MATIUS 9
9
I Yesus nupakaul᷊e singkatau ko kesohi
(Mrk. 2:1-12; Luk. 5:17-26)
1I Yesus nusul᷊e sarang wanua-E, nusakaeng namoto rano, nusul᷊e sarang kampong-E.#9:1: sarang kampong-E: Kapernaum (putuhung 4:13). 2Su se'e pia taumata ko numbawa sarang koa i Sie singkatau ko kesohi kal᷊al᷊oka su tupihi. Suapang I Yesus nakawua pangangimang i sire kere'e kal᷊aboe, i Sie nangul᷊i su tau ko kesohi e'e, “Pakatatapi, ana-Ku! Apang dosa ngu kaul᷊ie seng niampungang.”
3Pira ngkatau meteri agama su se'e nuwisara su l᷊al᷊ung u naung i sire, “Taumata i'i nuhinakang Mawu Ruata!”
4I Yesus matitong naung i sire, kuteu i Sie nangul᷊i, “Nakurawe i kumu pia naung kere kal᷊al᷊ai e'e? 5Sude mapiang: mangul᷊i, ‘Dosa ngu seng niampungang,’ arako mangul᷊i ‘Wangungte dang l᷊al᷊engte?’ 6Arawe i'i Ia mo mangandaghi si kumu himoneu su dunia i'i Ahusi Taumata pia kawasang-E mupangampung u dosa.” Bou e'e I Yesus nangul᷊i su tau kesohi e'e, “Wangungte, hengke'e wawila nae dang kapul᷊e'e!”
7Tau ko kesohi e'e turusi nuwangung dingang napul᷊e sarang wal᷊enge. 8Su tempo taumata nakawua hal᷊i e'e, i sire kaul᷊ie nataku dang nundalo Mawu Ruata, watu'u Mawu Ruata seng nunggile kawasa kere'e kal᷊aboe su taumata.
I Yesus nukumui si Matius
(Mrk. 2:13-17; Luk. 5:27-32)
9Bou e'e I Yesus nanintang u tampa e'e. Su tempo kal᷊al᷊enge, i Sie nakawua si Matius, mananuntu balasteng kakaiang su kantorie. I Yesus nangul᷊i si Sie: “Maite tuhu si Sia!”
Kuteu i Matius turusi nuwua nutumuhu si Yesus.
10 #
Luk. 15:1-2
Su tempo ngi Yesus kapusimokol᷊i su wal᷊e ngi Matius,#9:10: su wal᷊e ngi Matius: arako su wal᷊enge (e'e ko wal᷊e ngi Yesus). maul᷊i mananuntu balasteng dang taumata ko tuhungang u hape kal᷊al᷊aikange nusumongo kumang singkakang dingang I Yesus dang manga tumatuhu-E. 11Pia tau Farisi nakawua hal᷊i e'e. I sire nukina suapang tumatuhu-E, “Nakurawe meteri kumu nukumang dingang i sire mananuntu balasteng dang dingang u manga taumata ko dal᷊ai?”
12I Yesus nakaringihi kakina i sire, bou e'e i Sie nusumimbahi, “Taumata ko matoghasi ta mundea dokter, kitang u taumata ko masaki. 13#Hos. 6:6; Mat. 12:7Putuhungko apa mangal᷊eng ayeti Buki Susi i'i: ‘Ia mo pukakindaghi wal᷊inge we binatang ko isumba.’ Watu'u Ia nusumongo wal᷊inge mundea taumata ko mupundang u watangenge seng mapia kateho taumata ko tuhungang kal᷊al᷊aikange.”
Hal᷊i u puasa
(Mrk. 2:18-22; Luk. 5:33-39)
14Bou e'e manga tumatuhu Yohanes Mananahani nusumongo sarang koa I Yesus. I sire nukina, “Nakurawe i kami dingang i sire tau Farisi mupuasa, arawe tumatuhu I Tuang ta?”
15I Yesus nusumimbahi, “Kirapa su titong i kumu? Botonge taumata ko ninoti su pukawingang mutingkasusa boko pardegong mborong ene ringang i sire? Tantu ta! Katewe pia temponge pardegong e'e al᷊akeng bou i sire. Su tempo e'e mbuhue i sire mupuasa.
16Takoae taumata manampeli l᷊aku ko hene dingang u heka ko wuhu. Watu'u heka tatampeli e'e kumoho dang makaghehe l᷊aku e'e, hakiu ghehe'e kasaunge mal᷊abo. 17Kere'e l᷊ai takoae taumata mutaho anggori ko wuhu su tampa ko dal᷊ai. Watu'u tampa e'e mahitang dang mawuka, bou e'e anggori e'e mawungke. Anggori ko wuhu mambeng taho su tampa ko wuhu, tadeau kaul᷊ie mareso mapia.”
Ana u tumbonang u wal᷊e pukakal᷊iomanengang
Tau Wawine ko nanuhung si Yesus
(Mrk. 5:21-43; Luk. 8:40-56)
18Tintal᷊a I Yesus kapudidatonge dingang u manga tumatuhu i Yohanes Mananahani, nusumongo singkatau tumbonang u wal᷊e pukakal᷊iomanengang. I sie nusuba su saruang ngi Yesus dingang nangul᷊i, “Anaku kowawine wuhu-wuhu nate. Kateho, kere wotonge songoko piloko l᷊ima-U tadeau i sie sau muwiahi.”
19I Yesus dingang u manga tumatuhu-E natamai singkatamai dingang u tau e'e.
20-21Su l᷊al᷊eng pia singkatau kowawine masaki nil᷊al᷊engang u kotori seng mapul᷊odua su taunge kal᷊iwuenge, nusumandighi bou l᷊ikuri I Yesus. Su naunge, “Asal᷊i ia makasuhung kakingkaeng-E, ia seng maul᷊e.” Bou e'e i sie nanuhung pondol᷊i kakingkaeng I Yesus.
22Su orasi e'e I Yesus nuwihu sarang l᷊ikuri dang nakawua tau wawine e'e turusi nangul᷊i si sie. “Pakatatapi naungu ana-Ku! Ual᷊ingu pangangimangu si Sia e'e, i kau maul᷊e!” Singkatempo e'e l᷊ai tau wawine e'e turusi naul᷊e.
23Bou e'e I Yesus nurating wal᷊e tumbonang ngu wal᷊e pukakal᷊iomanengang. Suapang i Sie nakawua munanang musik u susa dingang u taumata magara, 24I Sie nangul᷊i si sire, “Dakoko suwang i kumu kaul᷊ie! Dario e'e tawe nate; i sie kitang katikie.”
I sire kaul᷊ie nahul᷊ighei ngi Yesus. 25Suapang i sire nusumuwang, I Yesus nusumu su kamari u dario e'e dingang nuhinggo l᷊imange. Bou e'e nuwangung ana wawine e'e. 26Habari e'e nawombeng su kaul᷊i u tampa e'e.
I Yesus nupakaul᷊e dua ngkatau ko wuta
27I Yesus nul᷊umal᷊eng bou tampa e'e, seng su l᷊al᷊eng pia dua ngkatau ko wuta katuhue si Sie. I sire rua mangkate kakuinge, “Mawu Ahusi Daud, kindaghiteko i kami rua i!”
28Suapang I Yesus nusumu su wal᷊e, i sire rua ko wuta e'e nusumandighi si Sie. I Yesus nukina si sire rua. “I rua mangimang Ia makaul᷊e si rua?”
“Mangimang Tuang!” sasimbahi sire rua.
29Bou e'e I Yesus nanil᷊iri mata ngi sire rua dingang nangul᷊i, “Ual᷊ing i rua mangimang, kariadite apang ko ikao i rua.” 30Kuteu i sire rua seng nakawua. I Yesus nangonggo u ingati si sire rua, tadeau kumbahang muwuke ngu hal᷊i e'e si sai-sai.
31Kateho i sire rua mang nul᷊umal᷊eng namombeng habari u hal᷊i I Yesus e'e su kaul᷊i u tampa.
I Yesus nupakaul᷊e tau ko bobo
32Su tempo ngu tau rarua e'e nul᷊umal᷊eng, pia singkatau ko bobo ko nisukang u roh ko dal᷊ai, niwawa u taumata sarang koa I Yesus. 33I Yesus nanguseri roh ko dal᷊ai e'e dang orasi e'e l᷊ai i sie nakapudidato. Taumata maul᷊i naherang dingang nangul᷊i, “Mborong tangkeng nakawua hal᷊i kiri'i su Israel!”
34 #
Mat. 10:25, 12:24; Mrk. 3:22; Luk. 11:15 Arawe i sire tau Farisi nangul᷊i, “Tumbonang u roh ko dal᷊ai nangonggo u kawasa si Sie panguseri roh ko dal᷊ai e'e.”
I Yesus nukumindaghi nakawua taumata maul᷊i
35 #
Mat. 4:23; Mrk. 1:39; Luk. 4:44 Kere'e I Yesus nul᷊iku bou soa simbau sarang soa simbau, bou kampong simbau sarang kampong simbau. I Sie nanintiro suapang wal᷊e pukakal᷊iomanengang, dang nangul᷊i Habari Mapia bou hal᷊i u pamarentahang u Mawu Ruata kere Ratu. I Sie mupakaul᷊e ngu taumata ko mutatahang haghi ngu saki dang ko pia kurang su badange. 36#Rek. 27:17; 1Mar. 22:17; 2Taw. 18:16; Yeh. 34:5; Za. 10:2; Mrk. 6:34Su tempo ngi Yesus nakawua taumata napene, i Sie turusi nukumindaghi nakawua si sire, watu'u i sire seng ta makahingang dang ta makakoa apa-apa, musul᷊ung u domba ko takoae mangangahae. 37#Luk. 10:2Bou e'e I Yesus nangul᷊i su manga tumatuhu-E, “Maul᷊i ko itipo, kitang u mananiponge mahal᷊i. 38Ual᷊ingu e'e pundo su tataghuang u anseri tadeau mundoho ngu mul᷊ahal᷊i panipo wuange.”
Currently Selected:
MATIUS 9: PLT
Highlight
Share
Copy
Want to have your highlights saved across all your devices? Sign up or sign in