LUKAX 24
24
Yesux Deeh Kaoh Im
(Mat 28:1-10; Mak 16:1-8; Yo 20:1-10)
1Ka daux aliah singaix ngaix tix, yam bah riang praix cao cao, kix hoek ka simeeig mai viex sidah bhawng khankix, pa hoik cox khre kix heue. 2Kix yaox simaox hoik plu plie ti gah khaing simeeig an mai 3kix laig ka daux kix ang lai yaox tokaux yum Simiang Yesux heue. 4Yam daox deng kix ka grawng ceu an, pui ra kaux cung dex kix pa ceep kraung pa jiet pruh. 5Yam kix lhat mai num gup ngai tix ka tiex, kiex ah nin ka kix, “Kheu pex lai sawg Kaw pa im ju, ka sinax pui yum? 6Nawh ang ot tin, Nawh hoik kaoh heue. Doh keud ka lox pa hoik krai Nawh Cao ka pex, yam kawn ot Nawh ka daux meung Galilie, 7pa krai grawh grawng tak sang tawx Kawn kawn pui ka daux tawm taix pui phimap khankix mai tawk ka piang khaox lhak mai daux loe singaix tak sang deeh kaoh heue.#Mat 16:21, 17:22-23, 20:18-19; Mak 8:31, 9:31, 10:33-34; Luk 9:22, 18:31-33 8Kix doh keud ka lox Nawh Cao an 9mai deeh khaing simeeig mai krai grawh grawng ceu in khawmuik, ka kix kao tix kaux mai ka pa kawn deuk khawmuik heue. 10Kix pa krai grawh grawng ceu in khankix, ka kawncau pa ting khankix, mawh Marix Magadalax mai Yohannax mai Marix miex Yakop mai bun tang kaux khankix pa ot tau mai kix heue. 11Viang mawh nan kix ang yum rhawm ka lox bun khankix, kheu ce kix mawh lox nieb krai heue. 12Viang mawh nan, Petrux kaoh mai to hu ka simeeig an mai nom ti jhak ka daux mai nawh yaox ngie man paing khaing mai nawh daox deng ka grawng ceu pa hoik mawh an mai deeh ing ka nyiex tix heue.
Piang Krax Yaong Emawk
(Mak 16:12-13)
13Jhak heue, ka daux ngaix an ka daux kix ra kaux hu ka yaong pa kaux Emawk, pa singai khaing veng Yerusaliem dex aliah lhak. 14Kiex kum ka paox tix grawh grawng ceu pa hoik mawh an khawmuik heue. 15Yam kawn kum kiex chawk ka paox tix, tokaux Yesux hoek dex mai hu tau mai kiex heue. 16Viang mawh nan hoik yuh ngai kiex, yuh ka mawx son ang sang tawng ka Nawh Cao heue. 17Nawh Cao chawk ah nin ka kiex, “Lox kum pax ka paox tix, yam hu pax krax, mawh ceu pa yuh ka mawx?” Kiex yut ti kaog mai yuh awm pa voi rhawm tix heue. 18Ka daux kiex tix kaux, pa kaux Kalawphax, pawk lox ah nin ka Nawh Cao, “Maix mawh nyo pa ot ka daux veng Yerusaliem nong nong lie? Kheu ang Maix tawng grawh grawng ceu pa hoik mawh tan, ka daux bawg yam singaix in khankix” 19Nawh Cao chawk kiex ah nin, “Grawh grawng ceu pa yuh ka mawx?” Kiex deeh ah nin ka Nawh Cao, “Mawh grawh grawng Yesux, Pui Nazariet, pa mawh Cao jhai, pa ting sibrawm ka daux pa yuh mai ka daux gumlox, sivoe Siyiex mai kawn pui khawmuik heue. 20Grawng cao giex kaing li pa ting khankix mai simiang ex khankix, prawng ti tawx Nawh Cao kieh yum mai tawk Nawh piang khaox lhak heue. 21Viang mawh nan ex hoik keud hoik ce, Nawh mawh Kaw pa tak sang taoh ceu pui Isarelax heue. Mawh mai lheu khaing in khawmuik, khaix hoik mawh ceu in khankix, uik koe loe singaix heue. 22Lheu khaing an, bun tix blah daux cub ex, kieh ex daox deng kah heue. Kix hoik hu ka simeeig cao cao, 23yam ang kix yaox tokaux yum Nawh Cao, kix deeh hoek mai krai ka ex, grawh grawng hoik yaox kix riang susai kawncau Siyiex, pa krai ka kix, Nawh Cao klawd heue. 24Pui tix blah pa ot tau mai ex, hu ka simeeig an mai yaox awm pa hoik krai bun khankix, viang mawh nan kix ang yaox Nawh Cao heue.” 25Nawh Cao ah nin ka kiex, “Pui pa daox mai pa sivix tix yum rhawm, ka lox khawmuik, pa hoik krai cao jhai khankix eue, 26Khrit tak lai kham geu ceu in khankix mai khaix an laig ka daux min plakngai Nawh ang mawh lie?” 27Nawh Cao teei lox Phuk lai sigang khri khawmuik jah ka lai Mose, lai cao jhai khawmuik, plak tix nih nai krai lao grawh grawng tokaux tix heue. 28Kiex hoek dex ka yaong dee sang hu kiex mai Nawh Cao yuh awm Nawh sang baox hu, luan khaing heue. 29Kiex kieh raw Nawh Cao ah nin, “Ot tau mai yiex ha, kheu dex hoek bawg yam ponbo mai yam pon ngaix dex luan heue.” Nawh Cao laig ot tau mai kiex heue. 30Yam hoik ngawm neung Nawh Cao ti sawm tau mai kiex, Nawh Cao teei blah mai nawb bwan mai Nawh sivit blah an mai tawx ka kiex heue. 31Ngai kiex deeh blah mai kiex tawng nawh mawh Nawh Cao mai Nawh Cao grai khaing pa yaox kiex heue. 32Kiex ah nin ka paox tix, “Yam sikah Nawh Cao mai ax hawt krax mai plak ax mhong dee bleeh Phuk lai sigang khri, rhawm ax lulieh kah ang mawh lie?” 33Kiex kaoh ka bawg yam nari dom an mai deeh hu ka veng Yerusaliem mai kiex yaox kawncau kao tix kaux khrawm paox tix, pui pa ot tau mai kix, 34ah nin, “Simiang hoik deeh kaoh im tete mai hoik jhi tokaux tix ka Simon heue.” 35Kiex krai grawh grawng ceu pa hoik mawh, pa yaox kiex hawt krax mai grawng pa tawng kiex Nawh Cao, yam sivit Nawh blah heue.
Yesux Bleeh Ka Kawncau
(Mat 28:16-20; Mak 16:14-18; Yo 20:19-23)
36Yam kawn sikah kix grawh grawng ceu in khankix, tokaux Nawh Cao cung ka sinax kix mai ah nin ka kix, “Kieh pa nhim koe mai pex heue.” 37Viang mawh nan kix die lhat graung kah mai kix ce mawh yaox tix miang heue. 38Nawh Cao baox ah nin ka kix, “Pex sung sang rhawm yuh ka mawx? Pex keud jee keud blaong daux rhawm tix yuh ka mawx? 39Jhak ka taix Aux mai caong Aux ha. Mawh Aux heue. Giex ti yaox Aux, mawh kheu miang ang koe nex ang koe si-ang, awm pa yaox pex koe Aux. 40Khaix hoik ah Nawh Cao nan, Nawh jhi kix yaox taix tix mai caong tix heue. 41Yam kawn ang kix nyang yum rhawm, kheu gaux rhawm mai daox deng tix, Nawh Cao chawk kix ah nin, “Khex koe ceu pa ih pex tin tix ceu ceu lie?” 42Kix tawx kax tong tix siag, ka Nawh Cao, 43mai Nawh Cao teei ti ih sivoe kix heue. 44Nawh Cao baox ah nin ka kix, “Ceu in khankix mawh awm lox pa hoik krai Aux ka pex, yam kawn ot tau Aux mai pex, grawh grawng ceu in khankix khawmuik tak sang naog, pa hoik tiiem ti deuh grawh grawng Aux, ka daux lai been Mose mai daux lai cao jhai khankix mai daux lai yaogyaw heue. 45Yam an Nawh Cao paoh rhawm kix doh, yuh ka mawx sonsang tawng kix dee bleeh Phuk lai sigang khri heue. 46Nawh Cao baox ah nin ka kix, “Hoik tiiem ti deuh, grawng Cao Khrit tak kham geu #Isa 53:1-12mai deeh kaoh im khaing krax yum daux loe singaix.#Ho 6:2 47Grawng tak sang sidiex gau grawh grawng pa sang doh keud ka phimap mai krax pluat ploi ka daux ceu kaux Aux, jah ka veng Yerusaliem mai ka ceu pui khawmuik khawm leeing heue. 48Pex mawh pui pa kham mhai ruk grawh grawng ceu in khankix heue. 49Jhak heue, Aux sang ploi awm lox mukheu pa hoik tawx Keeing Aux, ka piang pex,#Cau 1:4 mawh kheu nan pex ot ka daux veng in, tom pon ceep pex sibrawm khaing dee long heue.”
Yesux Haok Piang Raoma
(Mak 16:19-20; Cau 1:9-11)
50Nawh Cao thong kix hu tom hoek dex yaong Betanix, Nawh yaog taix tix nawb bwan ka kix heue. 51Yam kawn nawb Nawh Cao bwan ka kix, Nawh Cao gwieh khaing kix mai viex Nawh haok ka piang raoma heue.#Cau 1:9-11 52Kix krub ka Nawh Cao mai gaux rhawm tix mai deeh ing ka veng Yerusaliem heue. 53Kix ot ka daux nyiex bwan jheung jheung mai yaogyaw Siyiex heue.
Currently Selected:
LUKAX 24: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012