A Zakari 13
13
Wẽnnaam na n menesa wẽn-naandsã ne no-rɛɛsdbã
1Badaare, ko-bundum n na n pusg n yi a Davɩɩd buudã ne Zeruzalɛm nebã yel-wẽnã ne b rẽgdã pekr yĩnga. 2Saasẽ-Pãng-Soabã yetame: «Badaare, mam na n yiisa wẽn-naandsã yʋy tẽngã pʋga, la b kõn tol n leb n tẽeg bãmb yell ye. La m na n yiisa no-rɛɛsdbã me tẽngã pʋga, ne b rẽgdã sɩɩgã. 3Dẽ, ned sã n ket n be beenẽ n maand no-reesg tʋʋmde, yẽnda meng ba wã ne a ma wã, sẽn dog-b yẽnda wã, na n yeela yẽnda yaa: ‹Fo tog n kiime, bala, fo togsda zĩrẽ-be-goam ne Sẽn-Ka-Saab yʋʋre.› » La yẽnda ba wã ne a ma wã na n kõs-a-la wakat ning a sẽn togsd pĩnd-n-bãngr goamã. 4Badaare, no-rɛɛs fãa sã n wa togsd pĩnd-n-bãngr goamã, yãnd na n yõk-a-la a vẽnegrã yĩnga. Bãmb kõn leb n yeelg fuug sẽn wʋg ne pe-kõbd n belg nebã ye. 5Bãmb ned kam fãa na n yeelame yaa: «Mam ka no-rɛɛs ye, mam yaa ka-koaada. Hal mam bi-bɩɩlem wakate, mam tʋmd n kõta ned ning sẽn da-a maamã.» 6Dẽ, b na n sok-a lame yaa: ‹Yaa bõe poglg la sẽn be fo yãoogẽ wã?› La a na n leokame yaa: ‹Mam kẽnga neb nins sẽn nong maamã zakẽ tɩ b pogl-ma.› »
Kaool-paalga
7 #
Mat 26.31, Mark 14.27 Saasẽ-Pãng-Soabã yetame:
Zabr sʋʋga, yik n zab ne mam pe-kɩɩmã,
zab ne soab ning sẽn be ne maamã!
Wẽ pe-kɩɩmã, la piisã na n sãeegame,
la mam mengã nug n na n wa wẽ pe-bi wã.
8Dẽ, maam a Sẽn-Ka-Saab yetame:
Tẽngã pʋga, neb a tãab sʋka, neb a
yiib n na n ki, b na n sãamame,
la sẽn kell-a wã na n vɩɩmdame.
9La m na n dɩka sẽn kell-a wã n ning bugmẽ,
mam na n yẽnega yẽnda wa b
sẽn yẽnegd wanzuri,
mam na n zuga yẽnda wa b sẽn zugd sãnem.
Yẽnda na n boola mam yʋʋrã,
la mam na n leok-a lame.
Mam na n yeelame yaa:
«Bãmb n yaa mam nebã.»
La bãmb na n yeelame:
«Sẽn-Ka-Saab n yaa tõnd Wẽnnaam.»
Currently Selected:
A Zakari 13: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.