MATIUS 28
28
Puwawangung I Yesus
(Mrk. 16:1-10; Luk. 24:1-12; Yoh. 20:1-10)
1Su tempo l᷊ou ngu Sabati seng nal᷊iu, mborong mal᷊uka-l᷊ukari su l᷊ou ngu Misa, i Maria Magdalena l᷊au i Maria ko wal᷊inge e'e natamai nutuhung kubul᷊i e'e. 2Singkahuwiu pia rinuhi mauha. Singkatau malaikati u Mawu nul᷊umintu bou sorga bou e'e nul᷊unggi watu l᷊ahumping kubul᷊i e'e, dang nukumangiang su wawoe. 3Pahesi u malaikati e'e musul᷊ung u kila, dang l᷊akue mawira-wira. 4Sordado ko mundadiaga ko kapudiagae su se'e nataku sarang i sire nukumende, dang nakoa musul᷊ung u tau ko nate.
5Malaikati e'e nangul᷊i si sire manga kowawine e'e, “Ariwe kataku! Ia matitong i kumu kapundeae si Yesus ko seng nighantong e'e. 6I Sie seng tarie'e si'i. I Sie seng nuwangung kere ko seng mbuae niul᷊i-E horo. Maite putuhung tampa ko nil᷊al᷊okang-E. 7I'i, tamaite pakaehong puhabari su manga tumatuhu-E. ‘I Sie seng nuwangung, dang i'i i Sie seng natamai nangihoro si kumu sarang Galilea. Pai se'e i kumu sarung makawua si Sie!’ Tinaungete apang ko seng daku niul᷊i si kumu.”
8Masahawu-sahawu manga kowawine e'e nanintang u kubul᷊i e'e. Dingang u taku mul᷊al᷊au u l᷊iaghi, i sire katal᷊ange tadeau makapuhabari hal᷊i e'e su manga tumatuhu I Yesus.
9Singkahuwiu I Yesus nusumandighi nusombang i sire manga kowawine e'e dingang nuhabari, “Sal᷊amati!” Bou e'e i sire nusumandighi si Sie, mbuhue nul᷊ahuku l᷊aeri-E, nanumba si Sie. 10“Kumbahang mataku,” didato Ngi Yesus si sire, “Dakote ul᷊i su manga ana u singkatau-Ku tadeau i sire patamai sarang Galilea; pai se'e i sire sarung makawua si Sia.”
Lahabari u sordado mundadiaga
11Tintal᷊a e'e manga kowawine e'e natamai, pirangkatau bo i sire sordado mundadiaga ko kapudiagae kubul᷊i e'e napul᷊e sarang soa nangul᷊i su manga tumbonang u imam kaul᷊ie ko seng nariadi. 12Manga tumbonang u imam e'e nughaghighili dingang u manga pangaha u tau Yahudi, mbuhue nangonggo doi maul᷊i si sire sordado mundadiaga e'e. 13Dang nangul᷊i, “I kumu mambeng puhabari, manga tumatuhu I Yesus nusumongo huwi nanako badang-E su tempo ngu i kami katikie. 14Boko i gubernur makaringihi hal᷊i e'e, hindo i kami mul᷊oke si sie tadeau i kumu ta makahombang susa.”
15Kuteu sordado mundadiaga e'e nundae doi e'e, dang nukoa kere ko nitanata si sire. Ual᷊ingu e'e, wuke e'e mborong nakeke su tal᷊oara u tau Yahudi sarang l᷊ou i'i.
I Yesus nutingkaandaghi watangeng-E su manga tumatuhu-E
(Mrk. 16:14-18; Luk. 24:36-49; Yoh. 20:19-23; Wuk. 1:6-8)
16 #
Mat. 26:32; Mrk. 14:28 I sire mapul᷊onsau tumatuhu I Yesus e'e nakoa sarang wul᷊uri su Galilea kere niparenta Ngi Yesus si sire. 17Su tempo ngi sire nakawua si Yesus pai se'e, i sire nusuba nanumba si Sie. Kateho mang pia bou tal᷊oara i sire mborong sal᷊a ta mangimang. 18I Yesus nusumandighi si sire, dang nangul᷊i, “Kaul᷊i u kawasa su sorga l᷊au su dunia seng nisarakang si Sia. 19#Wuk. 1:8Watu'u e'e tamaite sarang kaul᷊i u bangsa su kal᷊abo u dunia, koa ko i sire e'e mariadi tumatuhu-Ku. Sahani i sire e'e dingang u areng I Yamang, l᷊au Ahusi, dang Roh u Mawu Ruata. 20Tintiroi i sire patuhu kaul᷊ie ko seng Daku niparenta si kumu. Dang putinaungte Ia sintinia mang mahundingang i kumu sarang panginsueng u dunia.”
Currently Selected:
MATIUS 28: PLT
Highlight
Share
Copy
Want to have your highlights saved across all your devices? Sign up or sign in