A Zakari 5
5
Vẽnegr a yoobẽ soaba: Seb-pindg sẽn laande
1Mam leb n zẽka m neng n gese, la mam paama vẽnegr yɛsa. Mam yãnda seb-pindg sẽn laand yĩngri. 2La malɛɛkã yeela maam yaa: «Fo nee bõe?» Mam leokame: «Mam nee seb-pindg sẽn laande, t'a woglmã yaa kãntɩɩg pisi, t'a yalmã yaa kãntɩɩg piiga.» 3Dẽ, Malɛɛkã yeela maam yaa: «Yaa kãab-wẽngã n yit n na n zab ne tẽngã zãngã. Sɩd me, kãab-wẽngã yetame tɩ b na n diga wagda wã fãa n yiis tẽngã, a leb n yeelame tɩ b na n diga sẽn wẽend-b zĩrẽ wẽenegã n yiis tẽngã.»
4Sẽn-Ka-Saab yeelame:
«Mam na n yiis a kãab-wẽngã t'a tõe
n kẽ wagdrã roogẽ,
ne sẽn wẽend-a zĩrẽ wẽeneg ne mam yʋʋrã roogẽ,
n pa be n sãam yẽnda ne a raadã la a kugã.»
Vẽnegr a yopoe soaba: Peoogo
5Malɛɛk ning sẽn dag n gomd-a ne maamã yiime n yeel maam yaa: «M kotame tɩ f nak f neng n gese. Ges yaa bõe la sẽn yitã.» 6La mam sokame tɩ yaa bõe la woto. T'a leok maam tɩ yaa peoog la sẽn watã. A leb n yeelame yaa: «Yaa bãmb yel-wẽnã sẽn be tẽngã zĩig fãa wã la woto.»
7Wakat-kãnga, peoogã limdã sẽn yaa namdã fõkame, la pag n dag n zĩ peoogã pʋga. 8Malɛɛkã yeelame yaa: «Yaa wẽnemã.» La a lebs n dĩ-a n kẽes peoogã pʋga, n lebs namdã limd n fõgne.
9Dẽ, mam nak n gesame, la mam yãnda pagb a yiib sẽn yita. Sebgã rag n wẽeda b pɩgsã. Bãmb dag n tara pɩgs wa bakaorg pɩgsa. Bãmb zẽka peoogã t'a be yĩngr ne tẽng sʋka. 10Mam soka malɛɛk ning sẽn gomd-a ne maamã yaa: «Bãmb dɩka peoogã n dabd yɛɛnẽ?» 11Malɛɛkã leoka maam yaa: «B rabd n na n tɩ mee roog Sineyaar tẽng n kõ-a. B sã n me roogã n sɛ, b na n ning-a-la beenẽ, t'a pa be.»
Currently Selected:
A Zakari 5: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.