Hechos 27
27
Pabloe' cu túuxta'al Roma
1Le ca tu tucultajo'ob u túuxtico'ob Italiae', Pablo yéetel le u láak máaxo'ob kala'ano'obo' j ku'ubo'ob ti' jun túul náacom, Juliou kaaba', lela' ti' yaan tu múuch'ul le soldado'ob cu kaaba'intic Augusto'. 2J oocon túun ti' jun p'éel cheem tu jáal ka'anabil Adramitio, tumen ta'itac u j óokol u binbal tu jáal ka'anabil Asia, ti' yaan xan ticnal Aristarcoe', máax Macedoniail, Tesalónica u caajal. 3Tu jeel kiine' j kucho'on tu puertoil Sidón. Te'ela' Julioe' tu beetaj utz ti' Pablo, tumen tu cha'aj u xíimbaltic u amigo'ob yéetel ca táan óolta'ac tumeno'ob. 4Le ca j ooco'on Sidone' t p'ataj Chipre x dzíic kabil tumen actáan yanilo'on ti' le iiko'. 5T ch'a'aj le ka'anab actáan ti' Cilicia yéetel Panfiliae' ca j kucho'on tac Mira, jun p'éel u caajil Licia.
6Te'elo' le náacomo' tu yilaj jun p'éel cheem Alejandríail táan u bin Italiae', ca tu beetaj c oocoli' u ti'al c bini'. 7Tu yo'olal dze'edzec kiino'ob j bino'on cháambelil, yéetel istiquiail kuchico'on tac Gnido. Tumen láili' actáan yanil to'on le iiko', j máano'on actáan ti' Salmón, táan c bakpachtic u petenil Creta. 8Istiquiail binico'on naadz chi' ka'anab ca j kucho'on tac jun p'éel cúuchil cu kaaba'intic Buenos Puertos, naadz ti' u caajil Lasea.
9Ya'ab kiino'ob chéen bey máanico'obo', tu chi' quíimil xan u bin máac yóokol ka'anab, tumen táan u náadzal u kiinil que'elil. Le o'olale' Pabloe' tu tzolaj u xiquino'ob, 10táan u ya'alic: Tatiche'ex, quin wilique' le iquil c bine'exa' jach sajbe'entzil, tumen je'el u páajtal u búulul le cheema' bey xan u cuuch, yéetel je'el u páajtal c búulul tac to'one'.
11Ba'ale' le náacomo' tu dzaj xiquintaj ti' ba'ax tu ya'alajo'ob u yuumil yéetel u nojochil le cheemo' ti' le ba'ax tu ya'alaj Pabloo'. 12Tumen le puerto tu'ux yano'ono' ma' ma'alob u ti'al u máansa'al u kiinil que'elili', óoli' tuláacalo'ob tu tucultajo'ob u lukulo'ob te'elo', u ti'al u yilico'ob wa cu páajtal u kuchulo'ob tac Fenice, jun p'éel u jáal ka'anabil Creta, cu paacat j xaman j chikin yéetel j noojol j chikin, u ti'al u máansico'ob u kiinil que'elil te'elo'.
Le chac ikal te j ka'anabo'
13Tumen jo'op' u yustaj jun p'éel u cháambel iikil noojol; ca jóok u binbalo'ob, tu tucultajo'obe' je'el u páajtal u bino'obe'. Jóoko'ob túune' ca j bino'ob naadz tu jáal u lu'umil Creta. 14Ma' xáanji'e' ca jo'op' u ja'adzal le cheem tumen jun p'éel ka'amcach iik, u kaaba'e' j xaman j lakin iik, 15cáaj túun u bisic le cheemo'. Tumen ma' páajtchaj c bin ti' actáan le iiko', yanji c p'atic u bisico'on. 16J máano'on tu paachil jun p'éel chan peten Claudia u kaaba', tu'ux ma' jach ka'an le iiko', jach istiquia' páatji t na'acsilac u chan cheemil tocsajil, le cu jíiltic paachilo'. 17Cu dzo'ocol c na'acsic ti' le cheemo', tu kaxo'ob suumo'ob uti'al u dzáico'ob u muuk le cheemo'. Cu dzo'ocole' tu yo'olal sajaco'ob ca xi'ico'ob ocol tu cabalil le ja' cu kaaba'inta'al Sirteo', tu yéemsajo'ob u nookilo'ob le cheemo' ca tu cha'ajo'ob u bisa'alo'ob tumen le iiko'. 18Tu jeel kiine' tumen láili' ka'am le chac ikalo', jo'op' u pulico'ob j ka'anab u cuuch le cheemo'. 19Tu yóox p'éel kiine', yéetel c kabile' t pulaj ka'anab u ba'aluba'ob le cheemo'. 20Ya'abcach kiino'ob ma' t ilaj mix le kiino' mix le eeko'obo', tu yo'olal xan le nojoch chac ikal jadzico'ono', dzo'oc c luksic ti' c tuucul wa je'el u páatal c cuxtal.
21Tumen dzo'oc u máan ya'abcach kiino'ob ma' jaanco'oni', Pabloe' wa'alaj chúumuc ti'obe' ca tu ya'alaj: Tatiche'ex, ma'alob ca'ach ca a wu'uye'ex ca'ach in t'aan, u ti'al ma' c jóokol Creta, beyo' ma' táan c mukyajtic ca'ach le loob yéetel le yaayaj óolala'. 22Ba'ale' beoraa' ma' u lúubul a wóole'ex, tumen mix jun túul ti' te'ex cu bin quíimili', quex yaan u búulul le cheema'. 23Tumen ti' le áakaba' j chíicpaj teen jun túul ángel, túuxta'an tumen Ku máax ti'altiquen leti' xan quin meyajtic. 24Le ángelo' tu ya'alaj teen: Pablo, ma' a ch'a'ic sajaquil, tumen yaan a wantal tu táan César tu caajil Roma, ta wo'olale' Kue' yaan u toquic ti' quíimil tuláacal le máaxo'ob yano'ob ta wéetel ti' le cheema'. 25Bey túuno', tatiche'ex, yanac a wóole'ex, tumen tene' quin wocsaj óoltic Yuum Ku yéetel jach in wojel bey cun úuchul je'el bix tu ya'aljilac teen le ángelo'. 26Ba'ale' yaan c pu'ulul ti' jun p'éel peten.
27Jun p'éel áakabe', cu dzo'ocol u máan ca'a p'éel winale' táan c bine', ti' yano'on ti' u ka'anabil Adrian táan c yúunta'al tumen le iiko', míin chúumuc áakabe' u j meyajilo'ob le cheemo' tu yilajo'ob táan c náadzal ti' lu'um. 28Tu p'isajo'ob le ja'o' ca tu yilajo'obe' yaan veinte u sáapal; jun p'íit táanile' tu p'isajo'ob tu ca'a téene' ca tu yilajo'obe' yaan quince u sáapal. 29Tumen sajaco'ob u kolcubáa le cheem ti' le tuunicho'obo', ca tu pulajo'ob ca'a p'éel anclaob tu paach le cheemo', cu dzo'ocole' yéetel sajaquilil tu pa'atajo'ob u sáastal. 30Ca'aliquile' u j meyajilo'ob le cheemo' tu tucultajo'ob u púudzulo'ob ti' le cheemo'; u ti'al u beetico'ob lelo' jo'op' u jalkesico'ob ka'anab u chan cheemil le tocsajilo', táan u beetico'ob bey bin u ca'aj u pulo'ob le anclaob táanil ti' le cheemo'.
31Ba'ale' Pabloe' tu t'anaj le náacomo' yéetel le aj ba'atelo'obo' ca tu ya'alaj ti'ob: Wa le máaco'ob ma' tu p'áatalo'ob ti' le cheema', ti' te'exe' ma' tu bin te'ex utzil.
32Le aj ba'atelo'ob túuno' tu xotajo'ob u chan suumille chan cheemo' ca tu cha'ajo'ob u lúubul ichil u ja'il le ka'anabo'.
33Táan u taal u sáastale', Pabloe' tu kubentaj ti' tuláacalo'obe' ca u jaanto'ob wa ba'ax, ca tu ya'alaj: Dzo'oc ca'a p'éel semana ma' weenque'exi' mix jaanque'exi'. 34Quin káat óoltic te'ex ca a jaante'ex wa ba'ax. Lela' kabéet u ti'al ca cuxlaque'ex, tumen mix jun túul cu bin u sat mix u tzo'otzel u pooli'.
35Le ca tu ya'alaj lela', Pabloe' tu ch'a'aj tu kab jun p'éel waaje' ca tu dzaj nib óolal ti' Ku tu táan tuláacalo'ob. Tu xet'aj túune' ca jo'op' u janal. 36Cu dzo'ocole' tuláacalo'ob yanji u yóolo'obe' ca jaano'ob xan. 37Tuláacal le yano'ob ti' le cheemo' yaan docientos setentaiseis máaco'ob. 38Cu dzo'ocol u jaantico'ob je'el buca'aj u káato'obe' tu pulajo'ob te ka'anab le trigo u ti'al u sáalcuntico'ob le cheemo'.
Cu búulul le cheemo'
39Le ca j sáaschaje', u j meyajilo'ob le cheemo' ma' tu kajóoltajo'ob le lu'umo', ba'ale' tu yilajo'ob jun p'éel cúuchil tu'ux yaan u jáal jun p'éel ka'anabe' ca tu tucultajo'ob u yilico'ob wa cu páajtal u nadzico'ob le cheem te'elo'. 40Tu xotajo'ob u suumil le anclaobo' ca tu p'atajo'ob te j ka'anabo', ca tu jáalkabtajo'ob u suumil iquil u kaxmilo'ob u nu'ucul u tojtáantico'ob le cheemo'. Tu líiksajo'ob túun ti' iik le u nookil le chéen yaan táanilo' ca jo'op' u náadzal le cheem te j lu'umo'. 41Ba'ale' j kuch ti' jun p'éel cúuchil tu'ux yaan ca'a p'éel áalcab ja'ob, ca j dzóop le cheem te j sa'am lu'umo'. U ni' le cheemo' j dzóop te j sa'am lu'umo', ca p'áat ma' tu páajtal u péec jun puli, yéetel u paachil le cheemo' jo'op' u xe'exet'pajal tu yo'olal u muuk u cuclil le ja'o'. 42Le aj ba'atelo'ob túuno' tu yóoltajo'ob u quiimso'ob le j kalbil máaco'obo' u ti'al ma' u púudzulo'ob báabil. 43Ba'ale' u náacom le aj ba'atelo'obo', tumen tu yóoltaj u toc Pabloe' ma' tu cha'aj ti'obi', ba'ale' tu ya'alaje' le máaxo'ob u yojelo'ob báabe' u puljuba'ob táanil ichil le ja'o' u ti'al u chuquico'ob lu'um, 44le u láako'obo' ca xi'ico'ob yóokol che'ob wa u xéexet'al le cheema'. Bey úuchic u láaj chuquico'ob lu'um yéetel utzo'.
Currently Selected:
Hechos 27: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992