A Matye koe‑noogo 4
4
Sʋtãanã maka a Zeezi
(Mark 1.12-13, Luk 4.1-13)
1 #
Ebr 2.18, 4.15 Dẽ, Sɩɩg-sõng talla a Zeezi n kẽng we-rasempʋɩɩgẽ tɩ sʋtãanã na n mak bãmba. 2La bãmb sẽn loe noor rasem pis-naase, wĩndg ne yʋngo, kom yaool n yõka bãmba. 3Dẽ sʋtãanã kolgame n yeel bãmb yaa: Yãmb sã n yaa Wẽnnaam Bi-ribla, bɩ y kɩt tɩ kug-kãensã lebg buri. 4#Tõ 8.3A Zeezi leokame: «A gʋlsame tɩ ninsaal ka na n vɩ ne rɩɩb bal ye, la yaa ne goam nins fãa sẽn yit Wẽnnaam noorẽ wã.»
5Sʋtãanã talla bãmb n kẽng Zeruzalɛm, tẽn-sõngẽ wã, n zĩndg bãmb Wẽnd doogã zug n yeel-b yaa: 6#Yɩɩn 91.11,12«Yãmb sã n yaa Wẽnnaam Bi-ribla, bɩ y yɩk n tiims tẽnga, bala, a gʋlsame tɩ
bãmb na n kɩtame tɩ b malegsã gũ yãmba,
la b na n zãa yãmb ne b nusi,
tɩ y naoor ra wa lak kugr ye.»
7 #
Tõ 6.16
A Zeezi yeela yẽnda yaa: «A gʋlsame me tɩ f ra mak Zu-soabã sẽn yaa fo Wẽnnaamã ye.»
8Sʋtãana leb n talla bãmb n kẽng tãn-lug-lug zugu, n wilg bãmb dũniyã soolem toay-toayã fãa ne b ziirã n yeel bãmb yaa: 9«Yãmb sã n wõgemd n waoog maam, mam na n kõo yãmb yõwã fãa.» 10#Tõ 6.13A Zeezi yeela yẽnda: Kẽng n looge, Sʋtãanã! Bala, a gʋlsame tɩ
f waoog Zu-soabã fo Wẽnnaam
la f sak bãmb b yen bal tãa.
11Dẽ, sʋtãana basa a Zeezi, la malegs waame n sõng bãmba.
A Zeezi tʋʋm sɩngre
(Mark 1.14-20, Luk 4.14-15, 5.1-11, 6.17-19)
12 #
Mat 14.3, Mark 6.17, Luk 3.19,20 A Zeezi sẽn wʋm tɩ b kẽesa a Zã bi-bees roogo, b loogame n kẽng Galɩle. 13#Zã 2.12Bãmb yii Nazarɛt n kẽng Kapɛrnaom sẽn be ko-kãsengã noorã, Zabulõ ne Neftali soolmẽ wã, 14tɩ bũmb ningã Wẽnnaam no-rɛɛs a Ezayi sẽn dag n togsã paam pidsgu:
15 #
Eza 9.1,2 Zabulõ tẽnga, Neftali tẽnga,
sor sẽn dabd ko-kãsengã sẽnẽ n be Zʋrdẽ rʋʋnde,
Galɩle, bu-zẽms sẽn vɩ a pʋgẽ,
16neb sẽn zĩ lik bida pʋgẽ wã yãnda vẽen-kãsenga,
la vẽenem puka neb nins sẽn dag n zĩ kũum tẽngẽ
la a maasmẽ wã yĩnga.
17 #
Mat 3.2
Sẽn sɩng ne wakat-kãnga, a Zeezi sɩngame n moondẽ n yetẽ: «Tek-y yam n kos sugr tɩ arzãn soolem kolgame.»
18A Zeezi sẽn kẽng Galɩle ko-kãsengã noore, b yãnda raop a yiib sẽn yaa ba-biisi, a Sɩmo b sẽn boond t'a Pɩyɛɛr ne a ba-biig a Ãndere, tɩ b lobd zĩm-gãmbr ko-kãsengã pʋgẽ. Bãmb dag n yaa zĩm-yõagdba. 19A Zeezi yeel-b lame yaa: «Wa n tũ-y maam, tɩ m na n kɩtame tɩ y lebg nin-baoodba.» 20Tao-tao bala, bãmb basa zĩm-gãmba wã n tũ a Zeezi. 21Bãmb sẽn kẽng taoor bilfu, b leb n yãnda raop a yiib sẽn yaa ba-biisi, a Zebde kom-dibli a Zak ne a ba-biig a Zã tɩ b be koom koglgẽ ne b ba a Zebde n tõgd b zĩm-gãmba. La a Zeezi bool-b lame. 22Tao-tao bala, bãmb basa b koom-koglgã ne b ba wã n tũ a Zeezi.
23 #
Mat 9.35, Mark 1.39 A Zeezi saaga Galɩle soolmã fãa n zãms nebã b karen-dotã pʋse, n moon Wẽnnaam soolem koe-noogã, n maag bãad-dãmba, la koms-rãmb buud fãa sẽn be nebã sʋka. 24Bãmb yʋʋr saaga Siiri soolem fãa, la b talla bãad-dãmba, ne neb nins fãa yĩns tood buud toay-toay sẽn namsdã, zĩn sẽn tar-b rãmba, la neb sẽn lʋɩt kisĩnkĩiri, la ki-boaga n wa bãmb nengẽ, la a Zeezi maaga bãmba. 25Neb kʋʋng yii Galɩle ne Dekapoll la Zeruzalɛm ne Zʋʋde la tẽms sẽn be Zʋrdẽ rʋʋndã n tũ bãmba.
Currently Selected:
A Matye koe‑noogo 4: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.