A Abdyaase 1
1
Sẽn-Ka-Saab pĩnd n togsa Edom sãoongo
1Vẽnegr a Abdyaas sẽn paame.
Ad Zu-soab a Sẽn-Ka-Saab sẽn yet Edom soolmã wɛɛngẽ:
«Tõnd wʋma koɛɛg Sẽn-Ka-Saab nengẽ,
la b tʋma ned bu-zẽmsã nengẽ ne koɛɛga.»
Koɛɛgã yetame: «Yik-y-yã!
D yik n zab ne Edom soolmã!»
D zab ne-a!
2Ade, mam na n kɩtame tɩ f lebg bilf
bu-zẽmsã fãa sʋka,
la nebã na n paooga foom wʋsgo.
3Fo tɩtaamã kẽes-f-la moogo,
bala, fo bee pĩisã bogdẽ,
fo tilga f rotã tãms zutu,
la f yetẽ: «Ãnda n tõe n sik maam?»
4Baa fo sã n yɩk n kuil yĩngr
wa pa-nand-tugri,
baa fo tɩʋ f tʋkã ãdsã sʋka,
mam na n sika foom be.
Yaa maam a Sẽn-Ka-Saab n yeele!
5Wagda bɩ fãadb sã n wa fo nengẽ
ne yʋngo,
bãmb ka na n wã foom sɩda?
Ka b sẽn tõe n wʋk bal la b na n wʋke?
Reezẽ-woabdb sã n wa fo reezẽ pʋʋgẽ,
b na n basa bũmb tɩ ka reezẽ sẽn na n yiisi?
6B vɛɛsa a Ezayu yagensã!
B zũndga yẽnda arzegsã!
7B na n diga foom n yiis f soolmẽ wã:
Bala, sẽn maan-b kaool ne foomã zãmbda foom,
fo zo-rãmbã n so foom,
sẽn naagd-b foom n dɩtẽ wã tũnugda
beenẽ n bẽt foom.
Bãmb yeta fo wɛɛngẽ: «A ka leb n tar yam ye.»
Edom nebã kongre
8Maam a Sẽn-Ka-Saab yetame:
«Badaare, mam na n menesa Edom soolem yam dãmbã,
mam na n menes a Ezayu#1.8 B sẽn gomd Edom ne Ezayu yell kaanẽ wã yaa bũmb a yembre. Bala, Edom nebã yaa a Izak biig a Ezayu yagense. soolem ning
sẽn be tãms sʋkã bãngdbã.
9Teman tẽnga, b na n kẽesa fo gãndaadã rabeem,
sẽn na yɩl n kʋ neb nins sẽn be a Ezayu
soolem ning sẽn be tãms sʋkã, n menes-b fãa!
10Wẽng ning fo sẽn maan fo ba-biig
a Zakoob yagensã yĩnga,
fo na n paama yãnde,
la b na n menes-f-la wakat sẽn kõn sa yĩnga.
11Daar ning bu-zẽmsã sẽn wa n wʋkd
bũmb nins sẽn dag n kõt Zeruzalɛm pãngã n loogdẽ,
daar ning sãambã sẽn wa n tũ Zeruzalɛm
tẽngã noy n kẽ n maan poeer n pʋɩ-a,
tɩ fo sĩnd n getẽ wã,
fo me yaa wa bãmb sʋkã ned a yembre.
12Da maan sũ-noog f ba-biigã yel-pakr daar ye.
Da maan sũ-noog a toogã daar ye.
Da kɩdem Zʋʋda nebã sãoong daar ye.
Da gom n paoog f ba-biigã
b yel-pakrã daar ye.
13Da kẽ mam nebã tẽng
pʋg b sãoongã daar ye.
Bɩ fo me ra yãnd f saam-biisã toog
b sãoongã daar n maan sũ-noog ye.
La b sãoongã daare,
bɩ f ra sɩɩs bũmb ning
sẽn dag n kõt-b pãngã ye.
14 #
Eza 34.5-17, 63.1-6, Zer 49.7-22, Eze 25.12-14, 35.1-15, Amo 1.11,12, Mal 1.2-5 Da yals so-tiisẽ n kʋ
sẽn zoet-b n na n põsã ye!
Da yõg neb nins sẽn põs-bã n ning b bɛɛbã
nugẽ toogã daar ye!»
15Bala, Sẽn-Ka-Saab daarã kolgda
bu-zẽmsã fãa yĩnga.
B na n maana foom wa fo sẽn maanã,
b na n dola foom f tʋʋmã.
Israyɛll na n doka a sũur ne Edom
16Edom tẽnga, bãng tɩ fo sẽn yũ mam
sũ-puugr bõn-yũudlã
m tãn-sõngã zug to-to wã,
bu-zẽmsã me na n yũ-a-la
a woto wakat fãa.
Bãmb na n yũ-a lame,
b na n gag-a lame,
la na n yɩɩ wa bãmb ka tol n zĩnd ye.
17Neb n na n põs n zĩnd Sɩyõ tãngã zugu.
Sɩyõ na n leb n lebga zĩ-sõngo,
la a Zakoob buudã na
n leb n deega b sẽn so wã.
18A Zakoob buudã na n
lebga wa bugum,
la a Zozɛf buudã na n lebga wa bug-witim,
t'a Ezayu buudã lebg wa moodo,
tɩ b rɩ-a n sãam-a zãnga.
A Ezayu buudã ned ba a yembr ka na n põs ye.
Yaa maam a Sẽn-Ka-Saab n yeele!
19 Negɛɛv nebã na n sooga Ezayu soolem ning sẽn be tãms sʋkã, la sẽn be-b kunkub sʋkã na n sooga Filistẽ-dãmbã tẽnga. Bãmb na n sooga Efrayiim ne Samaari tẽngã. La Benzame yagensã na n sooga Galaade. 20Israyɛll tãb-biis nins b sẽn dag n yõg n kẽng tẽn-zẽmsã, na n sooga Kana nebã tẽngã, hal n tãag Sarɛpta, la Zeruzalɛm neb nins b sẽn dag n yõg tɩ b be Sefaraadã na n sooga Negɛɛv tẽmsã.
21Fãagdb na n dʋʋ Sɩyõ tãngã,
n kao a Ezayu soolem ning sẽn be tãms sʋkã
neb bʋʋdo.
La Sẽn-Ka-Saab n na n dɩ naam.
Currently Selected:
A Abdyaase 1: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.