Mako 9
9
1Niye wambile kukwabo ngayi, “Mwa shikuma nikwamba kukwenu ngayi, kuli bamo bali hano, baya bakabula kufwa, hantu banamono Wene wa Nyambi hiwiza na ngovu.”
Yeshu ukufutuka kubyazima
(Mateo 17:1-13; Luka 9:28-36)
2 #
2Pita 1:17-18. Kunyima ya matena mutanu na umo, Yeshu wapitwile Pita na Yakoba na Yowano, wabatwalile ku lipili lyalitali kwaninkayabo, kuyo akafutukile kubyazima ku meho abo. 3Bivwalo byendi byengile bya kubyazima too. Byatubile shikuma ngayi kowa muntu hano hanci ukutwesha kubitubisha nahiyo. 4Kwaholokele kukwabo ba Eliya na Moshesha, hibambola na Yeshu. 5Niho Pita ambile kuli Yeshu ngayi, “Mulongeshi, shashiwahe ngayi twikale kuno. Pe tutende makunka ahatu, limo linge lyobe, lyamina lya Moshesha na lyamina linge lya Eliya.” 6Pita kaliha walimukile eshe afwanina kwamba, ndaba niye na baminendi, batinine shikuma.
7 #
Mat 3:17; Mako 1:11; Luka 3:22. Niho kwezile likumbi lya bafwikile. Kami lizu lyafumine mu likumbi lyambile ngayi, “Ou niye Mwanami nahaka, muyuvwililenu!” 8Wanguwangu oho bandongesha bapenzele noku, noku, kaliha bamonene muntu wamina ndele Yeshu tuhu wekalile nabo.
9Oho ba kunkulukilenga kufuma ha lipili, Yeshu wabakanishile ngayi, “Hinga mushimikila muntu wamina byuma ebye munamono, hantu Mwana Muntu nashanguku ku bafu.”
10Bombatalile lizu liyo, ngoboni mukati kabo balyambashanine ngayi, “Kushanguka ku bafu nisho shumangani?” 11#Mala 4:5; Mat 11:14. Niho bamwipwile ngayi, “Ndabangani bakakulongesha ndayano bakwamba ngayi Eliya uku fwanina kwiza ha kutatika?”
12Yeshu wakumbwile ngayi, “Mwa shikuma Eliya ukwizangaho, ngayi abalakanye byuma nimwabyo. Haya ndabangani kwatikitiwile ngayi Mwana Muntu unafwanini kuyandishiwa shikuma na kukaniwa? 13Ngoboni nikumitongweza ngayi Eliya unezi mwaka, kami bantu bamutendele nimwamo omu bashingile ngonehe kwatikitiwile byendi.”
Yeshu ukunyongomanisha ndumbana wekalile na mayimbwe
(Mateo 17:14-18; Luka 9:37-43)
14Oho Yeshu na bandongesha bahatu babokele oku kwashalile bamina, bamonene likunge lyalinene lya bantu hinga lya bazinguluka na bakakulongesha ndayano hibalikanangana nabo. 15Oho bantu nimwabo bamonene Yeshu bakomokele shikuma, pe betukilile kukwendi mu kumushangwisha. 16Niho abepwile ngayi, “Ebye mu kulikanangana nabo bishini?”
17Mulume umo mukati ka likunge wakumbwile ngayi, “Mulongeshi nalete mwanami kukwobe, uli na mayimbwe akumukwangisha kwamba. 18Oho amuwananga amuwishilanga hanci, pe amutupwishanga kafulututu ku kanwa na kulikekenya ku mayewe na kuyuminina lutu. Nalombo bandongesha bobe ngayi bawafumishe, ngoboni shilolo batweshe.”
19Yeshu wakumbwile ngayi, “Enu mukoka wakubula kukulupila! Nikekala nenu shikati sha kukuma hati? Nikalilumikila nenu shikati sha kukuma hati? Letenu ndumbana kukwami!” 20Bamuletele kukwendi. Oho mayimbwe amonene Yeshu, wanguwangu anyukwile ndumbana, niho amuwishile hanci, wayile na kwalangana, pe watupwile kafulututu ku kanwa. 21Yeshu wepwile tatiyendi ngayi, “Kati eshe shamubalikile mwaka ngani?”
Wakumbwile ngayi, “Kufuma kuwanuke wendi. 22Kami bikati byabingi amuyumbilanga mu mundilo na mu mema ngayi amunongeshe. Ngoboni ndi ukutwesha kutenda shuma shamina, tuyuvwileko nceshe, kami utuyavwe!”
23Yeshu wambile kukwendi ngayi, “Ingoi, ndi obe ukutwesha, byuma nimwabyo bikutwesheka kuli ou ukukulupila.”
24Wanguwangu tatiyendi uya kanuke wabilikizile ngayi, “Ninakulupili, ngoboni shashishe nyavwe mwanga nikulupile shikuma!”
25Oho Yeshu amonene ngayi likunge lya bantu lili na kwitukila kunebye byatendiwilenga, wakalihilile mayimbwe ngayi, “Enu mayimbwe a shihuhu na a kubula kuyuvwa, nikumyambila ngayi fumenu mumwendi kami hinga mukamubokela!” 26Mayimbwe amukalokeshele, kami amunyukwile shikuma, pe niho afumine mumwendi. Ndumbana wamonekele ngo mutuntu, nohobene babengi bambile ngayi, “Unafu!” 27Ngoboni Yeshu wamukwatile ku liboko, wamwimikile, niho akatukile.
28Oho Yeshu enginine mu litala, bandongesha bendi bamwipwile kwaninkayabo ngayi, “Ndabangani etu twabula kutwesha kuwafumisha?”
29Niho aba kumbwile ngayi, “Mayimbwe a mushobo wanehe kutwesha kufuma nahiya afwako, ndele malombelo na kuzila kulya.”
Yeshu ukwamba kami bya ha lufu lwendi
(Mateo 17:22; Luka 9:43-45)
30Yeshu na bandongesha bendi bafumine kuyo, bayile na kupita mu litunga lya Ngalileya. Kaliha washingile ngayi muntu hinge umo alimuke oku ali, 31ndaba walongeshelenga bandongesha bendi. Wambile kukwabo ngayi, “Mwana Muntu ukapanikiwa mu maboko a bantu, kami bakamuziha, pe ukashanguka kunyima ya matena ahatu.”
32Ngoboni kaliha bayuvwishishile ebye atontwelelenga, kami batinine kumwipula.
Yani wamunene shikuma?
(Mateo 18:1-5; Luka 9:46-48)
33Bezile ku Kapenauma, oho bekalile mu litala, Yeshu wabepwile ngayi, “Bishini munalikananganishinga mu nzila?”
34 #
Luka 22:24. Ngoboni kaliha bakumbwile, ndaba mu nzila balikananganishilenga mukati kabo ngayi yani eze akenge wamunene shikuma. 35#Mat 20:26-27; 23:11; Mako 10:43-44; Luka 22:26. Yeshu wekalile hanci, wehanine balikumi na babili, pe wambile kukwabo ngayi, “Ndi muntu ukushinga kwinga wakutatika nafwanini kwinga wamamaninino, kami enge mukamulimo wabo nimwabo.”
36Waletele kanuke wamushe, wamwimikile hakati kabo. Wamubumbatilile, pe wambile kukwabo ngayi, 37#Mat 10:40; Luka 10:16; Yowa 13:20. “Nimwendi ukatambula umo wa naba batwanuke babashe mu lizina lyami, unatambulu ami. Nimwendi ukuntambula, wufwako kutambula ami, ngoboni natambulu ou wantumine.”
Nimwendi wakubula kutulwisha niye wetu
(Luka 9:49-50)
38Yowano wambile ngayi, “Mulongeshi, twamona mulume wafumishanga mayimbwe mu lizina lyobe, pe etu twamukanisha, ndaba kaliha nengi umo wetu.”
39Ngoboni Yeshu wambile ngayi, “Kaliha mwafwanina kumukanisha, ndaba kowa muntu ukutenda shikomokesho mu lizina lyami, ukutwesha kami na wanguwangu kwamba byabibi hahami. 40Ndaba muntu nimwendi ukubula kutulwisha unengi wetu.#Mat 12:30; Luka 11:23. 41#Mat 10:42. Mwa shikuma nikwamba kukwenu ngayi, muntu nimwendi ukumipanika nkomoki ya mema akunwa mu lizina lyami, ndaba ngayi muli Bakakilishitu mwa shikuma ukatambula ncuungu yendi.
Byezeko bya kutwala ku wubi
(Mateo 18:6-9; Luka 17:1-2)
42“Muntu nimwendi ukapukalisha umo wa babashe aba banakulupili mumwami ngayi batende wubi, shikenga shashiwahe ngayi amangiwe limanya lyalinene mu ncingo na kumuyumbila mu liwate. 43#Mat 5:30. Kami liboko lyobe ndi likukupukalisha ngayi utende wubi, liketule. Ndaba shashiwahe kwingina mu wumi hinga wenga shihole kupitakana kuya na maboko abili mu ngehena, mu mundilo wakubula kuzima. [44Muyo mapila abo a kubula kufwa na mundilo ukubula kuzima.] 45Ndi liwulu lyobe likukupukalisha ngayi utende wubi liketule. Ndaba shashiwahe kwingina mu wumi hinga wenga shihole kupitakana kukuyumbila mu ngehena hinga wekala na mawulu abili. [46Muyo mapila abo a kubula kufwa na mundilo ukubula kuzima.] 47#Mat 5:29. Liho lyobe ndi likukupukalisha ngayi utende wubi litompole. Ndaba shashiwahe kwingina mu Wene wa Nyambi na liho limo kupitakana kukuyumbila mu ngehena, hinga wekala na meho abili. 48#Isha 66:24. Muyo mapila abo a kubula kufwa na mundilo ukubula kuzima.
49 #
Bal 2:13. “Ndaba muntu nimwendi ukayeleshiwa na mundilo, nehe nkombela yikuyeleshiwa na mushele.#9:49Mushele:Bayunda bayeleshelenga zinkombela zabo na mushele, oho shilolo baziyake ha mundilo.
50 #
Mat 5:13; Luka 14:34-35. “Mushele wenga wawutobe, ngoboni ndi mushele unahamuku ukatobalishiwa nahiti? Yikalenu na mushele mukatikenu, kami yikalenu mu ku mwena ku wumo na wamina.”
Currently Selected:
Mako 9: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.