1 SIANGPAHRANG 19
19
Elijah Kha Horeb Ah A Zaam
1Ahab nih Jezebel cu Elijah nih a tuahmi vialte kha le zeitindah vainam in profet vialte a thah hna ti kha a chimh. 2Cun Jezebel nih Elijah sinah cun lamkal pakhat a hei thlah i, “Na nunnak cu annih lak i pakhat nunnak bantuk ah khan thaizing atu tik caan i ka ser lo ahcun, cu bantukin le cu nak tam deuh zongin pathian hna nih cun ka cungah tuah ko hna seh,” tiah a ti. 3Khi tikah a thin a phang i a tho i a zam i Judah ta a simi Beersheba khua ah a phan, khika ah a sinum kha a chiah ta.
4Sihmanhsehlaw amah tu cu ramlak ah ni khat lamkal a kal i hmunphiah thingkung tangah a ra i a ṭhu; cun a thih nakhnga a hal i, “A za cang; atu cu maw Bawipa, ka nunnak kha la ko; zeitintiah ka pupa hna nakin ka ṭha hlei ṭung lo,” tiah a ti. #Jon 4.3 5Cun a it i hmunphiah thingkung pakhat tangah aa hngilh; cun zohhmanh, vancungmi nih a tawngh i, “Tho law ei tuah,” tiah a ti. 6Cun khua a hun zoh i, zohhmanh, a lu leiah lung lin in rawhmi changreu hlum hlum khat le ti thawl khat a hmuh. Cun a ei a din i a it ṭhan. 7Cun Bawipa vancungmi cu a voi hnihnak a ra ṭhan i a tawngh i, “Tho law ei tuah, na khual tlawnnak lam cu na celh sual lai lo,” tiah a ti. 8Cun a tho i a ei a din i cu rawl thazang cun ni sawm li le zan sawm li, Pathian tlang Horeb leiah cun a kal.
9Cun khika ah lungkua pakhat ah a phan i a riak; cun zohhmanh, Bawipa bia cu a sinah a ra i amah cu, “Elijah, hika ah hin zeidah na tuah?” tiah a ti. 10Anih nih, “Bawipa, ralkapbu Pathian cu ka ṭanh hringhran ko, zeitintiah Israel mi hna nih na biakamnak kha an hlawt i na biakṭheng kha an chimh hna i na profet hna kha vainam in an thah hna i keimah, keimah lawnglawng hi ka tang; cun keimah zong cu thah awkah an ka kawl,” tiah a ti. #Rom 11.3 11Cun anih nih a thawh i, “Chuak tuah, Pathian hmaiah tlang cungah va dir tuah,” tiah a ti. Cun Bawipa cu a lan i a thlichia a hrang ciammam i tlang cu a cheu i Bawipa hmaiah cun lung hna cu a khuai cikcek hna, sihmanhsehlaw Bawipa cu thli chungah cun a um lo; cun thli a hran dih cun li a hnin, sihmanhsehlaw Bawipa cu lihnin chung zongah cun a um lo; 12lihnin a dih cun mei a hung chuak, sihmanhsehlaw Bawipa cu mei chung zongah cun a um lo; cun mei a dih cun aw ṭhia aw dinte a hung chuak. 13Cun Elijah nih a theih tikah a puan in a hmai kha aa huh i a va chuak i lungkua luhnak ah cun a dir. Cun zohhmanh, aw pakhat kha a sinah a ra i, “Elijah, hika ah hin zeidah na tuah?” tiah a ti. 14Anih nih, “Bawipa, ralkapbu Pathian, nangmah, nangmah lawnglawng hi kan ṭanh zungzal; Israel mi tu nih cun nangmah he an biakam kha an hrawh i na biakṭheng kha an hrawh hna i na profet kha an thah hna. Keimah lawnglawng hi ka tang i keimah zong cu thah an ka zalh lengmang,” a ti. 15Cun Bawipa nih a thawh i, “Va kir law Damaskas ramlak leiah khan va kal tuah; cuka na phak tikah Hazael cu Siria siangpahrang si awkah chiti na thuh lai; #2Sia 8.7-13 16Cun Nimshi fapa Jehu cu Israel siangpahrang si awkah chiti na thuh lai; cun Abel-meholah khuami Shafat fapa Elisha kha nangmah changtu profet si awkah chiti na thuh lai. #2Sia 9.1-6 17Hazael vainam in a luatmi cu Jehu nih a rak thah hna lai; cun Jehu vainam in a luatmi cu Elisha nih a rak thah hna lai. 18Sihmanhsehlaw Israel chungah hin Baal hmai i a khuk aa bil lo i a hnamh zong a hnam lomi thong sarih kaa nganh hna lai,” tiah a ti. #Rom 11.4
Elisha Auhnak
19Cucaah khika khan a kal i Shafat fapa Elisha kha a hmai i cawtum tuah hleihnih he lei a rak thuan kha a hmuh, amah cu a tuah hleihnihnak sinah cun a rak um. Elijah cu a pawngin a lan i a puan khan a hei cheh. 20Cun a cawtum kha a kaltak hna i Elijah cu a dawi i, “Ka nu le ka pa va hnam ta hna ning law, cun kan zulh lai,” tiah a ti. Cun anih nih a thawh i, “Va kir ṭhan ko ngat, kan thlauh lo zeicahtiah na cungah zeidah ka tuah kha na hngalh,” tiah a ti. 21Cun amah zulhnak cun a kir i cawtum tuah khat cu aa lak i a thah hna i an sa cu caw lei thuannak thing cun a chuan i mi cu a pek hna i an ei. Cun a tho i Elijah kha a zulh i amah cu a rian kha a ṭuanpiak.
Currently Selected:
1 SIANGPAHRANG 19: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006