধোক্ক্যেন্ ওইনে তা উগুরে লামি এলঅ। 11সে অক্তত্ স্বর্গত্তুন্ এ কধাগান শুনো গেলঅ, “তুয়ই মর্ কোচ্পেইয়্যে পুয়ো, তঅ উগুরে মুই অমকদ হুজি।”
12ইয়েনর্ পরেদি যীশুরে পবিত্র আত্মার্ পরিচালনায় ধূল্যেচর-চাগালাত্ যাহ্ পড়িলো। 13সেই ধূল্যেচর-চাগালাত্ চল্লিশ দিন ধুরিনে শদানে যীশুরে লুভ্ দেগেইনে পাপত্ ফেলেবার চেট্ট্যা গরা ধুরিলো। সিয়েনত্ বোউত্ ঝার্বো এ্যামান্ এলাক্, আর স্বর্গদূত্তুনে যীশুরে সেবা যত্তন্ গুরিলাক্।
শিচ্চ্য-অনা
(মথি ৪:১২-২২; লূক ৪:১৪,১৫; ৫:১-১১)
14যোহনে জেলখানাত্ বন্দী অনার্ পরেদি যীশু গালীল রেজ্যত্ গেলঅ। সিধু তে এ কধাগান্ কোইনে গোজেনর্ দিয়্যে গম্ হবরান্ ফগদাং গরা ধুরিলো, 15“সময় ওইয়্যে, গোজেন রেজ্যগান্ কায়-কুরে লুম্মেগি। তুমি পাপত্তুন্ মনানি ফিরো আর এ গম্ হবরান্ বিশ্বেজ্ গরঅ ।”
16একদিনে যীশু গালীল সাগর পার ইন্দি যার্। এমন্ সময়োত্ তে শিমোন আর তার ভেই আন্দ্রিয়রে সাগরত্ জাল্ ফেলাদে দেগিলো। সেই দ্বিজনে জাল্যে এলাক্। 17যীশু তারারে কলঅ, “মঅ লগে এজঅ। মুই তমারে মানুচ্-ধরা জাল্যে বানেম্।” 18সেক্কে তারা জালানি থোইনে যীশু লগে গেলাক্।
19সিয়েনত্তুন্ কিজু দূরোত্ যানার পরেদি তে সিবদিয়র্ দ্বিবে পুয়ো যাকোব আর যোহনরে দেগিলো। তারা নঅগানত্ বুজিনে জালানি তুনোদন্। 20যীশু তারারে দেগানার্ লগে লগে ডাগিলো, আর তারা বাপ্পো সিবদিয়রে চাগরুনো লগে নঅগানত্ থোইনে যীশু লগে গেলাক্।
ভুদে পেইয়্যে মানুচ্চো
(লূক ৪:৩১-৩৭)
21যীশু আর তা শিচ্চ্যগুনে কফরনাহূম শঅরত্ গেলাক্। পরেদি জিরেবার্ দিনোত্ যীশু সমাজ-ঘরত্ যেইনে শিক্ষ্যে দিয়্যে ধুরিলো। 22মানুচ্চুনে তা শিক্ষ্যেলোই আমক্ ওই গেলাক্, কিয়া তে ধর্ম-মাষ্টরুনো ধোক্ক্যেন্ শিক্ষ্যে ন-দের্ বরং যিবের্ অধিকার আঘে সেবাবোত্যে মান্জ্য ধোক্ক্যেন শিক্ষ্যে দের্।
23সে অক্তত্ ভুদে পেইয়্যে এক্কো মানুচ্ সেই সমাজ-ঘর ভিদিরে এলঅ। 24তে রঅ ছাড়িনে কলঅ, “ও নাসরতর্ যীশু, আমা লগে তর্ কি দরকার্? তুই কি আমারে সর্বনাশ্ গুরিবাত্তে এচ্চোস্? মুই হবর্ পাং তুই কন্না; তুই দঅ গোজেনর্ সেই পবিত্র মানুচ্চো।”
25যীশু সেক্কে সেই ভুদ্তোরে ধমক্ দিইনে কলঅ, “জুরো অ, তা ভিদিরেত্তুন্ নিগিলি যাহ্।”
26সেই ভুদ্তো সেক্কে মানুচ্চোরে মুজুরি ধুরিলো আর কিজেক্ ছাড়িনে তা ভিদিরেত্তুন্ নিগিলি গেলঅ।
27এ ঘদনাগান্ দেগিনেই মানুচ্চুনে এদক্ আমক্ অলাক্ যে, তারা নিজো ভিদিরে কুয়ো ধুরিলাক্, “ইয়েনি কি বেপার? এ অধিকার ভরা নুয়ো শিক্ষ্যেগান বা কি? এন্ কি, ভুদ্তোরেয়ো তে উগুম দে আর তারা তা কধানি শুনোদে বাধ্য অন্।”
28ইয়েন্দোই গালীল রেজ্যর্ বেক্ জাগানিত্ যীশুর কধা ছিদি পড়িলো।
ভালোক্জনে গম্ অলাক্ (মথি ৮:১৪-১৭; লূক ৪:৩৮-৪১)
29পরেদি তারা সমাজ ঘরত্তুন্ নিগিলিনেই শিমোন আর আন্দ্রিয় ঘরত্ গেলাক্। যাকোব আর যোহনেয়ো তারা লগে এলাক্। 30শিমোন শুড়িবোর্ জ্বর ওইয়্যে বিলি তে পোজ্যে এলঅ। যীশু এজানার্ লগে লগে তা কধা তারে কুয়ো অলঅ। 31সেক্কে যীশু তা কায়কুরে যেইনে আত্তান্ ধুরিনে তারে তুলিলো। সেক্কে তা জ্বরান্ গম্ অলঅ আর তে তারার্ হানা-দানার্ যুক্কোল্ গুরিলো।
32সে দিন্ন্যে বেলান্ ডুবোনার পরেদি সাজোন্ন্যে অক্তত্ মানুচ্চুনে বেক্ পিড়েল্ল্যেগুনোরে আর ভুদে পেয়্যে মানুচ্চুনোরে যীশু ইধু আনিলাক্। 33শঅরর্ বেক্ মানুচ্চুনে সেক্কে সে ঘরান দোরান্ ইধু এইনে থুবেলাক্। 34যীশু নানান্ বাবোত্যে পিড়েল্ল্যেরে গম্ গুরিলো আর বোউত্ ভুদ্ ধাবেই দিলো। তে ভুদ্তুনোরে কধা কবাত্তে ন-দিলো, কিয়া সেই ভুদ্তুনে কোই পারিদাক্ তে কন্না।
গালীল রেজ্যত্ প্রচার
(লূক ৪:৪২-৪৪)
35তার কেল্যে বেন্যেপোত্যে আন্ধার্ থাগদে যীশু উদিলো আর ঘরত্তুন্ নিগিলিনে এক্কান্ নিরিবিলি জাগাত্ যেইনে তবনা গরা ধুরিলো। 36শিমোন আর তা সমাজ্জ্যেগুনে যীশুরে তগাদন্। 37পরেদি তারে তোগেই পেইনে তারা কলাক্, “বেক্কুনে তরে তগাদন্।” 38-39যীশু তারারে কলঅ, “যেই, আমি কায়কুরে আদামানিত্ যেই যেন মুই সিধুয়ো প্রচার গুরি পারং; কিয়া সেনত্তে দঅ মুই এচ্চ্যংগে।” এবাবোত্যেগুরি যীশু গালীল বেক্ জাগানিত্ যেইনে যিহূদীগুনোর সমাজ-ঘরানিত্ ফগদাং গুরিলো আর ভান্ন্যেই আত্মাগুন ধাবেল।
এক্কো ফারাঙীবলা পিড়েল্ল্যে গম্ অলঅ
(মথি ৮:১-৪; লূক ৫:১২-১৬)
40পরেদি এক্কো ফারাঙীবলা পিড়েল্ল্যে যীশু ইধু এইনে তা মুজুঙোত্ আঢু পাদিনে কলঅ, “তুই আয়োচ্ গুরিলে মরে গম্ গুরি পারচ্।”
41মানুচ্চোরে যীশুর্ অমকদ চিত্ পুরিলো। তে আঢ্তান বাবেইনে তারে ধুরিনে কলঅ, “মুই সিয়েনই চাং, তুই গম্ অ।” 42থিক্ সেক্কে তা ফারাঙীয়ানি গম্ ওই গেলঅ।
43যীশু সেক্কে তারে বিদেয় দিলো, মাত্তর্ তা আগেদি তারে দরমর গুরি কলঅ, 44“চেইজ্, এ কধাগান কাররে ন-কোজ্। তুই বরং ধর্মগুরুগুনো ইধু যেইনে নিজোরে দেগাগোই আর সিজি অবাত্যে মোশি যে উৎসর্বর উগুমানি দিয়্যে সিয়েনি উৎসর্ব গর্। ইয়েনিলোই ধর্মগুরুগুনো ইধু প্রমাণ অবঅ যে, তুই গম্ ওইয়োচ্।”
45মাত্তর্ সে মানুচ্চো বারেদি যেইনে বেক্ জাগানিত্ এ হবরান্ কুয়ো ধুরিলো। সিয়েনত্যে যীশু আর্ কনঅ আদামত্ খুলোমেলা গুরিনে যেই ন-পারিলো। তাত্তুন্ নিরিবিলি জাগাত্ থা পল্ল; তো মানুচ্চুনে নানান্ জাগাত্তুন্ তা ইধু এজা ধুরিলাক্।
Currently Selected:
মার্ক 1: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society