MATIUS 11
11
Raroi i Yohanes Mananahani
(Luk. 7:18-35)
1Suapang I Yesus bou nanul᷊ara su tumatuhu-E mapul᷊odua e'e, i Sie nanintang u tampa e'e. I Sie natamai nanintiro l᷊au mul᷊ahabari u tatanata bou Mawu Ruata suapang soa ko masasandighi su se'e.
2I Yohanes Mananahani ko su tutupang nakaringihi hal᷊i u pul᷊ahal᷊i I Kristus. Bou e'e i sie nundoi pirangkatau tumatuhue patamai sarang koa I Yesus pakina, 3“Seng i Tuang taumata ko sarung ruminta tumuhu diandi ngu Mawu Ruata, arako i kami mambeng mangampal᷊i taumata ko wal᷊inge?”
4I Yesus nusumimbahi, “Tamaite pusul᷊e sarang koa i Yohanes, pangul᷊i apang ko seng nikaringihi dingang ko seng nikawua ngi kumu: 5#Yes. 35:5-6, 61:1Tau ko wuta nakawua, tau ko kesohi nakal᷊al᷊eng, taumata ko pia saki pisi ko makatataku#11:5: pia saki pisi ko makatataku: Putuhung 8:2. naul᷊e; tau ko wenggeli nakaringihi, taumata ko nate sau nuwiahi dingang u Habari Mapia bou Mawu Ruata seng nipakatitong suapang tau ko susa. 6Kal᷊al᷊uasi su taumata ko takoae alasange manolaki Ia.”
7Suapang raroi i Yohanes e'e natamai, I Yesus nanita nangul᷊i su taumata ko maul᷊i hal᷊i i Yohanes e'e, angkung-E, “I kumu nakoa sarang tana l᷊inggi tadeau mutuhung apa? Ruku singkal᷊upa ko nitiu ngu anging? 8I kumu matamai tadeau makawua apa? Singkatau ko dingang u l᷊akue ko masidada? Taumata ko pia l᷊akue ko masidada, katanakenge ko su istana! 9Inau nakurawe i kumu matamai sarang tana l᷊inggi? Tadeau mutuhung singkatau nabi? Tingari, kateho mborong l᷊ai nangilebe bou singkatau nabi. 10#Mal. 3:1Watu'u i Yohanes ko kere mal᷊ahabari su l᷊al᷊ung u ayeti su Buki Susi i'i,
‘Ko i'i raroi-Ku, nihabari u Mawu,
Ia nundoi si sie mborong horo bo I Kau
tadeau panal᷊uahi l᷊al᷊eng-U.’
11Tinaungete! Su dunia i'i mborong takoae nikarea taumata ko nangilebe l᷊abo bou i Yohanes Mananahani. Kateho maning kere'e, taumata ko kadiokange su komol᷊ang u manga umati Mawu Ruata nangilebe l᷊aboe bou i Yohanes. 12#Luk. 16:16Nanita i Yohanes bou namombeng u habarie sarang orasi i'i, umati Mawu Ruata rokateng u manga taumata ko mundea mo mangawasa dingang u kal᷊ahasa. 13Sarang rarinta ngi Yohanes, kaul᷊i u torati Musa dingang u tintiro ngu manga nabi mul᷊ahabari u hal᷊i ko sarung mariadi. 14#Mal. 4:5; Mat. 17:10-13; Mrk. 9:11-13Dang boko i kumu mangimang, i Yohanes e'e ko i Elia, sasongoe seng bou niul᷊i. 15Boko pia tul᷊i, raringihi!
16Dingang u apa hinong daku isul᷊ung taumata orasi i'i? I sire musul᷊ung u manga rario kakaiang su pasari. Singkomol᷊i nunggo su ko wal᷊inge. 17‘I kami nusamperi samperi ko makal᷊uasi si kumu, kateho i kumu mandi musal᷊ai! I kami nusamperi samperi ko makasasusa, dang i kumu mandi mumpal᷊ehe!’ 18I Yohanes nusumongo – i sie nupuasa ta nanginung anggori, taumata nangul᷊i ‘I sie nikasukang u setang!’ 19Orasi i'i Ahusi Taumata nusumongo – I Sie kimang dingang nanginung; bou e'e taumata nangul᷊i, ‘Tuhungete taumata e'e! Makombang, mawukang, ghaweu mananuntu balasteng dang taumata ko marosa.’ Maning kere'e, kapapande ngu Mawu Ruata mal᷊ahe bou manga kakanoae.”
Apang soa ko ta mangimang
(Luk. 10:13-15)
20Bou e'e I Yesus nanita nuhinakang apang soa, ko kaul᷊ikang u tatia ko makal᷊aherang nikoa-E. Watu'u manga taumata su kaul᷊i u soa e'e mandi mutobati bou dosa ngi sire. 21#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4“Silaka si kumu, Korazim! Dang silaka l᷊ai si kumu, Betsaida! Kiko kaul᷊i u tatia ko makal᷊aherang ko nikoa su tal᷊oara i kumu seng nikoa su Tirus dang Sidon, nal᷊ahe manga taumata pai se'e seng mal᷊iwue nutobati bou dosa ngi sire, dang nul᷊al᷊utu dingang nundui awu su timbo. 22Putinaungte, su L᷊ou Kiamati, tau Tirus dang Sidon mborong nangilebe mal᷊owo iampungang u Mawu Ruata bou i kumu! 23#Kar. 19:24-28; Yes. 14:13-15Dang i kumu Kapernaum! Apa i kumu sarung i tirei pakarange murating u sorga? Ta! I kumu katewe iwahung su naraka! Watu'u kiko kaul᷊i u tatia ko makal᷊aherang ko seng nikoa su tal᷊oara i kumu e'e seng nikoa su Sodom, ute Sodom e'e mborong ene sarang orasi i'i! 24#Mat. 10:15; Luk. 10:12Tinaungete, su L᷊ou Kiamati, tau Sodom mborong nangilebe mal᷊owo iampungang u Mawu Ruata bou i kumu.”
Maite sarang koa-Ku
(Luk. 10:21-22)
25Su tempo e'e I Yesus nukal᷊iomaneng, “Yamang, Mawu mangawasa su l᷊angi dang su dunia! Ia mutarimakase si Kau watu'u kaul᷊i e'e ta nipakal᷊ahe su manga taumata ko pande dingang ko pia titong i sire, kateho i Kau nupakal᷊ahe su manga taumata ko takoae titong i sire. 26E'e nakal᷊uasi naung I Yamang.”
27 #
Yoh. 3:3, 1:18, 10:15 Bou e'e I Yesus nangul᷊i, “Kaul᷊i u hal᷊i seng nisarakang I Yamang si Sia. Takoae sarang singkatau matitong u Ana su l᷊ikuri I Yamang. Takoae l᷊ai ko matitong i Yamang su l᷊ikuru Ana, dang taumata ko nipakatitong u Ana hal᷊i I Yamang.
28Maite sarang koa-Ku i kumu kaul᷊ie ko nawau, dang ko nakapundang ko mabuha; Ia sarung mangonggo kal᷊al᷊oahi si kumu. 29#Yer. 6:16Maite putuhu si Sia dang pangundungte si Sia. Watu'u Ia ko masikome dingang marinda, ute i kumu sarung makapundang kal᷊al᷊oahi u naung. 30Watu'u apang parenta-Ku makal᷊uasi naung, dang wawaneng ko Daku pakiwawa si kumu mahang.”
Currently Selected:
MATIUS 11: PLT
Highlight
Share
Copy
Want to have your highlights saved across all your devices? Sign up or sign in