Amos 3
3
Kiite dow Israa'iila
1Kettindee konngol ngol Joomiraaɗo haali dow mooɗon, onon Israa'iila'en, lenyol muɓɓol ngol wurtini leydi Misira ngool:
2Mi senndii on onon tan hakkunde lenyi adunaaru fuu.
Saabe ɗuum de mi hiitoto hakkeeji mooɗon ɗiin fuu.
3Yalla yimɓe ɗiɗo na njaada tawaa paamiraay naa?
4Laddeeru le, na ubba ley cukkuri si heɓaay ko hampi naa?
Ɓii laddeeru na figinoo ley ngayka si nangaay faa'e naa?
5Yalla foondu na saama ley tuugol dow leydi
si nyaamdu muuɗum tawaaka toon?
Yalla tuugol na ɓantoo tawa faa'e meemaay ɗum naa?
6Si luwal konu fuufaama ley galluure
yalla na woodi mo diwnataa naa?
Masiiba le, na hewtoo galluure
tawa wanaa Joomiraaɗo neldi ɗum?
7Ndelle Laamɗo Joomiraaɗo waɗataa faa'e tawa ɓanginanaay ɗum gollooɓe muuɗum annabaaɓe ɓeen.
8Si laddeeru ubbii, moy woni hulataa?
Si Laamɗo Joomiraaɗo haalii,
moy woni yottintaa konngol ngool?
9Ley laamorɗi Asdod
e ley ɗi Misira, ngoynee mbi'on:
Kawritee dow baamle Samariya
de ndaaron no galluure ndeen jiiɓondiri
e torra ka wuurdi.
10Yimɓe ɓeen anndaa waɗude ko dartii.
Noon Joomiraaɗo wi'i.
Iɓe kebbini laamorɗi maɓɓe jawdi teetiraandi semmbe.
11Saabe ɗuum de inan ko Joomiraaɗo wi'i:
Ganyo fiilnan leydi ndiin,
ɓola semmbe mayri
de jawdi laamorɗi maaɗa ɓoɓtee.
12Inan ko Joomiraaɗo wi'i:
Hono no duroowo teetirta koyɗe mbaalu ɗiɗi
naa mbukkudi nowru muuɗum e hunnduko laddeeru nii,
wo noon Israa'iila'en jooɗiiɓe Samariya ɓeen kisinirtee,
ŋappitere leeso e seeɗa daɗɗo tan heddotoo.
13Kettindee de ceedoɗon bone suudu Yaakuuba.
Noon Joomiraaɗo, Laamɗo Jom Kammu e Leydi oon wi'i.
14Nyannde carotoomi Israa'iila saabe hakkeeji muuɗum ndeen,
mi halkan cakkirɗe Baytila.
Luwe sakkirde ndeen kelete de caama e leydi.
15Mi liɓan cuuɗi ceeɗu e ɗi ndunngu fuu.
Cuuɗi nyiɓiraaɗi nyiiƴe nyiibi ɗiin kalkete.
Ɗum laatoto timmoode cuuɗi yimɓe tedduɓe.
Noon Joomiraaɗo wi'i.
Currently Selected:
Amos 3: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022