MARKUS 10
10
I Yesus nanintiro hal᷊i u pusasindo
(Mat. 19:1-12; Luk. 16:18)
1Bou e'e I Yesus nanintang u tampa e'e, dang natamai sarang Yudea l᷊au wanua su simbuka ngu sal᷊uhi Yordan. Taumata maul᷊i sau nusumongo nul᷊ahumbung si Yesus. Dang kere biasange I Yesus nanintiro si sire.
2Pira ngkatau tau Farisi nusumongo l᷊ai tadeau mundea pusansal᷊a ngi Yesus. I sire nukina, “Tumuhu atorang u agama ngi kite, apa botonge taumata manindo kawinge?”
3I Yesus nusumimbahi, “Apa parenta nionggo i Musa si kumu?”
4 #
Sau. 24:1-4; Mat. 5:31 Sasimbahi sire, “I Musa nupakawala ngu taumata pusindo kawinge, asal᷊i mambeng mukoa surati talaki horo.”
5I Yesus nangul᷊i si sire, “I Musa namohe u parenta e'e, watu'u i kumu tumaniu makitihi tintirong.” 6#Kar. 1:2, 5:2“Arawe mborong bou titae, su tempo ngu Mawu Ruata nundiadi taumata, seng kal᷊ahabari, ‘Mawu Ruata nundiadi si sire ko ese l᷊au kowawine. 7#Kar. 2:24E'e sabapie ko ese sarung manintang i mamange dingang i papange dang masimbau dingang kawinge,#10:7: Su l᷊al᷊ung u wohe horo pia manga didato: dang masimbau dingang kawinge 8kuteu i sire rua nakoa simbau.’ Inau, i sire seng wal᷊inge l᷊ai dua ngkatau, kateho seng nasimbau. 9E'e sabapie, apa ko seng nipukauhi u Mawu Ruata, ta botonge iputal᷊ei ngu taumata!”
10Suapang i sire nasu su l᷊al᷊ung u wal᷊e, manga tumatuhu-E nukina si Yesus kakakoa u hal᷊i e'e. 11#Mat. 5:32; 1Kor. 7:10-11I Yesus nangul᷊i si sire, “I sai musindo ngu kawinge bou e'e mukawing dingang kowawine ko wal᷊inge, kuteu taumata e'e nawuang su tingo ngu kawinge horo e'e.#10:11: su tingo ngu kawinge horo e'e: dang nasimbau dingang kawinge 12Kere'e l᷊ai kowawine ko manindo kawinge bou e'e mukawing dingang ko ese ko wal᷊inge i sie l᷊ai mawuang.”
I Yesus nangal᷊amati manga rario
(Mat. 19:13-15; Luk. 18:15-17)
13Pia manga taumata numbawa manga rario sarang koa I Yesus tadeau I Sie pamilo u l᷊ima-Nge l᷊au pangal᷊amati si sire. Kateho manga tumatuhu I Yesus nuwawal᷊uang su manga taumata e'e. 14I Yesus nuwawal᷊uang nakawua hal᷊i e'e, bou e'e nangul᷊i su manga tumatuhu-E, “Walate manga rario e'e pamai sarang koaKu! Ariwe larang i sire, watu'u manga taumata ko kere i sire i'i sarung mariadi tataho umati Mawu Ruata. 15#Mat. 18:3Putinaungko i'i! I sai ta mupasaruang Mawu Ruata kere singkatau ana ko dio, i sie ta mariadi tataho u umati Mawu Ruata.” 16Suapang bou nangul᷊i kere'e, I Yesus nanaruru manga rario e'e, bou e'e namilo u l᷊ima-Nge si sire pu singkatau dingang nangal᷊amati si sire.
Taumata ko kala
(Mat. 19:16-30; Luk. 18:18-30)
17Su tempo I Yesus sau nanurusi u l᷊al᷊al᷊eng-E, pia taumata singkatau nusumongo katal᷊ange sarang koa I Yesus. Tau e'e nusuba su tingo ngi Yesus l᷊au nukina, “Tuang ko mapia, apa hino ngu daku koateng tadeau botonge manarima u puwawiahi ko kahingang dang ko kakal?”
18I Yesus nukina, “Nakurawe i kau nangul᷊i Ia ko mapia? Takoae ko mapia, su l᷊ikuri Mawu Ruata sisane. 19#Sasu. 20:12-16; Sau. 5:16-20I kau seng matitong apang parenta ngu Mawu Ruata, ‘Kumbahang mamate, kumbahang mawuang, kumbahang manako, kumbahang musaksi ngu l᷊eo, kumbahang mangakal᷊i, pangadati si papa l᷊au si mamangu.’ ”
20Tau e'e nangul᷊i, “Tuang Guru, apang parenta e'e seng kaul᷊ie daku nituhukang nanita mborong makuda.”
21I Yesus nutuhung tau e'e dingang nukumindaghi, bou e'e nangul᷊i, “Kate simbau l᷊ai hal᷊i ko mborong mambeng reakeng u. Dakoe tamai wal᷊ue apang rarotongu; onggoe doinge su tau ko susa, dang i kau sarung makarea kakakala su sorga. Bou e'e songote mai tuhu si Sia.” 22Nakaringihi si Yesus nangul᷊i kere'e, tau e'e nadio naunge, bou e'e i sie nanintang u tampa e'e dingang susa naung, watu'u i sie ko kala kahingang 23Kuteu I Yesus nutuhung su manga tumatuhu-E wuhue nangul᷊i si sire, “Tumaniu mabuha su taumata ko kala sumu makoa tataho u umati Mawu Ruata.”
24Manga tumatuhu-E naherang nakaringihi didato ngi Yesus e'e. Arawe I Yesus nangul᷊i l᷊ai, “Manga ana-Ku, mang tingari mabuha makoa tataho u umati Mawu Ruata! 25Magampangeng simbau onta sumu su l᷊ohang u rarahung bou singkatau taumata ko kala sumu su Dunia ngu Mawu Ruata Ko Wuhu.”
26Manga didato ngi Yesus e'e nakaherang manga tumatuhu-E, hakiu i sire nukina i sire l᷊au sire, “Boko kere'e, ko i sai botonge masal᷊amati?”
27I Yesus nutuhung si sire dang nusumimbahi, “Su taumata e'e ta mariadi arawe su Mawu Ruata takoae ko ta mariadi; su Mawu Ruata kaul᷊ie botonge mariadi.”
28Bou e'e i Petrus nangul᷊i, “Tuhungete, i kami seng nanintang u kaul᷊ie tadeau tumuhu si Tuang.”
29I Yesus nangul᷊i, “Pangimangte: taumata ko seng nanintang u wal᷊enge, arako ana u simbaue ko ese arako kowawine, arako i mamange, arako i papange, arako manga anae, arako anseri ual᷊ingu Ia dang ual᷊ingu Habari Mapia bou Mawu Ruata, 30taumata e'e seng manarima nangilembo maul᷊i su orasi i'i. I sie sarung makarea mahasu su sul᷊enge kaul᷊ie wal᷊enge, ana u simbau ko ese, ana u simbau kowawine, i mamange, manga anae, anseri, – dang l᷊ai kasasingsara. Dang hindo su tempo mai kasongonge, taumata e'e sarung manarima putatumbiahi ko tutunge dang ko kakal. 31#Mat. 20:16; Luk. 13:30Kateho su tempo i'i maul᷊i taumata ko kahorokange sarung makoa ko kasamuriange dang maul᷊i ko su orasi i'i kasamuriange sarung makoa ko kahorokange.”
I Yesus mudidato katilunge hal᷊i u papate-Nge
(Mat. 20:17-19; Luk. 18:31-34)
32I Yesus l᷊au manga tumatuhu-E, kal᷊al᷊enge sarang Yerusalem. I Yesus nul᷊umal᷊eng su horoe, dang manga tumatuhu-E kaul᷊ie mangkate maghagha. Dang manga taumata ko katuhue bou l᷊ikuri sire mang l᷊ai nakapundang nataku. Bou e'e I Yesus sau nukui manga tumatuhu-E i sire ha dang nangul᷊i si sire apang ko sarung mariadi su badang-E. 33I Yesus nangul᷊i, “Raringihiko, su orasi i'i i kite seng kasue su Yerusalem. Su se'e Ahusi Taumata sarung isarakang su tumbonang u manga imam dang manga meteri agama. I Sie sarung ihukung pateng, bou e'e isarakang su manga taumata ko wal᷊inge tau Yahudi. 34I sire sarung muhinakang si Sie, manguru si Sie, mamahang si Sie, l᷊au munggantong I Sie. Kateho su l᷊ou katilunge I Sie sarung muwangung.”
Ndo i Yakobus l᷊au i Yohanes
(Mat. 20:20-28)
35Bou e'e i Yakobus l᷊au i Yohanes, manga ana i Zebedeus, nusumongo sarang koa I Yesus. Angkung i sire rua, “Tuang Guru, pia hal᷊i simbau ko kao i kami I Tuang pukoa e'e si kami.”
36I Yesus nukina, “Apa kao i rua pakikoa si Sia, guna ngi kumu?”
37I sire nusumimbahi, “I kami mo mukumangiang su kuaneng l᷊au su kuihi I Tuang, boko I Tuang mukumangiang dingang u kawawantughi.”
38 #
Luk. 12:50
I Yesus nangul᷊i si sire, “I kumu wugha apa ko nipundokang i kumu. Botonge I kumu manginung bou cawang u singsara ko sarung daku inungang l᷊au sumu su l᷊al᷊ung haghi ngu singsara ko sarung daku isukang?”
39“Makatanggong,” sasimbahi sire.
“Kuteu I Yesus sau nangul᷊i si sire, tingari i kumu sarung manginung bou cawang singsara ko sarung daku inungang, dang sumu su l᷊al᷊ung u haghi ngu singsara ko sarung Daku isukang. 40Kateho su hal᷊i i sai ko sarung kumangiang su kuaneng arako su kuihi-Ku e'e wal᷊ingewe haki-Ku manantu. Mawu Ruata manantu i sai-sai ko sarung kumangiang su manga tampa e'e.”
41Su tempo ngi sire mapul᷊o tumatuhu I Yesus ko wal᷊inge e'e nakaringihi hal᷊i e'e, i sire nuwawal᷊uang si Yakobus l᷊au si Yohanes. 42#Luk. 22:25-26Inau I Yesus nukui si sire kaul᷊ie mbuhue nangul᷊i, “I kumu matitong himoneu manga pangaha u wanua ko wugha ngu Mawu Ruata mul᷊inda kawanuange. Dang apang tumbonang i sire manira si sire. 43#Mat. 23:11; Mrk. 9:35; Luk. 22:26Kateho i kumu ta botonge makoa kere'e! Arawe, taumata ko mo mutingkakoa ko l᷊abo su tal᷊oara i kumu, i sie mambeng makoa mutatal᷊ung si kumu. 44Dang taumata ko mo makoa ko kahimotongange su tal᷊oara i kumu, mambeng makoa l᷊angu kaul᷊ie. 45Watu'u Ahusi Taumata mang l᷊ai wal᷊inge sumongo tadeau ital᷊ungang. I sie sumongo guna ngu mutal᷊ung dang manarakang badang-E guna ngu mupakal᷊iwiri taumata maul᷊i.”
I Yesus nupakaul᷊e ngi Bartimeus ko wuta
(Mat. 20:29-34; Luk. 18:35-43)
46I sire nurating u Yerikho. Dang su tempo I Yesus dingang u manga tumatuhu-E l᷊au taumata maul᷊i nanintang u soa e'e, pia singkatau ko wuta kakangiang su wiwihi u l᷊al᷊eng mundo kakindaghi. Arenge i Bartimeus, ana i Timeus. 47Suapang i sie nakaringihi mai kasahenge e'e ko I Yesus tau Nazaret, i sie nukumiha, “Yesus Ahusi Daud! Kindaghite ko ia!”
48I sie nidadakeng u taumata maul᷊i dingang niparentang pakarumasi, kateho i sie kasaunge l᷊ai nukumiha, “Ahusi Daud, Kindaghite ko ia!”
49Kuteu I Yesus nahung mbuhue nangul᷊i, “Kuiete mai i sie.”
Inau i sire nukui tau ko wuta e'e, I sire nangul᷊i si sie, “Karumasie! Rarisie ndai, i kau nikuiang I Yesus!”
50Tau ko wuta e'e dingang naneleri jubange, bou e'e dingang nurumarisi dang tamai nakoa sarang koa I Yesus.
51I Yesus nukina si sie, “Apa kaou daku koateng si kau?”
Tau ko wuta e'e nusimimbahi, “Tuang Guru, ia mo makawua.”
52Angkung I Yesus, “Dakoe tamai, watu'u i kau mangimang si sia, i kau maul᷊e.”
Su orasi e'e l᷊ai tau e'e dingang nakawua. Bou e'e i sie nutumuhu si Yesus su l᷊al᷊eng.
Currently Selected:
MARKUS 10: PLT
Highlight
Share
Copy
Want to have your highlights saved across all your devices? Sign up or sign in