1 John 3
3
Pathian Tate
1Pa in ei sia bangza in hong it ziam tel tavun! Ama hong itna lian mama ahikom ei sia Pathian ii tate hong kici hi — tuabang takpi ma ih hi hi. Leitung in Pathian he ngawl ahikom leitung mite in ei hong he ngawl hi.#Jn 1:12 2Ka it lawmte awng, ei sia tu in Pathian ii tate ih hi hi, ahihang bang suak tu hi ziam ci in kician ngawl lai hi. Ahihang Christ hong kilaak ciangin eite sia ama taw kibang tu ih hi hunlam ih he hi, banghang ziam cile ama sia ahi bang tatakin ih mu tu hi. 3Christ sia thiangtho ahi bangma Christ sungah hi lametna a nei mihing peuma ama le ama a thiangtho in kikeam hi.
4A kuama po mawna khialna a vawt peuma in Pathian thukham paltan ahi hi, banghang ziam cile mawna ih ci sia in thukham paltanna ahi hi. 5Mawnate a la keak tu in Christ hong kilangh hi a, ama sungah mawna om ngawl hi ci in na he uh hi.#Jn 1:29 6Tua ahikom Christ taw kipumkhat a, a nungta peuma mawna zom suak nawn ngawl hi; ahihang a kuama po mawna vawt a zom suakte sia ama a mu ngeingawl ahibuale a he ngeingawlte ahi hi.
7Ka tate awng, kuama in theamsak heak vun! Christ sia thumaan thutang ahi bangma a kuama po thutangin a seamte sia thumaan thutang ahi hi. 8A kuama po mawna vawt a zom suakte sia Doaimangpa ii neisa ahi hi, banghang ziam cile a kipat pan ma, Doaimangpa in mawna vawt zo hi. Tua hang ma in Doaimangpa ngamtatna teng a susia tu tatak ma in Pathian Tapa hong kilangh hi.
9Pathian ta ahi peuma sia mawna vawt a zom suak bua hi, banghang ziam cile Pathian pianzia mama ama sungah om hi; tuaciangin Pathian sia ama Pa hi zo ahikom mawna vawt a zomsuak thei bua hi. 10Pathian ii tate le Doaimangpa tate kilaklaw ah, a kilamdanna in hisia ahi hi: thutangin a ngamta ngawl ahibuale ngual a it ngawl khat pawpo sia in Pathian ta ahi bua hi.
Khat le Khat na Ki it vun
11A kipat pan ma na zaak uh thu in: eite khat le khat ih ki it hamtang natu thu ahi hi.#Jn 13:34 12Eite Cain taw ih kibang buatu hi; ama sia Ngilo Pa ii neisa hi a, a suapuipa tatak Abel thatlum hi. Banghang Cain in ama thatlum ziam? Banghang ziam cile ama ii ngamtatnate sia maan ngawl a, a suapuipa ngamtatnate maan ahihang hi.#Pian 4:8
13Tua ahikom ka suapuite awng, leitung mite in no hong ensan le, lamdang na sa heak vun. 14Eite in ih suapuite it ih hi hu in, thina nusia a, nuntakna sungah theng zo ih hi hunlam ih he hi. Ngual a it ngawl peuma sia thina vaangletna nuai ah om lai hi.#Jn 5:24 15Ngualdang a ensan peuma sia mihing that hi a, mihing that khat in, ama sungah tawntung nuntakna nei ngawl hi ci in na he uh hi. 16Christ in eite atu a nuntakna hong piakna hangin eite in ki itna sia bang ziam ci in ih he hi. Tua ahiciang eite zongh, ih suapuite atu ih nuntakna ih piak ngam kul tu hi! 17A hau khat in a cimaw, a suapuipa kisapna mu napi hesuak ngawlin a en thong le Pathian ka it hi, bangbangin ci thei tu ziam? 18Ka tate awng, ih ki itna sia kam le muk bek ih hisak buatu hi; ngamtatna taw a kilangh ki itna takpi ahi kul hi.
Pathian mai ah Thin Hanna
19Tua ahikom thumaan thutak sungah ih om hunlam sia tu a bangin ih he tu hi; Pathian mai ah kimuanna ih nei natu sia hi bang teng hang ahi hi. 20Ih thinsung ah maw ih kisa le, eite ii ih thinsung kitelna sangin Pathian sia lianzaw a, ama in na theampo he siat hi ci in ih he hi. 21Tua ahikom ka it lawmte awng, ih thin sung ah kithasunna ih nei bua nale Pathian mai ah thinhanna ih nei hi. 22Ama thupiakte zui a, ama diksak bang ih ngamtat manin, ama tung pan ih nget pawpo ih nga hi. 23Ama hong thupiak sia bang ziam cile a Tapa Jesus Christ ih up tu le Christ ii hong thupiak bangma khat le khat ih ki it natu ahi hi.#Jn 13:34; 15:12,17 24A kuama po Pathian thupiakte a zui le ama sia Pathian taw kipumkhat in a nungta hi a, Pathian zongh ama taw pumkhat in nungta hi. Tuaciang Pathian hong piaksa Thaa hangin Pathian sia ei taw kipumkhatin nungta ahi hunlam, ih he hi.
Currently Selected:
1 John 3: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016