Zákaryâ 5
5
Akat nyí o/ri kyi-kim ne Kiǐbáá-Nwet ńkyí Bufú bu/yip Kánkyí
1Me n/chîtún achi, ne nkéré mún, n/ri kiǐbáá-nwet ńkyí badafút, ńkyí bufú boo/yip kánkyí. 2Orím mú onong ámu o-bí mě o/fu, me n/ri ebóng. Me n-faa ǎ n/fu, kiǐbáá-nwet ńkyí bufú boo/yip kánkyí. Nkyi bamyíta kátángekányi ké butang ne bamyíta banyii ne kyicê ké baryên.
3Ne orím ámu kâng o-sét mě o/fu, ké kiǐbáá-nwet ánkyi, ba/sáng kyishû ńkyí kyi/chi kyi-byí kyi-ta esí ńnyín emúmú. Esim-kiǐbáá-nwet ánkyi ebónge e/sét e/fu, ba/chi ba-fîm onet-kajii nang orá o-byí ké esí ńnyín. Esim nyí ebónge e/sét e/fu, nang yeě nké o/sét kyisédéng o-sem Osówo, ba-fîm m ǎ to o-byí ké esí ńnyín. 4Óburúkpâbí mú o/rêe o-shwôm mu o-sét ng o/fu, nyǐ o/chi o-twóm kyishû ńkyín kyi-ca, ne kyi/chi kyi-nung ké kyise ńkyí nang yeě mú mu o-jii ng kajii, ne ńkyí nang yeě mú mu o-sét ng kyisédéng o-sem m Osówo. Kyi/chi kyi-waa ké byise ebe, kyi-mîng kámbé ké busông.
Akat nyí o/ri kyi-kim ne Onyinyi mú mu ké Kafâ-Kaakye
5Orím mú onong ámu o-chîbyí o-sét mě o/fu, kan achi a-ri, chwǒm kyikíri kyi-kú kyi-bâ.
6Me m-bí ǎ n/fu, ebóng chwǒm.
Nyǐ o-faa mě o/fu, kaakye ńké ka/bwom ké dyishí-[byibî] ḿbyí esí ńnyín emúmú.
7Kaakye ánke ka/mû ne kiinkíbí ńkyí ba/chi ké mbôl. Ńdyí mu n-tún n achi ké nké, kiinkíbí kyi/bâa, n-ri onyinyi ké o/kyú ké kafâ emen.
8Orím ámu o-sét mě o/fu, onyinyi mún o/bwom ké dyishí ńdyí dyityém ebên. Ne orím ámu o-tírîng onyinyi ámu o-fé ké kafâ-kaakye o-níbî kiinkíbí o-cít. 9Ne m-bírî achi kyíbóng n-ri banyinyi ashí afee ké ba/byí ké abyibabang mbe ba-bâ mě ké byiko. Abyibabang ebe a/mû ne busa kanong kanong. Banyinyi ámbe ba-ba-kúng kaakye ánke ba-dim ne nké.
10Me m-bí orím mú onong ámu n/fu, mbe ba-kúng ng kánké ba-jâ nyá ne nké.
11Nyǐ o-faa mě o/fu, mbe ba-jâ ne nké Bábyílon, ké kyikit ńkyí ba/chi ba-bi kyise-kyifen echi ba-tî kánké. Ké nkéré mú kyise-kyifen echi ánkyi kii/man, ba/chi ba-tî kaakye ánke ányi, ba-kûkye kánké ofê.
Currently Selected:
Zákaryâ 5: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985