Zak 14
14
Dɛnaa Lawa n kii biɛ tán tumaa la
1Á ke, Dɛnaa Lawa a lɛawaa diri.
Zeruzalɛmu minin lɛn,
ǹ tá re die kaa naforo gii kɔn
ka yii giulun.
2Ma á re tɔrɔn tumaa soekɔn
ǹ yoo kaa kiwi gialaa.
Ǹ tá re Zeruzalɛmu kiwi kuĩ,
ǹ na a gɔn mànan kokoo
a kionən ne.
Ǹ tá re ǹ lɔn kuĩ ka pàã nɛ.
Ǹ tá re ǹ zaman talɛɛ goɛ ǹ wo ǹ ne,
sɛnɛ, ǹ gialakun kɛ á re goɛ̃ kiwi lɛ nɛ.
3Dɛnaa Lawa tɔn zia baa
tɔrɔn gialakunun kɛn ganaa,
ka a bɛ́ zia biɛ lɔn lɛlɛ,
zia biikoo li.
4Bɛa pinaa, a n die gisĩ Olivə kele la,
kunu Zeruzalɛmu kiwi ganaa,
a lɛ̀giala gɔn la.
Olivə kele lɛ n die wɔsɛ a bii ni,
a nyankɔrɔ gole goon bɔ,
a kũ lɛ̀giala ganaa a wo lɛ̀nyɛɛn yaa.
Kele lɛ paǹ goon nə woe gɔsɛ
a lɛ̀gɔn la,
goon dɔ wo gusin a lɛ̀gɔn la.
5Bɛa nyankɔrɔ lɛ kɛ lɛ kelen lɛn bii ni,
ka n die baa sii ka bɔ ka bɛ lɛ nɛ,
a giala, a n woe yǎa Asali.
Ka n die baa sii,
ka ka digolon wɔ bɛ́ lɔn,
Zudaan kii Oziasi a waáraa,
tán a bìn diɛ pinaa.
A da yaa, Dɛnaa Lawa,
maa Lawa n die die
ka a lon a dia dí-a wolen kɛn tumaa nɛ.
6Bɛa pinaa,
laadoo ba re doe wɔlɔ fúlu ganaa wa.
Nyan ba re boe doo wa,
mu á re nyuù we tán la doo wa.
7Ǹ kɔn pinaa,
Dɛnaa Lawa dinsɔɔ̃ n bɛ doɛ̃,
lɛawaa n die goɛ̃ a tan duduu.
Min ba re lɛawaa a bɔ kɔnlɛ
doɛ̃ ka tèlò-n wa.
Haalɛ wasamiɛ̃nɛ, wɔlɔ n tɛ pii.
8 #
Eze 47.1; Zaã 7.38; SNS 22.1 Bɛa pinaa lɛ nɛ,
mu fu paɛ̃paɛ̃ tá re pìã woɛ̃ tán Zeruzalɛmu.
A mu lɛ a talɛɛ n die baa sii
a wo Yìsi mu kɔsɛ kɔsɛ ganaa,
a talɛɛ kɔsɔ ke,
bɛ n die woe Yìsi mu gole ganaa,
a baa si lɛ̀ tumaa gɔ́ɔ̃ nɛ,
taãlan laanka bɔ̀nɔn.
9Dɛnaa Lawa n die kii biɛ
tán tumaa la.
Bɛa pinaa,
Dɛnaa Lawa n die goɛ̃ goon toto,
a tɔ dɔ n die goɛ̃ goon toto.
10Bǎã mɛn din tumaa bɛ́ Zeruzalɛmu lɛnpɛnɛ,
bɛn tumaa á re n bɔyɛɛ ǹ bɔmɔ lɛ baa,
a kũ Gebaa ganaa gɔsɛ a lɛ̀gɔn la,
a wo Rimɔn yaa gusin a lɛ̀gɔn la.
Zeruzalɛmu á re goɛ̃ lon
a la bǎã kɔsɔn kɛn manɛ.
Kiwi lɛ á re n lɛ boe,
a saa Bɛnzamɛn tɔrɔn kiɛnlɛ kɛ ganaa,
a wo yǎa kiɛnlɛ bibinaa bǎã kɛ li,
yǎa gùrù pusu ǹ kiɛnlɛ kɛ li,
a kũ Hanaaneyeli a sanabolo kɛ ganaa,
yǎa kii a rezɛ̃ mu bɔ ǹ bǎã kɛ nɛ.
11 #
SNS 22.3
Minin tá re giɛ̃ kiwi lɛ nɛ,
a ba re n yui doo wa.
Minin tá re giɛ̃ a nɛ yii-nyɛɛ la.
12Tɔrɔn mɛnɛn nə wo Zeruzalɛmu zia baa,
Dɛnaa Lawa bɛ́ re koe mɛn diɛ
ǹ mìi ni, á ke:
Ǹ gɔ̀nɔn siĩ á re boɛ̃,
a ǹ toa ǹ yii n koo.
Ǹ yiin tá re boɛ̃ ǹ yii yalan nɛ,
ǹ lɛwɔn nə bɔɔ̃ ǹ lɛ-n.
13Bɛa pinaa lɛ nɛ,
Dɛnaa Lawa á re nyín-soo gole
diɛ ǹ ganaa.
Ǹ tá re yui kɔn gialaa,
didie tumaa laanka ǹ miãkɛn.
14Zudaa minin tá re
zia biɛ Zeruzalɛmu kiwi.
Ǹ tá re ǹ miãkɛnɛn naforon
tumaa sii ǹ la:
Sana nɛ, wɔrɔ nɛ,
ka mɔnaa damata nɛ.
15Koen mɛnɛn nə bɔ minbuiin nɛn ganaa,
a din koen lɛn man die boe
ǹ tɔɔn tumaa ganaa ǹ giã ǹ bǎã nɛ:
Ǹ sùin laanka ǹ dundun sùin ni,
ǹ nyɔɔmaan laanka ǹ dundunun ni,
a din koe goon lɛ-n boe ǹ ganaa.
16 #
LWS 23.39-43
Bɛa waáraa kəni,
tɔrɔn mɛnɛn nə zia da
Zeruzalɛmu ganaa,
bɛn min mɛnɛn yii bɛ́ tɔn koo,
lɛ̀ woo lɛ̀,
ǹ tá re woe Zeruzalɛmu kiwi,
ǹ kaa tán a kii,
Dɛnaa Lawa Pàãyiidɛnaa giulun
ǹ *giã siã giulun zɔ́n zɛnaa.
17Bɛ̀ tán a tɔrɔn kɛn goon wo
Kii Dɛnaa Lawa Pàãyiidɛnaa
guguru kɔ Zeruzalɛmu wa,
la á re kiɛ ǹ gána-n wa.
18Bɛ̀ Ezipti minin nə́ n piã
ǹ wo Zeruzalɛmu wa,
koe á re ǹ yii,
koe mɛn bɛ́ Dɛnaa Lawa n die diɛ
tɔrɔn kɛn mìi ni,
ǹ mɛnɛn bɛ́ ǹ ba re woe
giã siã giulun zɔ́n lɛ zɛnɛɛ wa.
19Bɛ n die dɔlɔ biɛ Ezipti gána ganaa,
ka tɔrɔn mɛnɛn bɛ́ ǹ ba re woe bɛa zɔ́n lɛ zɛnɛɛ wa.
20Bɛa pinaa,
haalɛ toolon mɛnɛn bɛ́ sùin bɔlɔ-a,
ǹ tá re kiɛ̃ bɛn ganaa:
"Dɛnaa Lawa wɔn".
Donkolon mɛnɛn bɛ́ Lawa a kion,
bɛn dɔn tá re màn sonboren biɛ ka
mà pɛsɛ̃ ǹ taãnan kɛn bɛ́ lɔn,
*wúlu bɔ ǹ bǎã yɔrɔ-a.
21Donkolonon mɛnɛn bɛ́
Zeruzalɛmu ka Zudaa gána nɛ,
bɛn tumaa n die goɛ̃
Dɛnaa Lawa Pàãyiidɛnaa wɔ lɛa.
Min mɛnɛn bɛ́ re die wúlu boe,
bɛn tá re ǹ siĩ kɔrɛɛ ǹ nɛ.
Bɛa pinaa lɛ nɛ,
pii-kɔle goon din ba re yii
Dɛnaa Lawa Pàãyiidɛnaa
a kion wa.
Currently Selected:
Zak 14: SBPE2011
Highlight
Share
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.