A Sofoni 3
3
Toog sẽn wat Zeruzalɛm nebã zugu
1Toog bee tẽng ning sẽn yaa a tõatã zugu,
bala, yẽnda nebã rẽgma b mense,
la b maand taab pãnga!
2Bãmb ka sak n kelg Sẽn-Ka-Saabo,
la b ka sak n deeg b remsgã ye.
Bãmb ka sak n teeg Sẽn-Ka-Saab ye.
La b ka kolg b Wẽnnaamã ye.
3Bãmb nanambsã sẽn be b sʋkã wẽnda
wa gɩgmã sẽn kelemde,
la b bʋ-kaoodbã yaa wa zaabr rigd-n-yĩidsi,
bãmb ka yõkd n wãb n kell beoog yĩng ye.
4Bãmb no-rɛɛsdbã yaa bi-beese,
la zãmb dãmba,
bãmb maan-kʋʋdbã rẽgemda bũmb nins
sẽn welg toor Wẽnnaam yĩngã,
la b kɩɩsd tõogã.
5La Sẽn-Ka-Saab yaool n bee tẽngã pʋga,
n yaa tɩrlem soaba, la b ka maand sẽn ka zems ye.
Yibeoog fãa, bãmb pukda b tɩrlmã n ka basdẽ ye.
La nin-wẽng ka mi yãnd ye.
6Sẽn-Ka-Saab yetame:
«Mam menesa soolem wʋsgo,
mam sãama b lalsã gõdsẽ gãsdã,
mam kɩtame tɩ b soayã lebg vɩɩdo,
tɩ ned ka leb n kẽnd soayã zut ye.
B tẽmsã fãa sãamame tɩ ned ka leb n be b pʋsẽ ye.
7Mam dag n yetame tɩ Zeruzalɛm nebã
na n zoeẽ-la maam, la b sak m demsgã,
woto, mam dag n kõn menesẽ-b ye.
La wakat fãa mam sã n sɩbg-ba,
b ket n kẽngda taoor ne tʋʋm-wẽnsã maanego.»
8Dẽ wã, Sẽn-Ka-Saab yetame:
«Beneere, gũ-y daar ning mam sẽn na n yik
n bʋ ne yãmbã,
bala, mam yãka yam n na n tigim bu-zẽmsã,
la m tigim soolem toay-toayã,
n dok m sũur ne-ba, tɩ m sũ-kãbrã rɩ-ba.
Bala, mam sũ-puugrã bugum na n dɩɩ dũniyã zãnga.»
Buudã fãa yam tekre
9«Dẽ, mam na n yɩlga buudã fãa nobɩmsã,
tɩ b fãa tõe n waoog maam a Sẽn-Ka-Saab
ne yam a yembre.
10Baa mam neb nins fãa sẽn sãeeg
n be Kuus kʋɩlsã rʋʋndã na n waa ne kũuni,
n wa waoog maam.»
Israyɛll bu-kellã yam tekre
11«Badaare, mam nebã!
Yãnd kõn leb n yõk yãmba,
tʋʋm nins yãmb sẽn maan n kɩɩs maamã yĩng ye.
Bala, wakat-kãnga, mam na n yiisa wuk-m-mens rãmbã,
dẽ, fo kõn leb n maan f tɩtaamã mam tãn-sõngã zug ye.
12Mam na n basa naong rãmbã,
ne ka-pãens rãmbã yãmb sʋka,
la bãmb na n paama gũudum
maam a Sẽn-Ka-Saab yʋʋrã yĩnga.
13 #
Vẽn 14.5
La Israyɛll nebã bu-kellã kõn leb n maan
sẽn yaa kegre,
la b kõn leb n yag zĩrẽ ye.
Bãmb kõn leb n gom n tudg taab ye.
Bãmb na n tõog n dɩɩme la b gũsi,
tɩ ned ba a ye ka be sẽn na n yɛɛs-b ye.»
B na n lebs n manega Zeruzalɛm
14Sɩyõ tẽngã nebã, kils-y-yã!
Israyɛll nebã, kaas-y ne sũ-noogo!
Zeruzalɛm nebã, kɩdm-y ne y sũyã fãa!
15Bala, Sẽn-Ka-Saab ka na n leb n sɩbg yãmb ye.
Bãmb kɩtame tɩ y bɛɛbã toeem sore.
Sẽn-Ka-Saab sẽn yaa Israyɛll dĩmã bee ne yãmba,
yãmb kõn leb n yɛɛs tɩ toog na n wa paam-y ye.
16Badaare, b na n yeelame:
«Zeruzalɛm nebã, da-y zoe-y rabeem ye.
Sɩyõ nebã, da-y boog-y raood ye!»
17Bala, Sẽn-Ka-Saab sẽn yaa yãmb Wẽnnaamã
bee ne yãmba,
b yaa gãndaoog sẽn fãagd yãmba,
yãmb na n yɩɩ bãmb sũ-noogo.
La bãmb sẽn nong yãmbã yĩnga,
b na n sĩnda b noore,
bãmb na n zẽka b koɛɛg n kaas ne kɩdeng
yãmb wɛɛngẽ.
18Zeruzalɛm tẽnga, mam na n leb n tigma
neb nins b sẽn yiis fo nengẽ n kẽng zĩ-zãrgẽ,
tɩ b ka leb n tõe n maan sũ-noogã.
La m yiis yãndã sẽn dag n be b zugã.
19Wakat-kãnga, mam na n sɩbga
neb nins sẽn namsd yãmbã.
Mam na n tɩpa sẽn pogl-bã,
la m lebg n tall neb nins b sẽn yõg
n kẽng tẽn-zẽmsã n wa,
n kɩt tɩ b paam waoogr la yʋ-zẽk dũniyã
zĩig ning fãa b sẽn dag n paoogd bãmbã.
20Wakat-kãnga, mam na n tall-y lame n lebg n wa,
Wakat-kãnga, mam na n tigm-y lame.
Bala, mam na n kɩtame tɩ yãmb yʋʋrã yi,
la m kɩt tɩ y paam waoogr dũniyã buud fãa sʋka.
Wakat ning mam sẽn na n lebs yãmb y zĩigẽ wã,
yãmb mensã nin na n yãndame.
Yaa maam a Sẽn-Ka-Saab n yeele.
Currently Selected:
A Sofoni 3: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.