LUKAX 21
21
Grawng Mau Tan Miexmai
(Mak 12:41-44)
1Nawh Cao yaog ti jhak mai yaox cao mi khankix sau pa tan kix, ka daux dee deuh mau heue. 2Nawh Cao yaox miexmai tix kaux pa hot sia, pa sau tawng raoh ra blah. 3Nawh Cao ah nin, “Aux krai lox pa mawh meh ka pex, miexmai pa hot sia in, hoik lheu sau khaing kix khawmuik heue. 4Kheu pui in khankix khawmuik, hoik sau khaing pa lheu kix, viang mawh nan bun in hoik sau khaing pa hot tix, pa koe sonsang im ju tix khawmuik heue.”
Grux Krai Grawng Sang Laux
(Mat 24:1-2; Mak 13:1-2)
5Yam krai pui tix blah grawng koe nyiex bwan an simaox pa mhawm mai pa tan, pa hoik cox mhawm grang, Nawh Cao ah nin, 6“Ceu in khankix pex tak yaox, bawg yam singaix tak sang hoek, pa tak ang yieh ti tik, tom pa ang simaox koe piang paox tix tix lon kawx, heue.”
Krax Kha Rhawm Mai Pa Tuktiak
(Mat 24:3-14; Mak 13:3-13)
7Kix chawk Nawh Cao ah nin, “Phan mawh nan, ceu in khankix tak sang mawh lai mawx? Yam tak sang dex mawh ceu in khankix, tak koe mhai pa yuh ka mawx?” 8Nawh Cao deeh ah nin ka kix, “Kheu son ang pui sang pon thong kieh pex lud, rien rhawm tix kah heue. Mawh kheu pui tom nie tak sang brex ti teei ceu kaux Aux mai hoek ti ah nin, Aux mawh Nawh heue. Mai bawg yam hoik hoek heue. Pex paw hawt khaix kix. 9Yam mhong pex grawng naing mai grawng krax simah simiang, paw kieh lhat kah mawh kheu ceu in khankix tak lai hoek ti mawh phao ka, viang mawh nan, ang nyang bax mawh, bawg yam sidah dom an heue.” 10Yam an Nawh Cao baox ah nin ka kix, “Pui tix ceu mai tix ceu, tix meung mai tix meung, tak cha paox tix, 11kla reem ting tak sang tuk, praix tak sang sibhawm, ceu pa saux preng, tak sang koe dee haoh dee mai tak sang koe ceu pa lhat graung, pa ting khaing raoma heue. 12Viang mawh nan, ka sivoe ceu in khawmuik, kix tak sang giex pex ka taix tix, tak sang tuktieak tukte pex, tawx pex ka nyiex sidiex khankix mai sau pex daux thawng, viex pex sivoe simiang khankix mai cao giex kaing haktiex khankix, kheu ceu kaux Aux heue. 13Ceu in khankix tak sang mawh mhai ruk ka grawng pex heue. 14Mawh kheu nan, kieh een ti tawng ka daux rhawm tix, son ang pex sang grux keud, grawng sang pawk lox yuh ka mawx. 15Aux tak sang tawx jheeh mai pingnya cuyi ka pex, pui pa koeng ka pex khawmuik, ang pon ti tieh thiang heue. 16Viang mawh miex keeing pex, puxaik, ru, paox grawm khankix kawx, tak sang teei ti tawx pex mai tak sang plaux pex yum tix blah heue. 17Mawh kheu ceu kaux Aux, pui khawmuik tak koeng ka pex heue. 18Viang mawh nan, hauk kaing pex tix gawng kawx tak ang laux leeing heue. 19Pex tak sang pon ti cie ju tokaux tix kheu kaux cong mai krax gun yeung.
Veng Yerusaliem Sang Laux
(Mat 24:15-21; Mak 13:14-19)
20“Yam yaox pex rob pui naing ka veng Yerusaliem, kieh tawng grawng pa dex sang laux veng an heue. 21Yam an kieh kix pa ot ka daux meung Yudax, to hu ka piang gawng khankix heue. Kieh kix pa ot ka daux veng an lih hu, kix pa ot daux tiagtu, paw kieh laig tan heue. 22Mawh kheu singaix an khankix, mawh bawg yam sang prawng ciyang ti kieh ceu pa hoik tiiem ti deuh khawmuik grum naog heue. 23Bun pa koe kaux mai bun pa tawx kawn tix peuex, ka daux bawg yam singaix an khankix tak kha rhawm heue. Grawh grawng nawh, tak sang koe pa ting kha rhawm ka haktiex in mai ceu pa song rhawm ka pui ceu in heue. 24Kix tak goh tak laux ka lawm vaig mai tak sang giex ti tuk kix hu, ku praix ku meung heue. Pui tang ceu tak sang dig veng Yerusaliem tiem, tom hoik naog bawg yam pui tang ceu khankix heue.
Yam Sang Deeh Hoek
(Mat 24:29-31; Mak 13:24-27)
25“Tak sang koe mhai ka daux singaix, khix, simuing khankix, ceu pui ka piang haktiex tak kha rhawm, ka daux krax daox deng, kheu lox sinum siaox, lox pukpak rawm sigrit sigra heue. 26Kawn pui kied lhat mai laux rhawm, kheu keud grawng ceu pa tak sang hoek lih ti mawh ka piang haktiex, mawh kheu sibrawm raoma khankix tak sang yung yiang heue. 27Yam an kix tak sang yaox Kawn kawn pui, viex sibrawm mai min plakngai pa ting, hoek ka daux paiawm heue. 28Yam jah ceu in khankix ti mawh, yaog kaing pex mai maong ti jhak heue. Mawh kheu dex hoek bawg yam sang taoh ka pex”
Grawng Khaox Ruh
(Mat 24:32-35; Mak 13:28-31)
29Nawh Cao krai lox tiag pa yuh nin ka kix, jhak ka khaox ruh mai khaox khawmuik. 30Yam glaoh lhax kix, pex yaox mai pie tokaux pex kawx, tawng grawng dex sang hoek yam rung praix heue. 31Awm an yam yaox pex ceu in khankix, kieh pex tawng mawh grawng dex sang hoek Meung Siyiex heue. 32Aux krai lox tete ka pex, pui ju in tak ang bax luan, tom ceu in khankix khawmuik, tak hoik mawh heue. 33Raoma mai haktiex tak sang grai, viang mawh nan, gum lox Aux in tak ang grai heue.
Rien Rhawm Pau Ti jhak
34“Rien rhawm tix ka tokaux pex, phan ang mawh nan, rhawm pex tak sivix tak cien kheu ceu pa nie luan yuh pex, pa yoek, ceu pa khi rhawm pa dex dawd mai ju in khankix, singaix an ha kox hoek piang pex yam ang pex keud ce sax, awm khlap rub heue. 35Mawh kheu tak sang hoek piang kix pa ot piang ca haktiex khawmuik awm an heue. 36Viang mawh nan, pex pau ti jhak ku bawg yam, rawg bwan, sonsang pon pex ti luan khaing ceu in khankix khawmuik, pa tak sang hoek ti mawh, sonsang pon ti cung sivoe Kawn kawn pui heue.” 37Nawh Cao sidiex gau ka daux nyiex bwan ku ngaix, Nawh hu it tum ka gawng pa kok mawh gawng Sanlun ku sawm heue. 38Yam ponngawb cao cao pui khawmuik hoek ka Nawh Cao sonsang nghiet lox bwan gaux rhawm khaing nawh daux nyiex bwan heue.
Currently Selected:
LUKAX 21: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012