JOB 37
37
1“Hi zong nih hin ka lung kha
a therter i a suk in aa su.
2Pathian aw khuari thawng le
a kaa chungin a chuakmi
aw thawng cu ngai tuah.
3Van pumpi toiah a kalter i a nimtlau
cu vawlei kil kip a phan;
4Lianhngannak aw in khuarit in a rit
caah a awn hluahmahmi aw nih
a hun zulh.
5Pathian aw cu a rianṭuannak ah
khuaruahhar a si,
Kan hngalhnak nih a phak lomi
thil lianngan kha a tuah hna.
6Hawhra cu a thawh i, ‘Vawlei ah tla,’
a ti;
Cun ruahpi kha, ‘Fak piin sur,’ a ti.
7A aw kha an theih tikah ruahpi cu
tampi in a sur thluahmah.
Mi kip kha inn chungah
a hrenhkhumh hna i
a sermi vialte kha zeihmanh
tuah loin an dir sawhsawh ko.
8Saram cu an bu chungah an lut i
an kua chungah him tein an bawk.
9Thlanglei inndal chungin
thlichia cu a ra i
Chaklei thli nih kihnak kha a ratpi.
10Pathian thaw nih tikhal a umter i
ti kaupi cu thir bangin an khal.
11Khuadawm chah pipi cu an chungah
ti a rawn hna;
Khuadawm nih a minmei cu
khuazakip ah a ṭhek hna.
12Amah nih nawl a pekmi hna kha
um khawhnak vawlei cungah hin
tuah awkah,
Amah hruainak thawngin
an i hel lengmang.
13Chimhhrinnak caah maw,
a ram ṭhatnak ding caah maw,
dawtnak caah dik,
Amah nih mah cucu a umter ko.
14“Maw Job, mah hi bia hi thei tuah,
Dir ta rih law, Pathian nih
khuaruahhar thil a tuahmi cu
ruat tuah hna.
15Zeitindah annih cu Pathian nih
an rian kha a ṭuanter hna i,
Zeitindah a khuadawm chungin
nimtlau kha a lekter ti cu
na hngal maw?
16Zeicahdah khuadawm cu cunglei ah
i nge tein a zam ti kha
na hngal maw?
Thiamnak a tlingmi a rianṭuan
khuaruahhar a si cu na hngal maw?
17Cun thlanglei thli a hung hran tikah
vawlei cu a lin a sa i
na thlan hripi he naa ciah kha,
zeitindah a si tiah na hngal maw?
18Amah bantukin van khi na samh
kho maw?
Thlalang a timi thletmi bantukin
a hakmi khi zeitindah a si na hngal
kho maw?
19Amah sin chim ding bia cu
kan cawnpiak tuah ngat,
Kannih cu, zeizong vialte kha
a muih dih caah kan ruahnak
kan pumkhawl kho lo hi ta.
20Pathian cu, cu tik kha tikah
bia na chim awk a si,
tiah minung aho tal nih
an ti kho maw?
Thawng na thanh awk a si, tiah tah
nawl an pe kho maw?
21Voi khat cu ceunak cu hmuh khawh
loin a um,
Minmei le ruah nih khan an phenh;
22Cun thli a hung hrang i a chem hna i
chaklei in sui bantuk ceunak
a hung chuak;
Pathian cu ṭihnung lianhngannak in
aa thuam.
23Lianngan Bik cu kannih nih
kan hmu kho lo;
Amah a ṭhawnnak cu kannih nih
kan hngalh khawh leng a si,
A dinnak cu biading tuah awkah khan
a khul a nuar lo.
24Cucaah mi nih amah cu an ṭih;
Amah le amah ka fim, tiah
aa timi cu zei ah
a rel hna lo,” tiah a ti.
Currently Selected:
JOB 37: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006