Matiyə̈ 19
19
Pö ndə̂ Jezü pâ kə̂ kosə̂ tə̂ ndə̂ köchë la ɛ̈chë
(Mar 10.1-12)
1Ndə̂ Jezü gbôtə̂ pö lâme, tche gbô lə̂ gö ndə̂ Galilë, kə̈ ê atə̂pâ cho ndə̂ Judë, dəkalâ ngû ndə̂ Jurudɛ̈n. 2Gbölö kpûlû azü zâ tchêngbâ yê, ânyë tche tchâ andjê lə̂ atə̂kömbô ndə̂ andjê. 3Angâ afarizïɛ̈n nə̂ ndola tchë ndə̂kə̂ vu tchë. Andjë yû tchë päkëdə̂: «Ndïɛ̈ ndə̂ azə̂ zä köbo sə̈ akrə ndə̂kə̂ gro ɛ̈chë ndə̂ yê bëte apö gbɛ̂?» 4Jezü tô rə̂ ndə̂nə̈ sə̈ andjê päkëdə̂: «Pö ndə̂ Mbëtï Ndjapä tô rə̂ alême nyë dɨ̂âbo rə̂? ‹Tə̂ dokʉ̈ nə̈, Ndjapä ndə̂ tche mbô rə gbɛ̂, tche mbö köchë la ɛ̈chë#19.4 Nyë dɨ̈ Jen 1.27; 5.2..› 5Tche tö rə̂ päkëdə̂: Bëte rə̂ kä ndə̂ köchë gboadje tchâtchâ bha nə̈ la anyï nə̈ ndə̂kə̂ sə la ɛ̈chë ndə̂ yê, ânyë andjê bïchuû gbɛ̂ wadje tə̂ akrə balë. 6Käko andjë kä wâ bata tə̂ azü bïchuû-a, praâbalë andjë wâ nə̂ batə̂ akrə balë. Âwâbo pä akrə krʉ tchə̂lə̂ rə ndə̂ Ndjapä ngbô rə̂ ëtâ-a.» 7Afarizïɛ̈n yû tchë päkëdə̂: «Bëte giamâ kä ndə̂ Möyîze zâ köbo sə̈ köchë ndə̂kə̂ za mbëtï ndə̂kə̂ kosə̂ tə̂ sə̈ ɛ̈chë ndə̂ yê ânyë kə̂ gro tchë?» 8Jezü tô rə̂ ndə̂nə̈ sə̈ andjê päkëdə̂: «Bëte gbôgbô su nyê kä ndə̂ Möyîze zâ köbo sə̈ nyê ndə̂kə̂ pa nyë gro aɛ̈chë ndə̂ nyê. Praâbalë rə nə̈ wâbo käko tə̂ dokʉ̈ nə̈-a. 9Më tö rə̂ sə̈ nyê: Âdə ngâ köchë âgro ɛ̈chë ndə̂ yê, ndə̂ tche pûâbo ngâ köchë ngbî pû-î, ânyë köchë nə̈ tô ngâ täfo ɛ̈chë, dëkë tche pû ɛ̈chë ndə̂ ngâ akrə nə̂.»
10 Adjisîpili ndə̂ yê tô rə̂ sə̈ tchë päkëdə̂: «Âdə rə nə̈ âwa käko lə̂ gbâtə̂ köchë la ɛ̈chë, käko âwâbo la köbo nə̈ ndə̂kə̂ pa andjë totə̂ andjê-a.» 11Jezü tô rə̂ ndə̂nə̈ sə̈ andjê päkëdə̂: «Âdə̂âbo azü gbɛ̂ kä âkə̂ dje tchə̂lə̂ pö ndə̂ më tô rə̂ lâme-a, praâbalë kütû azü ndə̂ Ndjapä zâ köbo nə̈ sə̈ andjê ndə̂kə̂ dje tchə̂lə̂ nə̈. 12Bëte arə ndə̂ âmbo pä aköchë toabô aɛ̈chë tô-ê wä ngbî ngbî. Angânə̈ ndə̂ andjë tôâbô aɛ̈chë tô lâme, a zɨ̈ andjê zɨ̈ la rə̂; angânə̈ ndə̂ andjë tôâbo aɛ̈chë tô lâme, bëte a wôn tchâtchâ andjê nə̂; angânə̈ kösə̂ kə̂ to aɛ̈chë bëte pö ndə̂ Gbölö gö-gbïɛ̈ ndə̂ tchêlafô. Akrə ndə̂ tche wâ ndə̂kə̂ dje tchə̂lə̂ pö, äwäpä tche dje tchə̂lə̂ nə̈!»
Jezü la abechë
(Mar 10.13-16; Luk 18.15-17)
13Käko azü nə̂ la abechë sə̈ Jezü ndə̂kə̂ pa tche to könô yê ëpâ andjê lakə̂ to pö sə̈ Ndjapä bëte andjê, praâbalë adjisîpili sə̂ lakə̂ hro la andjê. 14Jezü tô rə̂ sə̈ andjê päkëdə̂: «Nyë gbötə̂ abechë andjë nə̂ pu mê, nyë kïäbô kîtə̂ köbo tə̂ andjê, bëte Gbölö gö-gbïɛ̈ ndə̂ tchêlafô wätə̂ andə̂ andjanə̈ ndə̂ andjë wâ batə̂ abechë lâme.» 15La tchêngbâ nə̈ ndə̂ tche tô könô yê pâ abechë nə̈, tche gbô tchâme kə̈ rô etə̂.
Jezü la ngâ bechë-ɛ̈köchë ndə̂ rə ndə̂ yê wâ tâ
(Mar 10.17-31; Luk 18.18-30)
16Käko ngâ köchë nə̂ ndola Jezü ânyë kə̈ yû tchë päkëdə̂: «Earə̂ kə̂ nyisə̂ rə, tchôtchô rə nə̈bâ kä ndə̂ mê mbo rə̂ ânyë kə̂ gbo tchîsûwu ndə̂ logbɛ̂ logbɛ̂?» 17Jezü tô rə̂ ndə̂nə̈ sə̈ tchë päkëdə̂: «Bëte giamâ kä ndə̂ mo yû mê pâ rə ndə̂ âwâtə̂ tchôtchô nə̈? Kütû rə balë kä ndə̂ âwâtə̂ tchôtchô nə̈. Âdə mo ânyində̂ kə̂ li âtə̂lə̂ tchîsûwu ndə̂ logbɛ̂ logbɛ̂, äwäpä mo mbo rə gundə̂sə̂ ndïɛ̈.» 18Köchë lâme yû Jezü päkëdə̂: «Andïɛ̈ nə̈bâ kä?» Jezü tô rə̂ ndə̂nə̈ sə̈ tchë päkëdə̂: «Amö won-abô akrə wôn-ê, kə̂ puabô ɛ̈chë ndə̂ ngâ akrə pû-î, kə̂ zɨabô ngbä zɨ̂-î, kə̂ moabô yepa mô tə̂ ngâ akrə lə̂ ngbanga-ê, 19amö lusə̂ bha la anyï zə̈, kə̂ nyində̂ ngâ zə̈ akrə batə̂ tə̂ zə̈ la tə̂ zə̈.» 20Bechë-ɛ̈köchë nə̈ tô rə̂ sə̈ tchë päkëdə̂: «Më mbô arə lâme nə̂ gbɛ̂. Giamâ kä âkə̈ wâ ngbânə̈ ndə̂kə̂ pa më mbo rə̂?» 21Jezü tô rə̂ sə̈ tchë päkëdə̂: «Âdə mo ânyində̂ kə̂ dâkâ gbɛ̂, amö gu, kə̂ ka arə gbɛ̂ ndə̂ mo wâ la rə̂, kə̂ kʉ makətche nə̈ sə̈ a-earə̂ yûkü, ânyë kə̂ gbo rə ngbânə̈ bhâ lafô. La tchêngbâ nə̈ mo nə ngbâ mê.» 22Bechë-ɛ̈köchë nə̈ lâme âsə̈ dje rə̂ käko kə̈ gû la nyonyo, bëte tche wä la rə tə̂ gbölösə̂nə̈.
23Jezü tô rə̂ sə̈ adjisîpili ndə̂ yê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, sə̂nə̈ kâkä tə̂ earə̂ rə ndə̂kə̂ li âtə̂lə̂ Gbölö gö-gbïɛ̈ ndə̂ tchêlafô#19.23 Yɛ̈yɛ̈ da 23 lâme nyïndə̂ kə̂ to ndjë rə̂ pä, sə̂nə̈ kâkä tə̂ ngâ earə̂ rə ndə̂kə̂ zatə̂ yê gbɛ̂ sə̈ Ndjapä.. 24Më kä tô rə̂ sə̈ nyê: Sə̂nə̈ kä tə̂ earə̂ rə ndə̂kə̂ li atə̂lə̂ Gbölö gö-gbïɛ̈ ndə̂ Ndjapä, kə̈ rô kə̂ li ndə̂ gia ndə̂ rə̈ yê wû pä chamö lə̂ grʉ̈ masângê.» 25Adjisîpili âsə̈ dje pö lâme käko, tchə̂lə̂ küma andjê gbɛ̂ djîngɨli, ânyë andjë tô rə̂ päkëdə̂: «Käko tchabâ lɛ̂ɛ kä âkə̂ tcha?» 26Jezü wûn andjê zoo ânyë kə̈ tô rə̂ sə̈ andjê päkëdə̂: «Rə ndə̂ sə̂nə̈ kâ tə̂ azü ndə̂kə̂ mbo rə̂, praâbalë sə̂nə̈ kâbo tə̂ Ndjapä-a.»
27Käko Pîêre tô rə̂ sə̈ tchë päkëdə̂: «Ârâ gbötə̂ arə ndə̂ ârâ gbɛ̂, ânyë kə̈ zâ tchêngbâ zə̈, pö ndə̂ ârâ âwa lɛ̂ɛ atöko?» 28Jezü tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Lo nə̈ ndə̂ Modô ndə̂ Akrə ka ndə̂kə̂ sə pâ mbätä-gbïɛ̈ ndə̂ yê, nyënyê lə̂ könô gbɛ̂ tchêpâ nə̈ bïchuû ndə̂ nyë zâ tchêngbâ mê lâme, nyê səadje pâ ambätä-gbïɛ̈ lə̂ könô gbɛ̂ tchêpâ nə̈ bïchuû ndə̂kə̂ wa ngbanga pâ azü pâ mawo lə̂ könô gbɛ̂ tchêpâ nə̈ bïchuû ndə̂ Isarayële. 29Azü gbɛ̂ ndə̂ andjë gbôtə̂ nda ndə̂ andjê, ayîngâ andjê, anyînə̂ andjê, araabha andjê, araanyï andjê, abechë ndə̂ andjê la kɨ̈ndɨ̈ ndə̂ andjê bëte mê, andjê âkä gbo rə lâme sûsunə̈ ngbangbo balë, kə̂ gbo ndjë tchîsûwu ndə̂ logbɛ̂ logbɛ̂. 30Angbängbä azü ndə̂ andjë wâtə̂ küma nə̈, andjê kadje atə̂ ngbânə̈, ânyë angbängbä azü ndə̂ andjë sə̂ atə̂ ngbânə̈, andjê wadje tə̂ azü tə̂ küma nə̈.»
Currently Selected:
Matiyə̈ 19: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.