Malaquías 3
3
Ñanderuete ombojovakéta oimeraẽvape
1Peikuaa porãke, Che amondóta che remimondo ombosako’i hag̃ua pe tape che renonderãme, sapy’aitépe oúta pende Jára peẽ peha’ãrõva hogaguasúpe ijyvága remimbou ndive, pende Ruete voi ningo he’i ko mba’e kóva.
2Ha mávapa ikatúne oguereko pu’aka ijejuha árape, térã mávapa ikatúne oñembo’ykuaa gueteri Ha’e ojehechauka ramo. Ha’e ojogua pe tata oporomopotĩmbávape, térã umi omba’ejohéiva havõme.
3Ha’e oguapýta omopotĩ ha omoporã hag̃ua Levi ra’ykuérape, ku oñemopotĩ háicha pláta ha óro tatápe, ha uperire ae oikuave’ẽta hekoitépe pende Ruete oipota háicha.
4Péichamante Juda ha Jerusalen kuave’ẽmby ombohorýta pende Ruetépe, umi ára yma guaréicha.
5Pe ángel atykuéra Jára he’i: Uperire ajúta pombojovake hag̃ua ha añemoĩta techahare ramo, ahavira hag̃ua umi paje apohárape, umi oikóvape hembirekotee’ỹva térã imenatee’ỹva ndive, umi ijapúvape, umi ojopyva’ekue imba’apohárape térã tetã ambueyguápe, imenave’ỹva térã ityre’ỹvape.
Israel tome’ẽ Ñanderuetépe idiézmo ha ikuave’ẽmby
6Che, pende Ruete, nañemoambuéi, ha peẽ tapia peiko vai ku Jacóbo ñemoñarenguéraichaite.
7Pende rukuéra ára guive peẽ pemboyke che rembiapoukapykuéra, ha ndapejapói che rembipota. Pejevy che rendápe, ha Che ajevýta avei pene rendápe, péicha he’i ángel atykuéra Jára. Peẽ katu peje: Mba’éguipa rojevýta ne rendápe.
8Ikatu piko umi kuimba’e térã kuñakuéra ombotavy pende Ruetépe, peẽ pejapo háicha ha upéi peje gueteri: Araka’épa ore rombotavy. Pende diézmo ha pene kuave’ẽmbýpe peẽ chembotavy.
9Pe maldicion oĩ pende ári ha upeichavéramojepe peẽ chembotavy gueteri, opaite tetãygua ningo oiko mbotavyhára ramo.
10Peguerupaite pende diézmo che rogaguasúpe oĩ hag̃ua tembi’u ipype ha peẽ chera’ãkuaa (peprovakuaa) ha pehecháta Che aipe’ataha yvága rovetã oky hag̃ua ha añohẽta pendeári che pytyvõ hembypa peve.
11Che amondyipáta umi tuku ho’upávape, ha umía nombyaimo’ãvéima pende koga’akue, ha pende parralty hi’a porã jevýta, he’i ángel atykuéra Jára.
12Ha mayma tetã ovy’aitéta penendive peiko porãitereiháre, he’i ángel atykuéra Jára.
Ñanderuete ombojovake hekoitépe
13Peẽ peñe’ẽvai cherehe, he’i pende Ruete. Ha upéi peje gueteri: Mba’éiko ro’e nderehe.
14Pejékuri: Jaiko reiva’ekue Ñanderuete rembiguái ramo. Mba’éiko ñaguenohẽ jajapo haguére hembiapoukapy ha ñañemomirĩ haguére henondépe.
15Upévare ko’ág̃a ore romboete umi oñemoĩvape Ñanderuete rehe, ha’ekuéra ndohasa asýi oréicha, omboyke ramojepe Ñanderuete rembiapoukapy, ha oñemoĩvo Ñanderuete rehe ndohupitýi mba’eveichagua jehavira.
16Oñomongeta jave umi ojeroviáva Ñanderuete rehe, Ha’e ojapysaka he’íva rehe ha ohendupa ha ohaiuka peteĩ kuatiañe’ẽ imandu’a hag̃ua umi ojeroviáva Ñanderuete rehe ha okyhyjéva héragui.
17Ha péva oikóta chéve g̃uarã mba’erepy iporavopyréva ramo, he’i ángel atykuéra Jára, upe ára upévape Che aiporiahuverekóta peteĩ túva oiporiahuvereko háicha ita’ýrape.
18Ha upépe ae pehecha porã jevýta oĩha juavy heko potĩva ha heko ky’áva apytégui, umi omomba’eguasúva Ñanderuetépe ha umi omomba’eguasu’ỹva ichupe.
Currently Selected:
Malaquías 3: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.