Mátyuu 13
13
Dyitím-Ekan kyi-kim ne Nkwôn Esang-Byichí
(Mâk 4:1-9; Lûk 8:4-8)
1Ké ochíchí-dyicí ándyi, Jisos o/mîng kyise ánkyi o-dim o-wâa ké bukô-baya, ké kyikit ńkyí o/kyú me o/fu, nyǐ o-tángê e banet. 2Bujê-banet ḿbú bu/wáp ǎ bu-fé ké kafâ bu/mû bu/jang ejê bu-shwôm, kyi-chi ǎ o-nung ké ókpǐ o-kyú me ké mǔ. Bujê-banet ámbu bu-bwom kwán ké bukô-baya. 3Nyǐ o/kúng atím-ekan o-sét kámbé byěm chwóó.
O/fu, onyinchéng obónge o/mû o/dim esang-byichí ekwón. 4Ké nkéré mu o-pwó ng kányí o-câ ké kyifát, esang ekíri e/róng ké kiǐfáng, ne bunurung bu-ba-ryí kányí. 5Ekíri e-róng ké katárábá, ké kyikit ńkyí ecing e*da/jê*. Esang ányi e-byí ochéé óchee, ké ebóng, ecing e*da/tíbî e-jâ kyísí*. 6Ké nkéré mú esû e/byí, e/shí boosu-byichí ámbu. Ne ké ebóng to, eriri ebe e*da/kán e-jâ kyísí kanong* boosu-byichí ámbu bu-jwóm ochéé óchee. 7Esang ekíri e-róng ké byiwong ḿbyí byi/kán byi-tim boosu-byichí ámbu. 8Nké esang ekíri e/róng ké esí nyí enong, ne e-zím barî-esang. Asín akíri a/zím bajam-esang batánge, akíri bajam-esang bachât, ne akíri to esang bujam esim diǐkpú.
9Ne Jisos o-kúlî o/fu, fwôo n̂g atông kâng ba-jwo, â bamu ne atông.
Chwǒm ńkyí kyi/chi ne Jisos o-raa ké Atím-Ekan
(Mâk 4:10-12; Lûk 8:9-10)
10Ne bǎmgbán-Jisos kâng ba-bâ ba-ba-bí ǎ ba/fu, ebóng wo amu a-raa ng ne mbé ké atím-ekan.
11Jisos o-faa kámbé o/fu, byinyídíng ḿbyí mbyi Osówo ké dyityém kyi-kim ne Butu emen, Osówo oo/chi běn ba-nyît kámbyí, nké nyǐ o*da/chi kámbé ba-nyît kámbyí*. 12Ké ebóng, onet mú mu ne chwǒm, Osówo o/chi o-kye ǎ kyi-jê kyi-shwôm éné, eringe nyí o/chi o-firi ne mbyí byi-jê byi-waa kyísí. Nké onet mú o*fí ne chwǒm* Osówo o/chi o-bam nang onyin mú nyǐ mu ne mǔ o-koo. 13Dyishí ńdyí me mu n-raa ng ne mbé ké atím-ekan ndyi něen, mbé ba-tún n, nké baa*ri* ne ba-fwôo n̂g atông, nké baa*jwo* nang dyishí to baa*nyît*. 14Ké bubwô ámbu, ńkyí mkpábé mú odasét byiraa-Osówo, mú odabángê Azáya o/mû o/sét kâng kyi-kim ne mbé nkyi ntûntû. Ńkyí o/fu, Osówo o/fu, ben ba/chi ba-fwôo atông fwôofwôo, nké baa*jwo dyishí*. Ben ba/chi ba-tún túntún, nké baa*ri*. 15Ké ebóng, atyém nyí banet ḿbén nyi a-shwane e, ne baa/tim atông ebe, ba-cít to achi ebe. Â kyi/mû kyi*fí éné* achi ebe a/mû a-rángê e, atông ebe to a/mû a-jwo ng, atyém ebe to a/mû a-kyú u nyí badanyît chwǒm. Ne mbé ba/mû ba/chi ba-bírî ba-kâm mě, ne me m/mû n/chi n-chi kámbé ba-nyange.
16Nké ben bunyîn-dyityém mbu ne ben. Achi enen nyi a-rángê e, ne atông enen nyi a-jwo ng. 17Zîim m̂ ńkyín ba/fu, bamkpábé chwóó ḿbé badasét byiraa-Osówo ne banet-Osówo to chwóó ba/mû ba-ryuu ng kanong kanong ba/fu, mbé ba-ri ng ńkyí ben bamu ba-ri ng, nké ba*da/man eri* ba-jwo to ńkyí ben bamu ba-jwo ng, nké ba*da/man ejwo*.
Jisos o/sét Dyishí kyi-kim ne Dyitím-Ekan ńdyí Nkwôn Esang-Byichí
(Mâk 4:13-20; Lûk 8:11-15)
18Fwôo n̂g atông ba-jwo kâng eringe nyí dyitím-ekan ńdyí nkwôn esang-byichí dyi/byí. 19Banet ḿbé mbe ba-jwo ng Bǎmpém ḿbé Banong kyi-kim ne Butu ḿbú Osówo, nké ba*fí ba-nyît ng dyishí emen* mbe wǎ esang-byichí nyí e/róng ké kiǐfáng. Otu-Byibî-Barím o-bâ o-ba-fîm bǎmpém ámbe, ḿbé ba/mû baa/kwón ké atyém ebe. 20Esang nyí e/róng ké katárábá e/bwom ké banet ḿbé ba/koo Bǎmpém ḿbé Banong ne bunyîn-dyityém ńdyí ba-jwo ng kámbé ba-bâ. 21Nké ba*da/nung kámbé ké atyém ebe kanong kanong* ne baa*rí ka-bwon*. Ne ké nkéré afaníkong nang busông boo/bê ké dyishí ńdyí Bǎmpém ḿbé Banong, mbé ba-mîng abwô omíng. 22Esang nyí e/róng ké byiwong e/bwom ké banet ḿbé ba/jwo Bǎmpém ḿbé Banong, nké ékyíkéré kyi-kim ne ejíí ńnyín, ne kyijé ńkyí esang ejá byi/tim Bǎmpém ḿbé Banong, ne mbé baa*zím byirim*. 23Nké esang nyí nyǐ o/kwón ké esí nyí enong e/bwom ké banet ḿbé ba/jwo Bǎmpém ḿbé Banong, ne ba-jwo dyishí, ne ba-zím byirim. Bakíri ba-zím byirim byi-jê wǎ bajam-byirim batánge. Bakíri bajam-byirim bachât, ne bakíri byirim bujam esim diǐkpú.
Dyitím-Ekan kyi-kim ne Biǐbyâa
24Jisos o-chîtím kámbé dyitím-ekan dyikíri o/fu, Butu ḿbú Osówo mbu wǎ onet mú o/kwón esang-byichí nyí enong ké kyifát emen. 25Buchú bubónge, ké nkéré mú kángkáng banet baa/rí sáre, onet-bushwôn emen o-ba-kwón biǐbyâa ké esang-byichí ányi, o-shwôm o-dim. 26Ké nkéré mú boǒchí ámbu boo/kán, esang e-kpet echi, biǐbyâa ámbyi byi-tông byiko. 27Bǎmgbán-onyinchéng ámu ba-bâ ba-kâm ǎ, ba-sét ǎ ba/fu, bonchí, kyi/mû esang-byichí nyí enong nké wo a/kwón ké kyifát eyên. Aa biǐbyâa to byi/fím nyá. 28Bonchí ebe o-faa kámbé o/fu, onet-bushwôn ejí nké o/chi ńkyín. Mbé ba-bí ǎ ba/fu, wo amu a-ryuu ng a/fu, be byica byi-da-zú biǐbyâa ámbyi byi-pwó kú dí. 29Nyǐ o-faa kámbé o/fu, aa*wááng*. Ké ebóng, ké nkéré mú ba-kú ba-wubi ng kámbyí, katô ba/chi ba-zú to kyicê-esang-byichí cibicibi ne mbyí. 30Mîng n̂g esang-byichí ne biǐbyâa byi-kán cibicibi ne barî tete nkéré mú badabóng esang-byichí. Ne me n/chi n-sét banet ḿbé badabóng kányí n/fu, bazú kpá biǐbyâa ba-bwá kámbyí ké akan akan, eringe nyí badapwó kámbyí ké okwâ. Ne ba-wuri kâng esang-byichí ba-fé kányí ké nkám ejí.
Dyitím-Ekan kyi-kim ne Kaǎsáng-Kyichí ńké badakó Mósatat
(Mâk 4:30-32; Lûk 13:18-19)
31Jisos o-chîtím kámbé dyitím-ekan dyikíri. O/fu, Butu ḿbú Osówo mbu wǎ kaǎsáng-kyichí ńké badakó mósatat, ńké onyinchéng obónge o/kúng o-kwón ké kyifát emen. 32Nké nké ka/sîi ka-shwôm kángkáng esang-byichí. Nké ké nkéré mú kaa/kán, ka-rêe ng ka-shwôm kaǎsáng-kyichí nang kará. Ka-firi kyichí ńkyí kyiryên, fím ányi bunurung bu-ba-kím aju ebe ké byire emen.
Dyitím-Ekan kyi-kim ne Bukye ḿbú badafé ké Berêt ne o-mut
(Lûk 13:20-21)
33Jisos o-chîtím kámbé dyitím-ekan dyikíri. O/fu, Butu ḿbú Osówo mbu wǎ bukye ḿbú badafé ké berêt ne o-mut. Onyinyi o-kúng ng kámbú o-fé ké ńcáng-esang-byichí nyí baa/kwa legelege, nyí badayip ba-chi berêt, tete berêt ámu kángkáng o-mut.
Ńkyí kyi/chi ne Jisos o-raa ké Atím-Ekan
(Mâk 4:33-34)
34Jisos o/raa ké atím-ekan ne o-sét azu-bujê-banet kángkáng byěm ḿbyín. Chwǒm nang kyibónge oo*raa ne mbé* â kyi*fí ké dyitím-ekan*. 35Nyǐ o/chi ńkyín, eringe nyí ńkyí mkpábé mú odasét byiraa-Osówo o/sét, kyidakyú ntûntû. Ńkyí o/fu, me n/chi n-raa ne mbé ké atím-ekan ké nkéré n-kú n-raa ng ne mbé. Me n/chi n-sét kámbé byěm ḿbyí banet ba*da/nyît ne* kyi-fím ké nkéré mú Osówo o/chi ejíí.
Jisos o/sét eringe nyí Dyitím-Ekan kyi-kim ne Biǐbyâa ḿbyí ké Kyifát dyi/byí
36Jisos o-dim kâng o-mîng bujê-banet ámbe ányi, o-jâ ké kafâ-kyise. Bǎmgbán emen ba-dim ba-kâm ǎ, ba-bí ǎ ba/fu, sét bě eringe nyí dyitím-ekan kyi-kim ne biǐbyâa ḿbyí ké kyifát dyi/byí.
37Jisos o-faa o/fu, onyinchéng mú o/kwón esang-byichí nyí enong, ányi Wǎn mú Onet. 38Kyifát, ányi ejíí. Esang-byichí nyí enong, ányi banet ḿbé banjware ḿbé Butu ḿbú Osówo ba/já kámbé. Biǐbyâa, ányi banet ḿbé ba/já Otu-Byibî-Barím. 39Onet-bushwôn-onet ámu mú o/kwón biǐbyâa, ányi Otu-Byibî-Barím. Nkéré mú badabóng esang-byichí, ányi nkuli kyikû-dyicí. Bambông esang-byichí, ányi barím ḿbé banong. 40Eringe nyí badabwá biǐbyâa ba-shí kámbyí ké okwâ, éné to nké kyi/chi kyi-kyú ké nkuli kyikû-dyicí. 41Wǎn mú Onet o/chi o-twóm barím emen ḿbé banong, ne mbé ba/chi ba-fîm kángkáng banet ḿbé mbe ké Butu ḿbú Osówo, ḿbé mbe ba-chi i banet ba-chi i byibî, ba-cibi kámbé kyikit kyibónge ne kángkáng banchi byibî ḿbé áku, 42ba-twóp kámbé ké okwâ ámu mú mu o-mang ng, kyikit ńkyí ba/chi ba-kûtii ba-ryí i asháng. 43Ne banet ḿbé Osówo ba/chi ba-kûsan wǎ óbyísû ké Butu ḿbú Bonchí ebe. Fwôo n̂g kâng atông ba-jwo, â bamu ne atông.
Atím-Ekan Achât
44Butu ḿbú Osówo mbu wǎ chwǒm ńkyí kyinong ńkyí nkyi ké ecing, ké kafâ-kyifát. Ne onet o-da-ri kánkyí, o-bwa ne nkyí kâng o-cít. Ké bunyîn-dyityém ḿbú boo/sú ǎ byiko, o-dim o-da-shee kángkáng byěm ḿbyí mu ne mbyí. Ne o-bwa esim, o-da-ré kyifát ánkyi.
45Butu ḿbú Osówo mbu to wǎ nrê byěm mú mu o-kyé ng byibwáng ḿbyí byidashwane kasî. 46Ké nkéré mú nyǐ o/ri byibónge ḿbyí mbyi byi-nwa ng byi-shwôm, o-dim o-da-shee kángkáng byěm ḿbyí nyǐ mu ne mbyí, o-ré ḿbyí ámbyi ḿbyí mbyi byi-nwa ng byi-shwôm.
47Butu ḿbú Osówo mbu to wǎ kaǎsém ńké ba/fé ké baya, ńké kadakám kángkáng azong-ekworê. 48Ké nkéré mú kaa/sú, bankâm ekworê ba-tut kánké ka-jâ ké bukô-baya, ba-kyú me eringe nyí badakyii ekworê. Ekworê nyí enong e-jâ ké biimbam ebe, nyí e*da/byí ké chwǒm* ba-bwa ne nyǐ ba-pwó. 49Něen nké kyi/chi kyi-kyú ké nkuli kyikû-dyicí. Barím ḿbé banong ba/chi ba-dim ba-da-fîm byibî-banet ké burwám ḿbú banet ḿbé banong, ba-cibi kámbé kyikit kyibónge, 50ba-twóp kámbé ké okwâ ámu mú mu o-mang ng. Ányi nké ba/chi ba-kûtii ba-ryí i asháng.
Ntûntû mú Ofyîfî ne mú Okúri
51Jisos o-bí kámbé o/fu, ben bamu ba-jwo ng dyishí-byěm ḿbyí me mu n-raa ng něen?
Mbé ba-bángê ba/fu, âa, byimu byi-jwo ng.
52Ne Jisos o-faa kámbé kâng o/fu, ńkyín kyi/byí kâng něen kyi/fu, ntánge Byije-Músis nang orá mú oo/kwâa ntûntû kyi-kim ne Butu ḿbú Osówo mu wǎ oyén-kyise mú mu o-fîm m byěm ḿbyí byifyîfî ne ḿbyí byikúri ké nfût mú mu o-rôo ng byěm emen.
Ba/né Jisos ké Názáret
(Mâk 6:1-6; Lûk 4:16-30)
53Ké nkéré mú Jisos oo/tím atím-ekan ńnyín o-mîng, o-mîng kyikit ánkyi. 54O-bwa esim o-jâ ké oshê emen. O-tángê kámbé ké byise-ékwâbashi ebe. Ne banet ḿbé ba/jwo ǎ ké nkéré o/tángê ba/waa ocím ké dyishí fúú. Ba-kpet ebí ba/fu, dyizong-byinyídíng ńdyín nyǐ o/fím ne ndyí nyá. Aa kyi-kim to kâng ne akat emen. 55Nyǐ, *chí wǎn-kápyínta*? Boné emen o*fí o-bángê e Méryi*? Ne Jêmsyi ne Josêf ne Sámon ne Júdas, *chí bwǎn-bané emen*? 56Bwǎn-bané emen ḿbé banyinyi ashí kángkáng ba*fí ba-kyú u nyín*? Byěm ḿbyín něen kángkáng nyǐ o/fím ne mbyí nyá. 57Ne ba-né ǎ kâng.
Jisos o-faa kámbé o/fu, mkpábé mú odasét byiraa-Osówo, ba-kyâ ǎ ofê ké kángkáng byikit, kyi*da/shwôm oshê emen ne kyikû-banet emen nké baa*fé ǎ*. 58Nyǐ o*da/chi byěm-akat ányi chwóó* ké ebóng, mbé ba*da/fé dyityém ne nyǐ*.
Currently Selected:
Mátyuu 13: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985