A Zakari 2
2
Vẽnegr a yiibẽ soaba: yɩɩla, ne sãeeba
1Mam zẽka m neng n gese, la mam yãnda yɩɩl a naase. 2Dẽ, mam soka malɛɛk ning sẽn gomd-a ne maamã yaa: «Yɩɩn-bãmbã b naasã võor yaa bõe?» Malɛɛkã leoka maam yaa: «Yɩɩl a naasã bilgda buud nins sẽn tar pãngã sẽn sãeeg Zʋʋda ne Israyɛll la Zeruzalɛm nebã.»
3Sẽn-Ka-Saab wilga maam sãeeb a naase. 4Mam sokame yaa: «Bãmb wat n na n maana bõe?» La malɛɛkã leoka maam yaa: «Yɩɩlã sẽn sãeeg Zʋʋda nebã tɩ ned ba a yembr ka leb n tõe n doog a zugã, sãeebã waame n na n kɩt tɩ rabeem yõk buud a taabã, n sãam b pãngã, b sẽn zab ne Zʋʋda nebã yĩnga, la yaa sẽn na n yɩl n sãeeg-ba.»
Vẽnegr a tãabẽ soaba: Wĩir b sẽn tar n magda
5Vẽnegrã pʋga, mam sẽn zẽk m neng n gese, mam yãnda rao sẽn zãad wĩir sẽn tar n magd a nugẽ. 6Mam soka raoã yaa: «Fo rabda yɛɛnẽ?» La a leoka maam yaa: «Mam dat n tɩ maka Zeruzalɛm n bãng a yalmã ne a woglmã.» 7La malɛɛk ning sẽn gomd-a ne maamã sẽn kẽnde, malɛɛk a to n yi n seg-a, 8n yeel-a yaa: «Wudg n tɩ yeel bi-bɩ-kãngã yaa:
‹Zeruzalɛm na n yɩɩ tẽng sẽn ka tar lalga,
ninsaalbã ne rũmsã sẽn na n lebg wʋsg
a pʋgẽ wã yĩnga.› »
9Sẽn-Ka-Saab yeelame:
«Mam mengã na n zĩnda ne yẽnda,
n yɩ wa bugum lalg n gũbg-a,
la m be a pʋgẽ, n yaa yẽnda ziiri.»
Sẽn-Ka-Saab boonda sẽn be-b yembdã
10Maam a Sẽn-Ka-Saab yetame:
«Haya! Haya! Zoe-y n bas-y nug-rɩtg
tẽngã n wa,
bala, maam n dag n sãeeg yãmb tɩ y kẽng
dũniyã kɩrems a naasã.
Yaa maam a Sẽn-Ka-Saab n yeele.
11Haya! Sɩyõ nebã, yãmb dãmb
sẽn be Babilond tẽn-neerã pʋgẽ wã,
zoe-y n põs-y-yã!»
12Bala, Saasẽ-Pãng-Soabã, soab ning
sẽn gom-a wã tʋma maam ne koɛɛga,
buud nins sẽn fã yãmbã wɛɛngẽ n yeele:
«Ned sã n sɩɩs yãmba, yaa wa a sẽn tuk mam nifu!
13N-yẽe! Mam na n yik n zaba ne bãmba,
n kɩt tɩ b yembsã wẽneg n zɛ bãmba,
tɩ yãmb bãng tɩ yaa Sẽn-Ka-Saab sẽn yaa
Saasẽ-Pãng-Soabã n tʋm maam.
14Sɩyõ nebã, kils-y ne sũ-noogo,
Sɩyõ tẽn-neerã, kɩdme!
Bala, mam wat n na n zĩnda fo pʋgẽ.
Yaa maam a Sẽn-Ka-Saab n yeele.
15Badaare, buud wʋsg na n dɩka
b mens n kõ Sẽn-Ka-Saabo,
n lebg mam nebã.
Mam na n zĩnda fo pʋgẽ.»
Dẽ, yãmb na n bãngame tɩ yaa
Sẽn-Ka-Saab sẽn yaa Saasẽ-Pãng-Soabã
n tʋm maam yãmb nengẽ.
16Sẽn-Ka-Saab na n leb n sooga Zʋʋda,
tɩ lebg b rẽnda n yaa b pʋɩɩre,
tẽng ning sẽn welg toorã pʋga.
Bãmb na n leb n yãka Zeruzalɛm.
17Bɩ ninsaalbã fãa sĩnd Sẽn-Ka-Saab taoore,
bala, bãmb yikame n yit b ro-sõngẽ wã.
Currently Selected:
A Zakari 2: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.