MARKUS 7
7
Tundu ngu adati manga i upung
(Mat. 15:1-9)
1Manga taumata ngu Farisi singgapang l᷊au i sire pirangkatau meteri agama bou Yerusalem, nusumongo si Yesus. 2I sire nakawua manga tumatuhu I Yesus pirangkatau kakange dingang u l᷊ima makotori kere tuntukang u agama, mangal᷊enge ta nanguhasi l᷊ima horo tumuhu atorang u agama.
3Taumata ngu Farisi, kere'e l᷊ai tau Yahudi, i sire mararingihi kahingang tumuhu adati i upung i sire. I sire ta kumang, boko mborong ta manguhasi l᷊ima tumuhu atorang ko nitantu. 4Manga apang ko nil᷊uangeng su pasari mborong ta kanengang, boko ta uhaseng horo.#7:4: Apa ko nil᷊uangeng su pasari …, suhorou niuhasi kahorokange: arako l᷊au boko mapul᷊e bou pasari i sire l᷊ai ta kumang boko ta muhoro mamursi watangenge. Dang maul᷊i l᷊ai atorang ko wal᷊inge bou i upung i sire ko nihinggonang i sire matoghasi, kere atorang manguhasi galasi, wohosi, l᷊au manga sal᷊iumpuhi bou witu.#7:4: Su l᷊al᷊ung u wohe horo pia manga didato: dang l᷊al᷊okang.
5Ual᷊ingu e'e manga tau Farisi l᷊au manga meteri agama e'e nukina si Yesus. “Nakurawe manga tumatuhu-U e'e nukumang dingang u l᷊ima ta niuhasi? Nakurawe i sire ta nutumuhu adati upung i kite?”
6 #
Yes. 29:13
I Yesus nusumimbahi, “I kumu manga taumata ko tal᷊umpangki! Mang nuhino apang ko niul᷊i i Yesaya bou hal᷊i i kumu,
‘Mawu Ruata nuhengetang kiri'i,
Manga umati e'e kitang manumba si Sia dingang u didato,
arawe naung i sire marau ngu Ia.
7Takoae mangal᷊enge i sire manumba si Sia,
watu'u atorang u taumata itintiro ngi sire
kere kakakoa u atorang-Ku!’
8Apang parenta ngu Mawu Ruata ta pandungang i kumu, dang apang atorang u taumata hinggonang i kumu mapia-pia.”
9Bou e'e I Yesus nangul᷊i l᷊ai, “Kere'e kapandenge i kumu mutiho u parenta ngu Mawu Ruata tadeau ta mamilo tintiro ngi kumu. 10#Sasu. 20:12, 21:17; Im. 20:9; Sau. 5:16I Musa seng nuparenta ngu i'i, ‘Pangadati si papangu l᷊au si mamangu,’ dang ‘I sai-sai musughal᷊i si papange l᷊au mamange, mambeng ihukung pakapate.’ 11Kateho i kumu manintiro, boko taumata mudidato su ghaghurange, ‘Apang daku ionggo si papa l᷊au si mama, seng mbuae daku nisumba su Mawu Ruata,’ 12Kuteu i kumu nupakal᷊iu taumata e'e bou tanggongange mutul᷊ung i papa nge sire rua ngi mamange. 13Inau bou tintiro ngu sisane ko itintiro ngi kumu su manga taumata, i kumu mupakailang u hengetang u Mawu Ruata. Mborong maul᷊i hal᷊i ko kiri'i ko koateng i kumu.”
Hal᷊i ko makal᷊amuhu taumata
(Mat. 15:10-20)
14Bou e'e sau paghisa I Yesus nukui taumata maul᷊i e'e dang nangul᷊i si sire, “pundaringihiko tadeau makahingang! 15Takoae manga apa bou l᷊ikuri ko mataho su taumata makal᷊amuhu taumata. Su l᷊ikuri e'e, ko mal᷊ua bou singkatau, e'e makal᷊amuhu si sie. 16[Inau, boko pia tul᷊i, pundaringihiko.]”
17Su tempo ngi Yesus nanintang u taumata maul᷊i e'e dang nusumu su l᷊al᷊ung u wal᷊e, manga tumatuhu-E nukina si Sie mangal᷊eng u papinintu e'e. 18Kuteu I Yesus nuwisara si sire, “Apa i kumu mang mborong ta nakahingang? Apa i kumu ta makahingang himoneu ko sumu su singkatau ta makal᷊amuhu taumata e'e? 19Watu'u ko sumu e'e ta mataho su naung, kateho nataho su tiang, mbuhue sau sumuwang.” Dingang u e'e I Yesus nul᷊ahe himoneu kaul᷊i u puwawiahi takoae ko dal᷊ai.
20Bou e'e I Yesus sau nangul᷊i, “Ko sumuwang bou taumata, ko e'e makal᷊amuhu si sie. 21Watu'u bou l᷊al᷊unge, mangal᷊enge bou l᷊al᷊ung u naung, l᷊umitou sipirang ko dal᷊ai ko makakoa taumata mal᷊amuhu, manako, mamate, 22mawuang, mul᷊eo, muhinakang, dang mukoa kaul᷊i u apang ko dal᷊ai, manganggang, takoae adati, mananoi, maoboti dang ta kal᷊ahabareng. 23Kaul᷊i u apang ko dal᷊ai e'e nutumimbul᷊i bou l᷊al᷊ung u naung, dang e'e makal᷊amuhu taumata.”
Pangangimang u singkatau kowawine
(Mat. 15:21-28)
24Bou e'e I Yesus nanintang u tampa e'e, dang nakoa sarang soa masandighi u Tirus. I Sie nusumu su wal᷊e simbau dang mutiho mandiri pia taumata ko matitong I Sie ko ene su se'e. Kateho I Sie mang ta nakapamuni ngu badange. 25Pia ghaghurang kowawine simbau, anae kowawine nikasukang u roh ko dal᷊ai, nakaringihi si Yesus. I sie nusumongo sarang koa I Yesus dang nusuba su saruang-E, 26dingang nundo si Yesus panguseri roh ko dal᷊ai bou anae e'e. Ko wawine e'e wal᷊inge tau Yahudi, ko nipahinding su Fenisia su wanua ngu Siria. 27I Yesus nangul᷊i si sie, “Manga rario mambeng ipakang horo. Dal᷊ai mangal᷊a kang u manga rario tadeau iteleri su kapuna.”
28Ko wawine e'e nusumimbahi, “Tuang, manga kapuna su al᷊ung u meda mang l᷊ai kumang l᷊emo u kang ko irume u manga rario!”
29Bou e'e I Yesus nangul᷊i si sie, “Ual᷊ingu sasimbahiu e'e dakoe kapul᷊e, roh ko dal᷊ai e'e seng nusumuwang bou ana u!”
30Ko wawine e'e napul᷊e. Su wal᷊e i sie nakahombang anae kal᷊al᷊oka su l᷊al᷊okang, dang roh ko dal᷊ai tinga-tingari seng tarie bou ana e'e.
I Yesus nupakaul᷊e ngu singkatau ko bobo, dingang ko wenggeli
31Bou e'e I Yesus nanintang wanua ngu Tirus, nanurusi l᷊al᷊al᷊engang-E, nul᷊umiu Sidon sarang rano Galilea. I Sie nutumuhu l᷊al᷊eng bou tampa Soa Mapul᷊o. 32Su se'e taumata numbawa sarang koa I Yesus singkatau ko bobo l᷊au ko wenggeli. I sire nundo si Yesus pamilo u l᷊imange su tau e'e. 33I Yesus numbawa tau e'e nihae sisanenge bou taumata maul᷊i, mbuhue namilo tal᷊imboro-Nge su tul᷊i ngu taumata e'e dua mbuka. Bou e'e I Yesus nanguru dang namilo u l᷊ima-Nge su lila ngu tau e'e. 34Bou e'e I Yesus nutumingara sarang l᷊angi, wuhue nusuminda mal᷊al᷊ung dang nangul᷊i su tau e'e “Efata,” mangal᷊enge “Kawukate!”
35Tul᷊i ngu tau e'e nal᷊oahi dang lilange sau nasikome, dang i sie seng nanita makadidato mapia. 36Bou e'e I Yesus nularang si sire kaul᷊ie muwuke ngu hal᷊i e'e si sai-sai. Kateho manamba I Yesus mularang, i sire kasaunge l᷊ai muwuke. 37Dang maul᷊i manga taumata ko nakaringihi e'e naherang. I sire nangul᷊i, “Kaul᷊i-ul᷊ie seng nikoa-E pakapia! Nangilebe l᷊ai I Sie nukoa taumata ko wenggeli nakaringihi dang tau bobo nakadidato!”
Currently Selected:
MARKUS 7: PLT
Highlight
Share
Copy
Want to have your highlights saved across all your devices? Sign up or sign in