MATIUS 4
4
I Yesus nisal᷊ukateng
(Mrk. 1:12-13; Luk. 4:1-13)
1 #
Ibr. 2:18, 4:15 Bou e'e I Yesus niaha u Roh u Mawu Ruata sarang tana l᷊inggi tadeau pakisal᷊ukate su setang. 2Paupul᷊o su l᷊ounge, paupul᷊o su huwinge I Yesus ta nukumang. Bou e'e i sie nakapundang nahutung. 3Setang nusumongo dingang nangul᷊i, “Uare i Kau ko Ahusi u Mawu Ruata? Ho, parentaite manga watu tamai i'i pakakoa boroti.”
4 #
Sau. 8:3
I Yesus nusumimbahi, “Su l᷊al᷊ung u Buki Susi pia mawawohe: Taumata tawe muwiahi kitang bou boroti, kateho bou patiku didato ko nipudidato ngu Mawu Ruata l᷊ai.”
5Bou e'e setang numbawa si Yesus sarang Yerusalem, soa ko susi, dingang nundui si sie su tahiwuwung u Wal᷊e ngu Mawu. 6#Mzm. 91:11-12Mbuhue setang nangul᷊i si Sie, “Uare i Kau ko Ahusi Mawu Ruata? Boko kere'e tumpate tanae, watu'u su Buki Susi pia mawawohe kiri'i:
‘Mawu Ruata sarung mundoi manga malaikati-E panintanuri si Kau,
i sire sarung maningka si Kau dingang u l᷊ima ngi sire,
tadeau l᷊aeri u ta masangkong su watu.’ ”
7 #
Sau. 6:16
I Yesus nusumimbahi, “Su l᷊al᷊ung u Buki Susi l᷊ai pia kawawohe, ‘Kumbahang i kau manal᷊uka Mawu Ruata ngu!’ ”
8Bou e'e setang sau numbawa si Yesus sarang wul᷊uri marange kahingang, nitiboe si Sie kaul᷊i u kararatuang su dunia dingang u kaul᷊i u kakakalae. 9Mbuhue setang nangul᷊i si Yesus, “Kaul᷊ie tamai i'i daku ionggo si Kau, boko i Kau musuba manumba si sia.”
10 #
Sau. 6:13
I Yesus nusumimbahi, “Dako pangal᷊ing i kau setang! Su l᷊al᷊ung u Buki Susi mawawohe: Panumbate Mawu Ruata ngu, l᷊au putahamawute si Sie sisane.”
11Panginsuenge setang nanintang I Yesus, dang manga malaikati nusumongo nutal᷊ung si Sie.
I Yesus nanita pul᷊ahal᷊i-E su Galilea
(Mrk. 1:14-15; Luk. 4:14-15)
12 #
Mat. 14:3; Mrk. 6:17; Luk. 3:19-20 Su tempo ngi Yesus nakaringihi i Yohanes nihukung, i Sie nutingkarau nakoa sarang Galilea. 13#Yoh. 2:12I Sie nanintang u Nazaret, bou e'e natana su Kapernaum su wiwihi u Rano Galilea su Wanua ngi Zebulon dingang i Naftali. 14Ual᷊ingu I Yesus seng nukoa hal᷊i e'e, nariadi apang ko niul᷊i i Nabi Yesaya:
15 #
Yes. 9:1-2
“Tana ngi Zebulon dingang tana ngi Naftali,
su l᷊al᷊eng sarang rano, su simbuka ngu Sal᷊uhi Yordan,
Galilea tana ngu taumata ko wal᷊inge tau Yahudi!
16Umati ko muwiahi su kararundung
seng nakawua kasasua nusuminang!
I sire ko natana su tampa kararundung u papate
seng nisinang u kasasua!”
17 #
Mat. 3:2
Bou tempo e'e I Yesus nanita nangul᷊i, “Putobati bou apang dosa ngi kumu, Ual᷊ingu Mawu Ruata seng maehong mamarenta musul᷊ung u Ratu!”
I Yesus nukumui si sire pa u katau mukakisaghe
(Mrk. 1:16-20; Luk. 5:1-11)
18Su tempo ngi Yesus kal᷊al᷊enge su apeng u Rano Galilea, i Sie nakawua si sire rua mukakisaghe, i Simon (ko isigho l᷊ai si Petrus) dingang u tuaringe i Andreas. I sire rua kapanomae su Rano e'e. 19I Yesus nangul᷊i si sire rua, “Maite tuhu si sia. Ia sarung manintiro si rua manoma taumata.” 20I sire rua dingang nanintang soma i sire rua bou e'e nutumuhu si Yesus.
21I Yesus nurumal᷊eng turusi, bou e'e nakawua l᷊ai si sire rua tamahuari ko wal᷊inge, i Yakobus sire rua ngi Yohanes, ana i Zebedeus. I sire tilu tahaghaghurang kapanambinge soma su l᷊al᷊ung u sakaeng. I Yesus nukumui l᷊ai si sire rua. 22Dang i sire rua nanintang sakaeng dingang i papa ngi sire rua bou e'e nutumuhu si Yesus.
I Yesus nanintiro, nunasi l᷊au nupakaul᷊e taumata ko masaki
(Luk. 6:17-19)
23 #
Mat. 9:35; Mrk. 1:39 Su Galilea, I Yesus nul᷊iku kaul᷊i u tampa dang nanintiro suapang wal᷊e pukakal᷊iomanengang. I Sie nuhabari Habari Mapia, uare Mawu Ruata sarung mamarenta. I Sie l᷊ai nupakaul᷊e ngu taumata masasaki l᷊au apang ko pia kurang u badang i sire. 24Habari u hal᷊i I Yesus i'i seng nakeke su kaul᷊i u kampong su Siria, hakiu maul᷊i taumata nusumongo si Sie. I sire numbawa manga taumata ko masaki l᷊au ko kaputatahang u turu. Manga taumata ko niwal᷊iuang roh ko dal᷊ai, ko pia saki wawi, l᷊au ko kesohi, kaul᷊ie nipakaul᷊e ngi Yesus. 25Maul᷊i taumata ko nutumuhu si Yesus su tempo e'e. Pia ko nusumongo bou Galilea, pia ko bou Soa Mapul᷊o, bou Yerusalem, bou Yudea, dang pia l᷊ai bou Soa su simbuka ngu Yordan.
Currently Selected:
MATIUS 4: PLT
Highlight
Share
Copy
Want to have your highlights saved across all your devices? Sign up or sign in