2 Ilmakabayo 10
10
Enkitisinyata e nkaji e Nkai
(1 Mak 4.36-61)
1Neriko Olaitoriani Yudas Makabayo tenebo o ltung'ana lenyena neitoki akordu enkaji e Nkai o enkanasa e Yerusalem. 2Neng'er, neinyal ilpereren ootesheta ilomon te wueji nemirishoreki neinyal sii ae wueji nateshetaki naseremishoreki. 3Neitisiny enkaji e Nkai neshet likae perere lo lasar, neinok enkima neitayu olasar le dukuya tiatua erishata oo larin aare leitu aikata eitokini aitayu neinok iltaai neyau imukateni naaitisinyaki. 4Ore pee eidip ataasa kuna pooki neirrag te nkop neomon Enkai pee meitoki anyorraa metaasata mbaa torrok anaa naataasate. Neomon sii pee etum olng'ur te neitoki aitame ing'ok neidim anyaaki atasa te siadi, pee meitoki aitarasaki inkaik iltung'ana arruok oomor Enkai nemeeta enkanyit. 5Neitisiny enkaji e Nkai te nkolong e tikitam o miet to lapa le Kislef, ina olong olapa naisarkenio iloreren enkaji e Nkai. 6Neshipakino osirua inkolongi isiet anaa enashipakino osirua loo lng'oborri. 7Ore eibung'ita mbenek naashal o lng'osil loo ntiyan nerany isinkoloitin le nkisisa eisho enashe ilo oidimie enkaji enye e nkomono meitisinyi. 8Nemut to ratioti otoning'okinote te oshoto e nkukuo nejo paa ore olosho pooki lo Lyahudi neibung nena olong'i to lari ake pooki.
Etagoro Tolemi Makaron kewan
9Ena enkiting'oto e Antioko oji Epifana. 10#1 Mak 6.17Aikinosu naa mbaa naataasate tiabori Antioko Epatori enkerai e ilo tung'ani lemeyanyit Enkai, naa aikidol te ndorropo intorok naayawua olarrabal lenye. 11Ore pee eitaae olaiguanani negelu oltung'ani obo oji Lisia meta olaitaisheikinoni lo mbaa e nkop neeku olgafanai le Siria kitok o Foinike 12kake mme Tolemi Makaroni olaa ninye olgafanai lee dukuya oitasa Ilyahudi esipata nererioo mbaa torrok naaitaasaki ninche. 13Ore te nkaraki ina, nepuo ilchoreta lo laiguanani Epatori neitang'or Makaron aajo olaitang'oroni amu eilanya ninye olemankale le Kupro ina naitarasaka olaiguanani Filometo le Misiri meitoria. Neipot pooki ng'ae Makaron ajo olaitang'oroni neitu eitoki aisho enkanyit neishiakino enkitoo ometooko esayiet aar kewan.
Eisulie Yudas Makabayo ile Idumea
(1 Mak 5.1-8)
14Ore pee eitaae Gogia olgafanai le Idumea neing'uraki kewan isikarini o nareta, nearare Ilyahudi too rishat pooki. 15Ore te pooki neibung iwuejitin e tipat neisilisil Iyahudi neitoomon lelo ooisika te Yerusalem nenyok te pooki aitasapuk olarrabal. 16Ore pee eidip Yudas Makabayo o ltungana lenyena atoomon Enkai neipang'u te siokinoto nerasaki te ngolon emanyisho o Ile Idumea. 17Neriny siadi lelo sikarin apa oorripito isunta neibung inkanas near metuata iltunga'na inkalifuni tikitam. 18Neisik isikarini oobaya inkalifuni naudo mang'ati neisudori too ltaleta oogoli oaare netii pooki tooki nayieu o larrabal. 19Nelo Yudas kulie weejitin naayieunyeki apa te siokinoto neing'uaa Simion o Yosef tenebo o Sakayo o ltung'ana lenyena. Aisapuk apa ina jore enaaidim atamuata ilmang'ati, 20kake eetae ilkuti lewa le simion ooisepe ore pee eishori ilkiloi intomoni ile oong'uan le nkosholai neinguiki embata ooo lmang'ati meisika. 21Ore pee ening Yudas enataase neiturrur ilarikok le njore enye nelikio lelo lewa onyor eropare otungueikitia ilmang'ati pee erinyokino aarare ninche. 22Near metuata lelo ootalakutua ilmangati, ore te siokinoto neibung isempewueti are. 23Ore to larrabali pooki neisulie Yudas teina rasakinoto, near metuata iltung'ana inkalifuni tikitam ootii nene wuejitin are neegol.
Etimira Yudas Timoteo to larrabal
24Ore Timoteo otimira Ilyahudi te dukuya, neiturur isikarini akedok loo mbartan ooing'uaa Asia, o sikarini kumok maisero neigutaki eterretene pee erasaki Yudea. 25Kake ore epunyakita ilmangati, neomon Yudas o ltungana lenyena Enkai neishop irkuniyani neelie ate nkulupuok ilukuny enye, 26neeirrag to lkedet lo lasar neomon Enkai meidimie metareto to larrabal lo lmang'ati lenye, anaa enaisiligie to nkitanapat enyena. 27Ore pee eidip aatoomon, nedumu inareta enye, nepuo aalakuaniki te Yeruslem, neitashe te mbata o lmangatinta. 28Ore pee emanaa enkakenya neiteru olarrabal. Ore enjore oo Lyahudi neng'idare empijan enye o siligi lenye to Laitoriani pee emirisho, kake ore lmangati neng'idare enkariyiano o larabal o mpijan enye. 29Ore pee eirowuaju olarrabal, nedol olmang'atinta ilewa miet oikishiaan ooing'uaa keper ooreuta mbartan neibung'ita ingusidin e saabu, erikito isikarini loo Lyahudi. 30Neman lelo lewa miet Yudas, nerrip too long'oi enye, neng'or ilmang'ati to mbaa. Nemilo isikarini lo lmang'atinta neidapasha, nedung'udung Ilyahudi ninche, 31near metuata isikarini inkalifuni tikitam o iip miet o sikarini oked imbartan iip ile. 32Neilanyisho Timoteo nelo ewueji eseriani naji Gasara, natii tiabori Kaerea, olalashe le Timoteo. 33Neman Yudas Makabayo ina anasa inkolongi onguan, 34ore iltungana ootii atua enkanasa nening etii eseriani nepuo dukuya aamor Enkai neiro irorei torrok. 35Ore te nkolong e miet, tadekenya negoro iltung'ana le Yudas te nkaraki emoroto namoritoi Enkai, neked esuntai te mpijan neidakie pooki toki naineputua. 36Neked kulikae isunta tiaishoto nepejoo isempewueti pooki. Nenya enkima ilmang'ati kumok. Ore ae jore oo sikarini negil inkutukajini neyau isikarini meibung'a ina anasa. 37Near metuata Timoteo tenebo o lalashe lenye Kaerea o Apolofane. 38Ore pee eishunye olarrabal, neshipakino Ilyahudi, nerany isinkolioitin le nashe to Laitoriani oishoo ninche emirishoi.
Currently Selected:
2 Ilmakabayo 10: BIBLIACATHO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2018