Matiyə̈ 14
14
Kuzü Jâan-Batîse
(Mar 6.14-29; Luk 9.7-9)
1Tə̂ lo nə̈ lâme, Hërôde Äntïpâse ndə̂ tche wâtə̂ goverenëre pâ Galilë djê apö ndə̂ âkɨ̂ la rə̈ Jezü, 2tche tô rə̂ sə̈ a-earə̂ kə̂ mbo kua tchâtchâ yê päkëdə̂: «Jâan-Batîse kä; tche jô lə̂ kuzü nə̂! Djusə̂nə̈ kä ndə̂ tche wâ la gbôgbô ndə̂kə̂ mbo akpɨ̈ngbɨ̈ rə lâme.»
3Dëkë Hërôde zäma alême sə̈ azü ndə̂kə̂ pa andjë za Jâan-Batîse kə̈ î tchë la djingîli kə̈ yî tchë bhâlə̂ nda kânga. Hërôde känga tchë bëte Hërödîâde ndə̂ tche wâtə̂ ɛ̈chë ndə̂ yîngâ yê Fïlîpe. 4Tche känga Jâan-Batîse bëte rə̂ ndə̂ tche tô rə̂ sə̈ tchë päkëdə̂: «Ndïɛ̈ zâbo köbo sə̈ mö ndə̂kə̂ pa mo to Hërödîâde tə̂ ɛ̈chë ndə̂ zə̈-a.» 5Hërôde nyîndə̂ kə̂ won tchë, praâbalë tche mbö wa ajuîfu bëte andjë wün Jâan batə̂ earə̂ ndə̂ma Ndjapä. 6Dëkë lə̂ köbosə̂ kpülü ndə̂ lö kə̂ zɨ Hërôde, ɛ̈wünrə ndə̂ Hërödîâde dâ ɛ̈ngbä tchâtchu azü ndə̂ Hërôde ê andjê ndə̂ kpülü nə̈. Ɛ̈ngbä ndə̂ yê nə̈ fü tə̂ Hërôde tə̂ gbölösə̂nə̈. 7Käko tche dêba ndə̂kə̂ kʉ rə gbɛ̂ ndə̂ bechë-ɛ̈chë nə̈ yuadje kû nə̈ sə̈ tchë. 8Pâ pö ndə̂ anyï bechë-ɛ̈chë nə̈ tô rə̂ sə̈ tchë, tche tô rə̂ sə̈ Hërôde päkëdə̂: «Amö za küma Jâan-Batîse sə̈ mê lə̂ kpângbâlâ chembë tchâtə!» 9Nyonyo mbô gbïɛ̈ nə̈, praâbalë tə̂ pö ndə̂nə̈ ndə̂ tche dêba tchâtchu azü gbɛ̂ ndə̂ tche ê andjê ndə̂ kpülü nə̈, tche zâma ndə̂kə̂ za küma Jâan sə̈ tchë. 10Tche wân ngâ akrə bhâlə̂ nda kânga ânyë akrə nə̈ ê kə̈ kû küma Jâan-Batîse, 11tche zâ rə̂ lə̂ kpângbâlâ chembë, kə̈ nə̂ la rə̂ ânyë kə̈ zâ rə̂ sə̈ bechë-ɛ̈chë nə̈. Bechë-ɛ̈chë nə̈ ê la rə̂ sə̈ anyï nə̈. 12Adjisîpili ndə̂ Jâan nə̂ kə̈ zâ krʉkrʉ yê ânyë kə̈ chî rə̂. Pânə̈ andjë ê kə̈ tô pö ndə̂nə̈ sə̈ Jezü.
Jezü kʉ̈ kɨ̈zɨ̂ sə̈ kpûlû azü sâke mïndûu
(Mar 6.30-44; Luk 9.10-17; Jan 6.1-14)
13Ndə̂ Jezü djê pö lâme, tche âlafô la kütû yê kə̈ â lə̂ külû ndə̂kə̂ e bhâsə̂ ngâ tchô ndə̂ âwâtə̂ kpaɛ̈gâ. Kpûlû azü âsə̈ dje rə̂ pä tche rô nə̂ etə̂, andjë wûtu lə̂ agö ngbî ngbî ânyë kə̈ zâ tchêngbâ yê la da andjê. 14Ndə̂ Jezü wûtu lə̂ külû nə̈, tche wûn kpûlû azü nə̈. Nyonyo andjê mbô tchë ânyë tche tchâ tə̂kömbô ndə̂ andjê.
15Ndə̂ lo zɨ̂, adjisîpili ndə̂ Jezü nə̂ ndola tchë ânyë kə̈ tô rə̂ sə̈ tchë päkëdə̂: «Lo zɨ̂ nə̂, ânyë tchô âtə, azü mbôâbo gö tâ-a. Amö gro azü nə̈ andjë gû atə̂lə̂ ayɛ̈yɛ̈ gö, kə̂ yo kɨ̈zɨ̂ ndə̂kə̂ zɨ rə̂ bhâye.» 16Jezü tô rə̂ sə̈ andjê päkëdə̂: «Âwâbo pä andjë gu-a. Nyënyê la tə̂ nyê kä ndə̂ âkʉ kɨ̈zɨ̂ sə̈ andjê.» 17Andjë tô rə̂ ndə̂nə̈ sə̈ tchë päkëdə̂: «Ârâ wä kütû la mâpa mïndûu la agiangû bïchuû tchâtə.» 18Jezü tô rə̂ sə̈ andjê päkëdə̂: «Nyë kä la rə̂ sə̈ mê.» 19Pânə̈ tche zâma sə̈ azü nə̈ ndə̂kə̂ pa andjë sə bêche pâ abë. Tche kʉ̂ mâpa mïndûu la agiangû bïchuû nə̈, kə̈ kênga la yê atə̂ lafô, kə̈ ê tchôtchô pö pânə̈. La tchêngbâ nə̈ tche tchô tchə̂lə̂ mâpa nə̈, tche kʉ̂ rə̂ sə̈ adjisîpili, ânyë andjë krʉ̂ tchə̂lə̂ nə̈ tə̂ azü nə̈ gbɛ̂. 20Azü gbɛ̂ zɨ̂ rə tchə̂lə̂ andjê sɨ̂-î. Adjisîpili rʉ̂â adɨ̂ andöma nə̈ âsɨ̂ gbasa lə̂ könô gbɛ̂ tchêpâ nə̈ bïchuû. 21Azü gbɛ̂ ndə̂ andjë zɨ̂ kɨ̈zɨ̂ nə̈, andjë wä gbɛ̂ azü ndola sâke mïndûu. A dɨ̂âbo aɛ̈chë la abechë-a.
Jezü nə̈ pâ gbölö kpakpa ngû
(Mar 6.45-52; Jan 6.15-21)
22Kpro la tchêngbâ nə̈, Jezü zâma sə̈ adjisîpili ndə̂ yê pä andjë a lə̂ külû kə̈ zû dokʉ̈tchê tə̂ yê dəkalâ gbölö kpakpa ngû nə̈. Tche sə̂ andə̂ yê nə̈ ndə̂kə̂ mbo rə̂ pä kpûlû azü nə̈ gu atə̂ndə̂ andjê. 23Pânə̈ ndə̂ tche mbô rə̂ pä kpûlû azü nə̈ gu, tche kênga atə̂lə̂ küma aga ndə̂kə̂ to pö sə̈ Ndjapä. Ndə̂ tchô bû, Jezü sə̂ tchâme la kütû yê. 24Külû nə̈ rô nə̂ tʉ̂rʉ tə̂ maga gbölö kpakpa ngû nə̈. Yi sə̂ lakə̂ ka la andjê kä atə̂ ngbânə̈ ânyë kpabe nə̈ sə̂ lakə̂ bhi ma külû nə̈. 25Ndə̂ tchə̂lə̂ bütchî ndô tə̂kə̂ ro, Jezü ê pu adjisîpili ndə̂ yê lakə̂ nə la da yê pa ngû nə̈. 26Ndə̂ andjë wûn tchë ndə̂ tche sə̂ lakə̂ nə pâ ngû nə̈, tchə̂lə̂ küma adjisîpili djîngɨli, ânyë andjë tô rə̂ päkëdə̂: «Ngâ tchozö kä!» Wawa mbô andjê ânyë andjë tâ wârə̂. 27Kpro la tchêngbâ nə̈, Jezü tô rə̂ sə̈ andjê päkëdə̂: «Su nyê zɨ̈ tɨ-ë, mëmê kä! Wawa mböäbô nyê mbô-ê.» 28Pîêre tô rə̂ sə̈ tchë päkëdə̂: «Gbölö Gbïɛ̈, âdə momö kä tə̂ lëge nə̈, amö zama ndə̂kə̂ pa më nə pâ ngû nə̈ ndə̂kə̂ e pu mö.» 29Jezü tô rə̂ ndə̂nə̈ sə̈ tchë päkëdə̂: «Nə atâ!» Pîêre wûtu lə̂ külû nə̈ kə̈ sə̂ lakə̂ nə pâ ngû nə̈ ndə̂kə̂ e pu Jezü. 30Ndə̂ tche wûn yi ndə̂ âsə̂ lakə̂ mbo tə̂ gbölösə̂nə̈, wawa mbô tchë ânyë tche sə̂ lakə̂ mindi. Tche tâ wârə̂ päkëdə̂: «Gbölö Gbïɛ̈, tcha mê lə̂ kuzü!» 31Tchâme, Jezü yî könô yê sə̈ Pîêre, kə̈ zâ tchë ânyë kə̈ tô rə̂ sə̈ tchë päkëdə̂: «Momö, kə̂ za su zə̈ sə̈ mê wä kpîɛ̂kpîɛ̂ rə̂! Bëte giamâ kä ndə̂ su zə̈ wâ bïbïchuû pâ mê?» 32Ndə̂ andjê bïchuû gbɛ̂ â lə̂ külû nə̈, yi nə̈ krʉ̂-ê. 33Pânə̈ adjisîpili ndə̂ andjë sə̂ lə̂ külû nə̈ gʉ̂te tchâtchâ yê ânyë kə̈ tô rə̂ sə̈ tchë päkëdə̂: «Tə̂ lëge nə̈, mo wätə̂ Modô ndə̂ Ndjapä!»
Jezü tchä a-earə̂ tə̂kömbô lə̂ gö ndə̂ Jënëzärête
(Mar 6.53-56)
34Pânə̈ andjë zû dəkalâ gbölö kpakpa ngû nə̈ kə̈ wûtu bhâlə̂ agö ndə̂ Jënëzärête. 35Azü ndə̂ tchô nə̈ lâme wûnsə̂ Jezü nə̂. Andjë ê lakə̂ to pö ndə̂ yê kulə̂ agö nə̈ pä Jezü kä tchâtə, ânyë a nə̂ la a-earə̂ tə̂kömbô sə̈ tchë. 36Andjë dɨ̂ tchə̂lə̂ ma andjê sə̈ tchë ndə̂kə̂ pa tche gbotə̂ andjê, andjë grʉ̂ kütû mbämbä ma lə̂ba ndə̂ yê! Azü gbɛ̂ ndə̂ andjë grʉ̂ rə̂, andjë tchâ-ê.
Currently Selected:
Matiyə̈ 14: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.