Mako 3
3
Mulume wakunyata liboko
(Mateo 12:9-14; Luka 6:6-11)
1Yeshu kami wenginine mu shinangonge, muyo mu shinangonge mwekalile muntu wakunyata liboko. 2Bantu bamo bamutilaminine na kushinga kumoneshesha ndi ukumunyongomanisha ha Mutena Wakukatala ngayi mwanga bamubangile byambo. 3Yeshu wambile ku muntu wakunyata liboko ngayi, “Katuka wize kuno kumbili.” 4Pe niho abepwile ngayi, “Kati ndayano zikwitabilisha kutenda bihi ha Mutena Wakukatala? Tunafwanini kutenda byabiwahe ndi kutenda byabibi? Tunafwanini kulamwina wumi ndi kuziha?” Ngoboni kaliha bamukumbwile.
5Niho Yeshu aba concomekele na wukali, hinga ayena ndaba ya wukalu wa mitima yabo, wambile ku muntu uyo ngayi, “Olola liboko lyobe.” Wolwele liboko lyendi, pe lyapolele.
6Bafwalishi bafumine mu shinangonge, pe wanguwangu balyambashanine na bantu ba Helonda ngayi mwanga bazihe Yeshu.
Likunge lya bantu ku liziba lya Ngalileya
7Yeshu wafunzukile na bandongesha bendi, bayile ku Liziba lya Ngalileya. Likunge lyalinene lya bantu bafumine ku Ngalileya na ku Yundeya, bamukonkele. 8Bamo bafumine ku Yelushalema na ku Indumeya na mu nciza ya Yondana na mu litunga lya hahepi na Tile na Shindone, bezile kukwendi ndaba bayuvwile byuma byabinene obyo atendelenga. 9#Mako 4:1; Luka 5:1-3. Ndaba ya likunge lyalinene lya bantu, Yeshu watongwezele bandongesha bendi ngayi bamuletele wato, kutina bantu bamushinanisha. 10Ndaba wanyongomanishile babengi, nohobene bakamalweli nimwabo bawulumukilile kukwendi ngayi bamukwate. 11Oho baka mayimbwe bamumonenenga, bawile ku meho wendi, babilikizile ngayi, “Obe uli Mwana Nyambi!”
12Yeshu wacincikile shikuma mayimbwe ngayi hinga amutontolola ku bantu.
Yeshu ukuhata bantumwana likumi na babili
(Mateo 10:1-4; Luka 6:12-16)
13Yeshu wakandamine ha lipili, niho ehanine obo ashingile, pe bezile kukwendi. 14Wahatile balikumi na babili baya atumbile ngayi bantumwana mwanga bekale nendi, ngayi abatume mu ku shimikila, 15pe bakekale na ngovu za kutanda mayimbwe.
16Aba nibo balikumi na babili ahatile, Shimoni (ou Yeshu atumbile ngayi Pita), 17na Yakoba mwana Zebende na Yowano mukonzo wendi (bayo Yeshu atumbile lizina lya Mbowanenga, liyo likutontoloka ngayi, “Bana ba Mushika.”)#3:17 Bana ba Mushika:Kutontolola ngayi bana ba kutinisha ngo mushika wa mvula. 18Anduleu na Fwilipu na Mbatolomewu na Mateo na Tomashi na Yakoba mwana Alufweya na Tandeya na Shimoni Kazeloti, 19na Yundashi Ishikalyote ou wabebele Yeshu.
Yeshu na Mbelezebule
(Mateo 12:22-32; Luka 11:14-23; 12:10)
20Niho Yeshu ayile ku munzi, nohobene likunge lya bantu bakungulukile kami hamo. Yeshu na bandongesha bendi kaliha batweshele hinge kulya. 21Oho bawushinda wendi bayuvwileko, bayile ngayi bakamufumisheko, ndaba bantu bambilenga ngayi, “Unapempele.”
22 #
Mat 9:34; 10:25. Bamo bakakulongesha ndayano bayo bafumine ku Yelushalema, bambile ngayi, “Uli na Mbelezebule, kami ukutanda mayimbwe na ngovu za mwene wa mayimbwe.” 23Niho Yeshu abehanine, pe wambile kukwabo na zinguli ngayi, “Kati Shatana ukutwesha nahiti kutanda kami Shatana? 24Ndi wene ukulitapulula na kulilwisha, uya wene kutwesha ku shuma wufwako. 25Kami ndi litala likulitapulula na kulilwisha, liyo litala kutwesha ku shuma lifwako. 26Kami ndi wene wa Shatana ukulitapulula na kulilwisha, kutwesha ku shuma wufwako ngoboni uli hahepi na kumana. 27Ngoboni kowa muntu wakwingina mu litala lya wa nyala na kupukula byuma byendi, ndele atatike taha kumanga uyo muntu wa nyala nohoboni apukule byuma byendi. 28Mwa shikuma nikwamba kukwenu ngayi, wubi nimwawo na lihandu nimwalyo bikayatiwila. 29#Luka 12:10. Ngoboni ou ukuhandula Moyo wa Kuyela kukayatiliwa wufwako, niye ukekala na mulandu wa wubi wa mwaya myaka.” 30(Yeshu wambile ebye ndaba bantu bamo bambile ngayi, “Uli na mayimbwe.”)
Bamandiyendi Yeshu na bakonzobendi
(Mateo 12:46-50; Luka 8:19-21)
31Niho kwezile bamandiyendi Yeshu na bakonzobendi, bemanine ha munkanda wa litala, pe batumine muntu mukati na kumwihana. 32Likunge lya bantu ekalile nabo mukati bambile kukwendi ngayi, “Bamandiyobe na bakonzobobe bali ha munkanda, ba kukushinga.” 33Pe Yeshu waba kumbwile ngayi, “Kati bamawa na bakonzobami banengi bayani?” 34Niho atilaminine kuli bayo ekalile nabo mukati, pe wambile ngayi, “Aba nibo bamawa na bakonzobami. 35Ndaba muntu nimwendi ukutenda shamutima wa Nyambi, niye mukonzowami na mpanzami na bamawa.”
Currently Selected:
Mako 3: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.