Ima̍tiyu 22
22
Wɔ̄chīije yī wɔga yī ɔngrɛ̄ba̍ ɔha̍
(Ilu̍uku 14:15-24)
1Iji̍sɔ̄ɔsi gba̍a bī wɔ̄chīije ɔha̍ kɛlā de āchɛ ɛla̍ā. Anu̍ hɔ̄ ma̍ a̍nɛ: 2“Ɔchwɔ̄lɛ̍ Oro̍ōre̍ yī Ɔwɔ lɛ bāa lɛlā yī ɔchwɔ̄lɛ̍ ɔha̍ nīi yɛ ē ya̍ wɔga yī ɔnyā de ɔyi̍ yī nū ɔnɔ̄ngrɔ̄ɔ ma̍. 3O̍ de a̍chɛ̍ yī nū tɛ̄rɔ̄, ɛ̍lɛ ge̍ gāa ge̍ koko̍o de āchɛ nīi anɔ̍lɔ ka de ɛ̍lɛ ma̍ hīka ɛ̍lɛ ge̍ yewā la wɔga gɛ. E̍ gāa ma̍, āchɛ ɛla̍ā i̍ chikpo̍ ge̍ē wā ni̍. 4O̍ gba̍a wā ge̍ de a̍chɛ̍ yī nū ɛha̍ tɛ̄rɔ̄ hu āchɔga yī nū ka ɛ̍lɛ ge̍ ka de āchɔga ɛla̍ā hīka anɔ̍lɔ de ojōre̍ ya̍ mɛ̍. Anɔ̍lɔ de ɔbi̍yɛna ba̍la egedebi̍ya̍ ohiyē krāa he mɛ̍. Anɔ̍lɔ de ɔjāha̍-ɔjāha̍ wa̍a̍ ti̍kpo̍ chɛ̄ mɛ̍. Ɛ̍lɛ ge̍ yewā la wɔga yī ɔnyā gɛ! 5E̍ gāa ma̍, āchɔga nīi o̍ ka ɛ̍lɛ ge̍ wā ma̍ i̍ ho̍ko̍o tū wā ni̍. Ɔnyɔnyɛ pīya yī u̍ku̍rɔ̍ yī nū: ɛha̍ pīya yī yɛrɔ̄; ɛha̍ pīya yī ɔ̍hi̍ yī wā. 6Āchɛ ehēhī ku̍ a̍chɛ̍ yī ɔchwɔ̄lɛ̍ ɔla̍ā, gwō wā lijē, kpo̍ wā ngmo̍. 7Ɔchwɔ̄lɛ̍ ɔla̍ā de ya̍ ɔtū ngurangura. O̍ de icho̍ojiya yī nū tɛ̄rɔ̄ ge̍ kpo̍ āchɛ ɛla̍ā ngmo̍ cha̍cha̍, de ipwo̍gra yī āchɛ ɛla̍ā ku ɔla̍ tɛri̍tɛri̍. 8Ɔchwɔ̄lɛ̍ ɔla̍ā wā ge̍ hī a̍chɛ̍ yī nū ɛra̍ koko̍o de wa̍ hīka, anɔ̍lɔ de ojōre̍ yī wɔga yī ɔnyā ya̍ mɛ̍. Āchɔga nīi anɔ̍lɔ hɛ̄ra̍ o̍bū ma̍, ɛ̍lɛ i̍ ngma̍ la ɔwā la wɔga yī anu̍ nūma̍ gɛ ni̍. 9A̍chɛ̍ yī anu̍ ɛ̍lɛ ge̍ pīya ga ogblo̍lo̍ nīi ɛ̍lɛ ge̍ hī āchɛ yɛ̄mɛ̄mɛ̄ ɛra̍ wā la wɔga yī ɔnyā. 10A̍chɛ̍ yī nū ɛla̍ā wā ge̍ pīya ga ogblo̍lo̍. E̍ hī āchɛha̍-āchɛha̍ ji nīi e̍ ma̍ ma̍ ɛra̍, āchɛ ɛnɛ̄ɛhɛhi tūla āchɛ ɔdwɔ̄bi̍ bɛ̍ɛ̍. U̍nu̍ ɔla̍ā nīi āchɛ wā ge̍ grēeyī ma̍ de mu bāa ɔkpɔ̍kpɔ̍ ma̍ la āchɛ̄ɛchɛ.
11“Ɔchwɔ̄lɛ̍ ɔla̍ā pīya gāa bɛ̍ɛ̄nɛ̄ ge̍ē jiya āchɔga yī nū ma̍. O̍ ma̍ ɔngrɔ̄ɔ ɔha̍ nīi hɔ̄ abɔ̍ɔ i̍ ru aru̍ nīi alɔngrɛ̄ba̍ ɔla̍ā ru ma̍ ni̍. 12O̍ da ɔ̍ hīka, ‘Ɔya! Kana̍ nīi a ga wā amu nīi a i̍ chī ru aru̍ yī alɔngrɛ̄ba̍ ni̍ ma̍?’ Ɔngrɔ̄ɔ ɔ̍lɔma̍ i̍ hīyɔkɔ yī lɛlɛ̄lā mɛ ni̍. 13Ɔchwɔ̄lɛ̍ ɔla̍ā da a̍chɛ̍ yī nū bɛ̍ɛ̄nɛ̄ hīka, ‘Ala̍ ā wā ɔngrɔ̄ɔ nūma̍ orī la ikpo̍ ɛpɛpa ba̍la abɔ̄, nīi ala̍ ge̍ wu̍ ɔ̄ ta̍anū ga ɛbɛ odobū. Abɔ̍ɔ nīi o̍ ge̍ē gbo ē drɛ̄ɛgba rāngūu a̍nɛ.’ ”
14Iji̍sɔ̄ɔsi de lɛlā nūma̍ chlɛhu̍ bɛ̍ɛ̄nɛ̄ hīka, “Āchɛ yɛ̄mɛ̄mɛ̄ nīi e̍ hī wā ɛra̍ a̍nɛ; āchɛ kplɛ̄ɛ̄ nīi e̍ chī ge̍ē nāa a̍nɛ.”
Lɛlā yī i̍kpa̍da̍ ɔtɔ̍ɔ̄ta̍
(Ima̍aki 12:13-17; Ilu̍uku 20:20-26)
15Āchɛ yī Ifa̍rasīi pīya gāa ge̍ ya̍ ɔmɔ̄miya hɛ̄ɛbɛ ge̍ē trɛ̍ɛda ē gwō Iji̍sɔ̄ɔsi la ikpo̍ yī lɛlā. 16E̍ de a̍chi̍kpo̍ yī wā ɛha̍ ba̍la Āchɛ yī Ihɛ̍rɔ̄ɔdi tɛ̄rɔ̄ ga ɛbɛ yī Iji̍sɔ̄ɔsi ge̍ da Iji̍sɔ̄ɔsi hīka, “Ɔngūlɛ̄lā be̍e! Alɔ jo̍ōkū hīka awɔ - ɔ̄chɛ ɔkɛlā olēchi̍ lēchi̍ nɛ. A ē ngū āchɛ lɛlā yī Ɔwɔ la ɔpɔ̄pū yī nū nīi - olēchi̍ lēchi̍ ma̍. A i̍ ē hi̍yɛ̄ngura yī ɔjā nīi āchɛ ē gbɛri̍ya̍ ma̍ ni̍, wu̍chē oji̍ nɛ, a i̍ ē nāa lɛlā yī rīgā yī āchɛ̄ɛchɛ bāa ɔjɔ̄jā ma̍ ni̍. 17Ka ūkpɔ̄tū yī wɔ de alɔ we̍ e̍ē! Lihɔ yī alɔ ma̍ chɛ̄ ka ɔ̄chɛ ɔ̍lɔ ge̍ ta̍ i̍kpa̍da̍ de Isi̍sa nīi Ɔchwɔ̄lɛ̍ Ɔnɔ̄kɔ̄kū yī ajɛ yī Iro̍om wa̍a̍ ma̍ kɛ̄ɛ o̍ i̍ chɛ̄ ni̍.”
18Iji̍sɔ̄ɔsi je̍ a̍chālā ɔdwɔ̄bi̍ yī wā ɔla̍ā ɔpɔ̄ɔpɛ̄. Wu̍chē yī ɔla̍ā, Iji̍sɔ̄ɔsi da wa̍ hīka, “Ala̍ āchɛ ɔkɛlā ɔha̍ chōo̍chē ya̍ ɔha̍ nūma̍! Oji̍ - ohu̍ nīi ala̍ ē chikpo̍ yī ɔtrɛ̍ɛda gwō u ma̍/? 19Ala̍ ā chabɔ̄ yī okpo nīi e̍ ē bī ta̍ i̍kpa̍da̍ ma̍ hu̍ u we̍ e̍ē!”
E̍ bī ita yī okpo ɔla̍ā ge̍ de ɔ̍ bɛ̍ɛ̄nɛ̄.
20O̍ che wa̍ ikpo̍ hīka, “Īkplɛ̄hu̍ yī ɔ̄nyɛ ba̍la riyī yī ɔ̄nyɛ che ma̍ la okpo ma̍?”
21E̍ ka de ɔ̍ hīka ɔ̍lɔ - iyī Isi̍sa Ɔchwɔ̄lɛ̍ Ɔnɔ̄kɔ̄kū nɛ.
Bū la ɛbɛ ɔla̍ā, Iji̍sɔ̄ɔsi de wa̍ bɛ̍ɛ̄nɛ̄ hīka, “Ɔ̍lɔma̍, ala̍ ā de ɔjā nīi - Isi̍sa ma̍ de Isi̍sa, hɛ̄ɛbɛ nīi ala̍ ge̍ de ɔjā nīi - iyī Ɔwɔ ma̍ de Ɔwɔ.”
22Āchɛ ɛla̍ā plɛ̍ɛ̄lā nūma̍ ma̍, o̍ de ya̍ wā lɛbɛ̍bi̍. E̍ mīyanya hī ɔ̄ pīya bɛ̍ɛ̄nɛ̄.
Lɛlā yī āchɛ ohye̍ēyī la okū
(Ima̍aki 12:18-27; Ilu̍uku 20:27-40)
23I̍chi̍chɛ ɔla̍ā pi̍i̍, Āchɛ yī Isa̍dusīi wā dikpo̍ba̍ Iji̍sɔ̄ɔsi. Aa̍ ka hīka āchɛ ɔ̍lɔ i̍ ge̍ē hye̍ēyī la okū gɛ ni̍ a̍nɛ. 24E̍ da Iji̍sɔ̄ɔsi hīka, “Ɔngūlɛ̄lā be̍e! Ma̍ ko̍ō! Imo̍sīisi kɛlā ɔha̍ hīka, ɔ̄chɛ ɔ̍lɔ ge̍ wu̍ ɔnyā nīi ɛ̍lɛ i̍ ge̍ ma ɔyi̍ o̍bū pīyaku̍ ni̍, ɔɔ̍nɛ̍ yī ɔ̍lɔ ge̍ de onyōkū wu̍, hɛ̄ɛbɛ nīi ɛ̍lɛ ge̍ ma ayi̍ de okū ɔla̍ā. 25Aɛ̍nɛ̍ anāngrɔ̄ɔ āchɛ arāapa ɛha̍ gblāa amu i̍ngɔ̍ɔ īchāha̍. Ɔnyɔ̄nyāku̍ wu̍ ɔnyā; o̍ pīyaku̍, i̍ ma ɔyi̍ ɔha̍lɔha̍ ni̍. O̍ pīya hī ɔnyā yī nū de ɔmache yī nū. 26Iyī ɔmache titi gba̍a de lɛ i̍ngi̍ngɔ̍ɔ, o̍ pīyaku̍ hī ɔnyā de ɔ̄chɛ ɔmɛta̍. O̍ gba̍a lɛ i̍ngi̍ngɔ̍ɔ; kpɛɛ nīi ɔnyā ɔla̍ā bla̍a aɛ̍nɛ̍ āchɛ arāapa ɛla̍ā. 27La ogwīihi yī nū wa̍a̍, ɔnyā ɔlɔjā wā ge̍ pīyaku̍. 28O̍ lɛ i̍ngɔ̍ɔ ma̍, yɛ̄grāa nīi okū wa̍a̍ ge̍ hye̍ēyī ma̍, ɔ̄nyɛ nīi ɔnyā ɔla̍ā re̍ka ɔnyā yī nū labɔ̄-labɔ̄ ma̍? Aa̍ āchɛ arāapa-arāapa chī wu̍ ɔ̄ wa̍a̍ je̍!”
29Iji̍sɔ̄ɔsi hīya aa̍ ɔkɔ, da wa̍ hīka, “Lɛlā yī ala̍ ɔla̍ā i̍ ku ni̍ lachi̍lachi̍! Wu̍chē yī oji̍ nɛ, ala̍ i̍ jyɛ̍ɛ̄lā nīi tū la Īpū yī Ɔwɔ ma̍ ni̍. Ala̍ i̍ je̍ wɔhu̍ yī Ɔwɔ o̍bo̍bū ni̍. 30Wu̍chē oji̍ nɛ, yɛ̄grāa nīi okū wa̍a̍ ge̍ē hye̍ēyī ma̍, e̍ ge̍ē lɛ bāa ayɛ̍ɛ̄chɛ̄rɔ̄ yī Ɔwɔ nīi gblāa abɔ̍ɔ la ichō ma̍: Ɔngrɔ̄ɔ i̍ ē wu̍ ɔnyā ni̍, ɔnyā i̍ ē chī blɛ̍ba̍ ni̍. 31Lɛlā yī okū ohye̍ēyī ma̍, o̍ re̍ka ala̍ i̍ ma̍ Īpū yī Ɔwɔ po̍ lɔkɔ nīi Ɔwɔ ka de ala̍ ma̍ je̍ ni̍? Wu̍chē oji̍ nɛ, o̍ ka hīka,
32“ ‘Ami - Ɔwɔ yī A̍brahāam a̍nɛ
Ami - Ɔwɔ yī A̍yi̍sāaki a̍nɛ.
Ami chī - Ɔwɔ yī Ije̍kɔ̄ɔpu a̍nɛ.’
Ochi̍chi̍ yī ɔla̍ā re̍ka, anu̍ - Ɔwɔ yī āchɛ ɔhɔ̄leyī nɛ; i̍ Ɔwɔ yī āchɛ oko̍ōku̍ ni̍.”
33Alɔgbādu ɔla̍ā wa̍a̍ plɛ̍ɛ̄lā nūma̍ ma̍, e̍ de kpo̍ kwi̍ibū wa̍a̍ wu̍chē lɛlā nīi o̍ ē ngū āchɛ ma̍.
Lihɔ yī Ɔwɔ onīi gɔ̄ga ma̍
(Ima̍aki 12:28-34; Ilu̍uku 10:25-28)
34Āchɛ yī Ifa̍rasīi po̍ hīka Iji̍sɔ̄ɔsi ɔ̍lɔ de Āchɛ yī Isa̍dusīi kla̍ oko̍o ma̍, aa̍ titi tu̍ iyī wā wā ge̍ grēeyī. 35Ɔha̍ yī wā nīi - ɔ̄chɛ ongū Lihɔ yī Iju̍u ma̍ chikpo̍ ge̍ trɛ̍ɛda ē gwō Iji̍sɔ̄ɔsi la ikpo̍ yī lɛlā ɔha̍. 36O̍ da Iji̍sɔ̄ɔsi hīka, “Ɔngūlɛ̄lā be̍e! Lihɔ yī Ɔwɔ ɔna̍ gɔ̄ga wa̍a̍ lipu̍ yī īpū yī Lihɔ yī Imo̍sīisi wa̍a̍ ma̍/?”
37-38Iji̍sɔ̄ɔsi hīya anu̍ ɔkɔ hīka, “Lihɔ yī Ɔwɔ nīi gɔ̄ga chī gba̍a - ɔlamu-ɔlamu gba̍a̍ ma̍ re̍ka, ‘Yɔ̍ɔhɔtū yī Ādā Nīi - Ɔwɔ yī wɔ ma̍ la ūkpɔ̄tū yī wɔ wa̍a̍, ba̍la uhu yī wɔ wa̍a̍, ba̍la ɛri̍ya̍ yī wɔ wa̍a̍.’ 39Ɔmɛpa nīi gba̍a - ɔlamu-ɔlamu gba̍a̍ ma̍ re̍ka, ‘Yɔ̍ɔhɔtū yī ɔ̍nyīmɔ̄chɛ yī wɔ bāa awɔ ɔlɔjā ma̍!’ 40Lihɔ yī Imo̍sīisi mɔri̍mɔri̍ ba̍la lɛlā wa̍a̍ nīi āchɛ ɔkɛrɔ̄ yī Ɔwɔ ngū āchɛ ma̍ de lɛhu̍ che Lihɔ yī Ɔwɔ ɛpa nūma̍.”
Lɛlā yī Ɔhɔ̍ɔnyɛta̍ nīi Ɔwɔ hōhu ma̍
(Ima̍aki 12:35-37; Ilu̍uku 20:41-44)
41Āchɛ yī Ifa̍rasīi grēeyī gblāa abɔ̍ɔ ma̍, Iji̍sɔ̄ɔsi che wa̍ ikpo̍ yī lɛlā nūma̍: 42“Oji̍ nīi ala̍ gbɛri̍ya̍ ku̍ Ɔhɔ̍ɔnyɛta̍ Nīi Ɔwɔ Hōhu Ma̍/? O̍ u̍tu bū la wɔma yī ɔ̄nyɛ ma̍/?”
E̍ ka de Iji̍sɔ̄ɔsi hīka ɔ̍lɔ - ībī yī Ide̍bīidi nɛ.
43Iji̍sɔ̄ɔsi gba̍a che wa̍ ikpo̍ bɛ̍ɛ̄nɛ̄ hīka, “Oji̍ chī - ohu̍ nīi Uhu Ɔnɛ̄ɛhɛhi yī Ɔwɔ ya̍ nīi Ide̍bīidi hī ɔ̄ ka Ādādā ma̍? Wu̍chē oji̍ nɛ, o̍ ka hīka,
44“ ‘Ādā Nīi - Ɔwɔ ma̍ koko̍o de Ādādā
yī u hīka ɔ̍lɔ ge̍ hyāhɔ̄ ma̍ la abɔ̄ līre̍
yī anu̍ kpɛɛ nīi anɔ̍lɔ ge̍ ku̍ aluji yī ɔ̍lɔ tū ɔ̍lɔ la apli̍kpo̍ o̍bū.’
45Ide̍bīidi chī hī Ɔhɔ̍ɔnyɛta̍ Nīi Ɔwɔ Hōhu ma̍ ka ɔ̍lɔ Ādādā bɛ̍ɛ̄nɛ̄ nɛ ma̍, kana̍ nīi o̍ gba̍a chōo̍chē re̍ka ībī yī Ide̍bīidi ji ma̍?”
46Bū la ɛbɛ ɔla̍ā, ɔ̄chɔ̄chɛ i̍ hīya Iji̍sɔ̄ɔsi ɔkɔ yī lɛlā ūkpo̍he mɛ ni̍. Bū la i̍chi̍chɛ ɔla̍ā, ɔ̄chɔ̄chɛ i̍ ya̍akanya che ɔ̍ ikpo̍ yī lɛlɛ̄lā gɛ ni̍.
Currently Selected:
Ima̍tiyu 22: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)