Mateo 18
18
Yani wamunene shikuma
(Mako 9:33-37; Luka 9:46-48)
1 #
Luka 22:24. Shikati shiyo bene bandongesha bezile kuli Yeshu, bepwile ngayi, “Kati yani wamunene shikuma mu Wene wa muyilu?”
2Yeshu wehanine kanuke wamwimikile hakati kabo, 3#Mako 10:15; Luka 18:17. pe wambile ngayi, “Mwa shikuma nikumitongweza ngayi ndi mu kubula kutenguluka na kwinga ngo batwanuke babashe kukengina mu Wene wa muyilu mufwako. 4Nohobene, nimwendi wakulilimbwilisha nehi kanuke ou, niye ukenga wamunene mu Wene wa muyilu. 5Pe nimwendi ukatambula kanuke wamushe wanehe mu lizina lyami unantambulu.
Byezeko bya kutwala ha wubi
(Mako 9:42-48; Luka 17:1-2)
6“Muntu nimwendi ukupukalisha umo wababashe aba banakulupili mumwami ngayi batende wubi, shikenga shashiwahe kukwendi ngayi bamumangilile limanya mu ncingo na kumuyumbila mu limpunga lya liwate. 7Makando ku kaye ndaba ya byuma bikupukalisha bantu ngayi batende wubi! Ndaba byuma ebye binafwanini kwiza, ngoboni makando wendi muntu ukuletesha byezeko.” 8#Mat 5:30. Kami liboko lyobe hinge liwulu lyobe ndi likukupukalisha ngayi utende wubi, liketule, pe liyumbe. Ndaba shashiwahe kwingina mu wumi hinga wenga shihole kupitakana kwikala na maboko abili na kuyumbiwila mu mundilo wa mwaya myaka. 9#Mat 5:29. Kami ndi liho lyobe likukupukalisha ngayi utende wubi, litompolemo, pe uliyumbe. Ndaba shashiwahe kwingina mu wumi na liho limo tuhu kupitakana kwikala na meho abili na kuyumbiwa mu mundilo wa ngehena.
Nguli ya mbelele wakuyongala
(Luka 15:3-7)
10“Keyenu ngayi hinga mukenda umo wa naba babashe. Ndaba nikumitongweza ngayi, mangeloyi wabo muyilu ekalanga shikati nimwasho ku meho a Tate wa muyilu. 11Ndaba Mwana Muntu wezile na kulamwina banayongala.
12“Mukuhanganika nahiti? Muntu ndi uli na bambelele ba mwanda, ndi hanayongala umo kukwabo, kati ukubula ku shiya ba makumi mutanu na anaa na ba mutanu na banaa ku mapili, ha kuya na kushinga uya mbelele umo unayongala ndi? 13Kami ndi unamuwana, mwa shikuma nikumitongweza ngayi, ukawahilila shikuma ndaba ya mbelele umo kupitakana bambelele ba makumi mutanu na anaa na mutanu na banaa banabulu kuyonga. 14Nohobene kaliha sha mutima wa Tate wa muyilu ngayi umo ku naba babashe ayongale.
Kawushinda natende wubi
15 #
Luka 17:3. “Kami ndi kawushinda wobe unakubipishili, uye kukwendi kuwi, pe umutongweze wubi wendi mukati kenu muli babili. Ndi ukakuyuvwa, pe walamwini kawushinda wobe. 16#Nday 19:15. Ngoboni ndi kukuyuvwa wufwako, pitulako umo hinge bantu babili, ngayi shambo nimwasho shishumishiwe mu tunwa twa bapaki babili hinge bahatu. 17Ndi kubayuvwa wufwako, ushimikile litengo, ndi litengo kuliyuvwa wufwako, umwinge ngo mukakubula kukulupila hinge ngo mukakutelesha.
Kumanga na ku mangulula
18 #
Mat 16:19; Yowa 20:23. “Mwa shikuma nikumitongweza ngayi, eshe nimwasho mukamanga hano hanci shikamangiwa muyilu, eshe nimwasho mukamangulula hano hanci shikamangululiwa kami muyilu.
19“Kami nikumitongweza ngayi, ndi babili hakati kenu bakuliyuvwashana hano hanci ha shuma nimwasho bakanyepa, Tate uli muyilu ukabatendelasho. 20Ndaba ngayi oku banakungulukili bantu babili hinge bahatu mu lizina lyami na nami nili mukati kabo.”
Nguli ya mukamulimo wakubula kuyatila
21 #
Luka 17:3-4. Niho Pita ezile kuli Yeshu, pe wamwipwile ngayi, “Mwene, kawushinda wami ndi unambipishili, kati nikamuyatila kanga? Kampe ka mutanu na kabili ndi?” 22Yeshu wakumbwile ngayi, “Kaliha nikwamba ngayi ka mutanu na bibili,” ngoboni bikati makumi mutanu na abili kubihanyisha na bikati mutanu na bibili. 23Nohobene, Wene wa muyilu ukufweka ngo mwene washingile ku mona bakamilimo bekalile na mali endi. 24Oho atatikile kulaba, baletele wamina kukwendi owo wekalile na mukuli wa mali makulukazi likumi. 25Ngoboni wabulile bya kuhingisha, hekulyendi wambile ngayi alandishiwe hamo na mukokwendi na bana bendi na byuma byendi nimwabyo ngayi mukuli umane. 26Mukamulimo wafunkamine ku manungo kumbili wamulambililile ngayi, “Mwene, nyimanine, nika kuhingishila nimwawo.” 27Niho hekulyendi wamuyuvwilile nceshe, wamuyatilile ku mukuli wendi.
28“Ngoboni mukamulimo ou atutikile, wawanine minendi mukamulimo, uya wekalile na mukuli wendi wawushe wa mali ukukwana mwanda, wamukwatile niho amushikile nkozo, pe wambile ngayi, ‘Hingishile mukuli wami.’ 29Minendi mukamulimo wafunkamine ku manungo, wamulambilile ngayi, ‘Nyimanine, nika kuhingishila.’ 30Ngoboni wakanine, pe wamushimbile niho amuyakile mu tolongo, kutwala ku shikati osho akamuhingishila mukuli. 31Oho baminendi bakamilimo bamonene osho shatendiwile, bayenene shikuma, bayile mu ku shimikila hekulyabo ebye byatendiwile nimwabyo. 32Nohobene hekulyendi wamwihanine, wambile kukwendi ngayi, ‘Obe mukamulimo wamubi nakuyatilile mukuli wobe nimwawo, ndaba wandombele. 33Kati kaliha unafwanini ngayi uyuvwile minobe nceshe ngonehe ami nakuyuvwilile nceshe ndi?’ 34Hekulyendi wakalihile, wamutwalile kubakakulama tolongo ngayi bamushushule kutwala ku shikati osho akamuhingishila mukuli wendi nimwawo. 35Nohobene na Tate wa muyilu ukatenda kami kukwendi nimwendi ukubula kuyatila kawushinda wendi na mutima wendi nimwawo.”
Currently Selected:
Mateo 18: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.