Oseas 4
4
U ba'atel t'aan Yuumtzil yéetel u caajal
1Israelitaex, u'uye'ex ba'ax cu ya'alic Yuumtzil.
Leti'e' dzo'oc u cáajsic jun p'éel ba'atel t'aan yéetel u cajnáalilo'ob le múuch' caajo'oba',
tumen waye' bejela'e' mina'an jaaj óolal ichil máaco'oba', mix chuca'an óolal mix u kaj óolal ti' Kui'.
2Bejela'e' jela'an, máan tip'a'an cu yúuchul tuus ich jalach t'aan yéetel u ya'ala'al ba'al ma' jaaji', u quiimsa'al wíinic yéetel u yúuchul oocol, pak kebano' yéetel meyaj loob, cu yúuchul quíimsaj wíinic mina'an u xooquil.
3Le t o'olale' le múuch' caajo'oba' okom u yóolo'ob tu yo'olal quíimil;
luba'an u muuko'ob máaxo'ob caja'ano'obi';
u ba'alche'ilo'ob káax yéetel le ch'íich'o'obo' cu quíimilo'ob, bey xan u cayilo'ob le ka'anabo'.
Yuumtzile' cu taquic u pool le aj kiino'obo'
4Yuumtzile' cu ya'alic:
¡Mix máac u najmal u tac poltic mix u keyic u láak!
In ba'atele' chéen ta wéetel, aj kiin.
5Teche' bíin lúubuquech chúumuc kiin,
yéetel áakabe' bíin lúubuquech xan
bíin lúubuc ta wéetele' le aj bóobato',
teche' bíin in xu'ulsech.
6In caajale' mina'an u kaj óolal, le t óolal dzo'oc u ch'éejsa'al.
Ti' teech aj kiin, ma' ta wóoltaj le kaj óolalo',
le t o'olale' quin tzeliquech ti' in aj kiinil.
Bey tumen ta tu'ubsaj u ca'anbesajo'ob a Kue',
tene' bíin in tu'ubs a ch'i'ibalo'ob.
7Je'el bix u bin u ya'abtal ca'ach le aj kiino'obo',
bey ca'ach u bin u ya'abtal u kebano'ob tin táan;
le t o'olale' u tziiquile' bíin in kex yéetel subtzilil.
8Cu tzéenticuba'ob yéetel u keban in caajal;
le t o'olale' cu yaayantico'ob ca kebanchajac in caajal.
9Je'el bix in caajale' bey aj kiino'ob,
bíin in jadzo'ob tu yo'olal u kaakas cuxtalo'ob.
10tu yo'olal dzo'oc u p'atico'ob u meyajtico'ob Yuumtzile',
bíin janaco'ob ba'ale' ma' bíin na'ajchajaco'obi';
bíin weeyannaco'ob, ba'ale' ma' bíin yanac u paalalo'obi'.
Le israelitaobo' cu kultico'ob beetitbil kuob
11Cáacbachil yéetel u yu'ukul vinoe' cu beetic u sa'atal u yóol wíinic.
12In caajale' cu káat chi' ti' kuob beeta'ano'ob yéetel che';
jun cáach che'e' cu meyaj ti'ob u ti'al u na'ato'ob.
In caajale' pa'an u muuk tumen le weeyanquilo'
in caajale' cu xíimbal ti' keechel bejo'ob;
cu kebanchajal iquil u xúump'attic u Ku.
13Ti' ca'anal pu'uco'ob yéetel tu yóokol jo'ol lu'umo'obe'
cu tóoquico'ob poom yéetel cu kubico'ob quíimsbil ba'alche'ob,
bey xan tu ma'alob bo'oy béec, tu bo'oy cóopo', tu bo'oy laurel.
Le t o'olal dzo'oc u kastalo'ob a x ch'upul paale'ex, bey xan a wilibo'obe' cu pak kebano'ob.
14Ba'ale' tene' ma' bíin in jadz a x ch'upul paalale'ex tu yo'olal u weeyanquilo'obi'
mix a wilibe'ex tu yo'olal u pak kebano'ob,
tumen te'exe' láili' ca bine'ex yéetel le x cáacbacho'obo';
ca nupicaba'ex u ti'al a kubique'ex quiimsbil ba'alche'obe',
ca nupicaba'ex yéetel co'olelo'ob cu cáacbachilo'ob bey jun p'éel kultajile'.
¡Bey u lúubul jun p'éel caaj mina'an u na'ato'!
15Wa teech Israel ca kastale', quexi' Judae' ma' u kebanchajal.
¡Ma' a bine'ex Gilgal mix a na'acale'ex Bet-avén,
mix a jalach t'aane'ex tu yo'olal u cuxtal Yuumtzil!
16Israele' j ma' tzict'aan bey jun túul ko'ox x ja'aben wacaxe';
quex beyo', ¿bíin u canant Yuumtzil ichil qui'ichquelem su'uco'obo',
óoli' bey u cananta'al mejen j tamano'obe'?
17-18Efraine' dzo'oc u kubicubáa u kult beetbil kuob.
¡Tuláacalo'ob j lúubo'ob beyo'ob u múuch'ul cala'ano'obe'!
Bin u bin u kastalo'ob, u yóoltico'ob sublaquil, ti' tziiquil.
19¡Jun p'éel u pictaj iik bíin nup'ic u xiiko'ob,
bíin xan u ch'a'ob subtal tu yo'olal u kultajo'ob!
Currently Selected:
Oseas 4: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992