MARKUS 2
2
I Yesus nupakaul᷊e ngu taumata ko kesohi
(Mat. 9:1-8; Luk. 5:17-26)
1Su kapira l᷊ounge bou e'e I Yesus nusul᷊e sarang Kapernaum kuteu seng nawombeng habari I Sie ko seng ene su wal᷊e. 2Bou e'e taumata napene nusumongo. I sire nul᷊ahumbung pai se'e sarang seng takoae l᷊oahi. Su mohong u tukari napene u taumata. Bou e'e I Yesus nangul᷊i u habari bou Mawu Ruata si sire. 3Su tempo ngi Sie mborong kadidatonge, pia i sire pa kaputatimbang u singkatau ko kesohi sarang koa I Yesus. 4Kateho ual᷊ingu kaul᷊i u taumata, i sire ta makasandighi sarang sindihang-E. Inau i sire nul᷊ekesi atu u wal᷊e su saruang I Yesus. Bou e'e taumata ko kesohi e'e niul᷊uhi sire dingang u tupihi. 5Suapang I Yesus nakawua pangangimang i sire kere'e kal᷊aboe, I Sie nudidato su taumata ko kesohi e'e, “Ana-Ku, apang dosa ngu seng niampungang.”
6I sire pira meteri agama ko kakangiang su se'e nanita nukina su l᷊al᷊ung u naung, 7“Taumata i'i wahani kahingang mudidato kere'e I Sie nuhinakang Mawu Ruata. I sai makaampung dosa, su l᷊ikuru Mawu Ruata sisane?”
8Su tempo e'e l᷊ai I Yesus seng matitong naung i sire. Bou e'e I Sie nangul᷊i, “Nakurawe i kumu nukina kere'e su l᷊al᷊ung u naung i kumu? 9Sude'e mal᷊owokang: mudidato ngu, ‘Dosa ngu seng niampungang,’ arako mudidato ngu, ‘Wangungte, hengke'e wawila u dang l᷊al᷊engte?’ 10Arawe orasi i'i Ia sarung mupakal᷊ahe si kumu himoneu su wawo u dunia i'i Ahusi Taumata pia kawasa makaampung dosa.” Bou e'e I Yesus nangul᷊i su taumata ko kesohi e'e, 11“Wangungte, hengke'e tupihiu dang kapul᷊e'e!”
12I sie dingang nuwangung dang nangal᷊a tupihie bou e'e nusumuwang tuhungang i sire kaul᷊ie. Manga taumata e'e naherang bou e'e nundalo Mawu Ruata. Angkung i sire, “Mborong ta paghisa i kite nakawua hal᷊i ko kiri'i!”
I Yesus nukumui si Lewi
(Mat. 9:9-13; Luk. 5:27-32)
13I Yesus sau nusul᷊e sarang apeng u Rano Galilea. Maul᷊i taumata nusumongo sarang koa-E, l᷊au I Sie nanintiro si sire. 14Tintal᷊a I Yesus kal᷊al᷊enge su se'e, I Sie nakawua tau mananuntu balasteng arenge i Lewi ana i Alfeus, ko kakangiang su kantori u Balasteng. I Yesus nangul᷊i si sie, “Tuhue si Sia.” i Lewi nurumarisi dang nutumuhu si Yesus.
15Su tempo I Yesus mborong kakange su wal᷊e ngi Lewi,#2:15: su wal᷊e ngi Lewi: arako su wal᷊e-Nge (e'e ko wal᷊e ngi Yesus) maul᷊i taumata mananuntu balasteng l᷊au manga taumata ko wawuang kal᷊al᷊aikange su tampa e'e nukumang singkahindo dingang I Yesus l᷊au manga tumatuhu-E. Watu'u seng maul᷊i bou tal᷊oara i sire nutumuhu si Yesus. 16I sire manga pirangkatau meteri agama bou taumata ngu Farisi nakawua si Yesus kakange dingang u manga mananuntu balasteng l᷊au manga taumata ko wawuang kal᷊al᷊aikange e'e. Inau i sire nukina su manga tumatuhu I Yesus, “Nakurawe meteri kumu nukumang dingang u manga taumata mananuntu balasteng l᷊au manga taumata ko dal᷊al᷊ai e'e?”
17I Yesus nakaringihi kakina i sire e'e, I Sie nusumimbahi, “Taumata matoghasi ta mundea dokter, kitang apang ko masaki. Ia nusumongo wal᷊inge tadeau mundea taumata ko makitika badange ko mapia, kitang taumata ko itika u taumata ko dal᷊ai.”
Hal᷊i u puasa
(Mat. 9:14-17; Luk. 5:33-39)
18Pia singkatempo tumatuhu i Yohanes Mananahani l᷊au tau Farisi kapupuasange. Bou e'e pia taumata nusumongo sarang koa I Yesus l᷊au nukina, “Nakurawe tumatuhu i Yohanes Mananahani l᷊au tumatuhu tau Farisi kapupuasange, arawe tumatuhu i Tuang ta?”
19I Yesus nusumimbahi, “Su sal᷊iwang kawing, apa manga sake su tampa e'e ta kumang? Boko pardegong mborong ene dingang i sire tantu i sire mang kumang. 20L᷊au sarung pia temponge pardegong e'e al᷊akeng bo i sire, su tempo e'e mbuhue i sire ta kumang.
21Takoae taumata ko manampeli l᷊aku ko tuwei dingang u heka ko wuhu simpoto. Watu'u heka tatampeli e'e mang kumoho dang makaghehe l᷊aku e'e, hakiu kasaunge mal᷊abo gehe'e. 22Kere'e l᷊ai takoae taumata ko manuang anggori ko wuhu su tampa ko tuwei. Ntihang anggori ko wuhu e'e sarung makawuka tampa ko tuwei e'e. Panginsuenge kaul᷊ie mawoso. Anggori ko wuhu mambeng l᷊ai itaho su tampa ko wuhu!”
Kakina u l᷊ou ngu Sabati
(Mat. 12:1-8; Luk. 6:1-5)
23 #
Sau. 23:25
Su l᷊ou ngu Sabati, tempo I Yesus nusumahe su awuhi gandung simpalang, manga tumatuhu-E nanita nanipo gandung. 24Bou e'e manga tau Farisi nangul᷊i si Yesus, “Nakurawe manga tumatuhu-U nul᷊umawang atorang u agama ngi kite, l᷊au nukoa apang ko nilarang su l᷊ou ngu Sabati?”
25-26 #
1Sam. 21:1-6
#Im. 24:9I Yesus nusumimbahi, “Apa i kumu mborong ta nubasa apang ko nikoa i Daud, su tempo ngi Abyatar kapukoae hal᷊ie kere imam ko mawantughi. Su tempo ngi Daud l᷊au manga taumatange nahutung, l᷊au takoae kang, i sie nusumu sarang Wal᷊e ngu Mawu, l᷊au nukumang boroti ko l᷊inau bou nisumba su Mawu Ruata. Boroti e'e l᷊ai nionggoe su manga taumata nge. Sumbal᷊i tumuhu agama ngi kite, kitang u manga imam botonge kumang boroti e'e.”
27Bou e'e I Yesus sau nangul᷊i, “L᷊ou ngu Sabati nikoa guna ngu taumata, wal᷊ingewe taumata guna ngu l᷊ou ngu Sabati. 28Inau, Ahusi Taumata makawasa, kere'e l᷊ai su l᷊ou ngu Sabati.”
Currently Selected:
MARKUS 2: PLT
Highlight
Share
Copy
Want to have your highlights saved across all your devices? Sign up or sign in