A Malasɩ 3
3
1 #
Mat 11.10, Mark 1.2, Luk 1.76, 7.27 Saasẽ-Pãng-Soabã yetame:
«Ade, mam tʋmda m koe-toagsdã
t'a reng maam taoor n maneg sore.
Yẽnda na n wa a roogẽ wã ne lingri.
Yaa Zu-soab ning yãmb sẽn baoodã,
yaa kaoolã koe-toagsd ning yãmb sẽn datã.
A watame.»
2 #
Zow 2.11, Vẽn 6.17 Bãmb waoongã daare,
ãnda soab n na n tõog n vɩɩmde,
bãmb sã n wa puki, ãndã n na n tõog n yalse?
B na n yɩɩ wa boaag bugum,
B na n yɩɩ wa fu-pɛgd sẽn pekd fuugu.
3Yẽnda na n zĩnda wa ned sẽn zĩ n yẽnegd wanzuri n yɩlgd-a. Yẽnda na n yɩlga Leevi yagensã, a na n yɩlga bãmb wa b sẽn yɩlgd sãnem ne wanzuri to-to wã, la bãmb na n yɩɩ neb sẽn tõe n tall kũun n wa Sẽn-Ka-Saab yĩnga, wa sẽn zems tɩrlmã. 4Dẽ, Zʋʋda ne Zeruzalɛm kũunã na n taa Sẽn-Ka-Saab yam wa pĩndã, wa yʋʋm nins sẽn loogã.
5Saasẽ-Pãng-Soabã yetame:
«Ade, mam na n wa y nengẽ,
n wa kao y bʋʋdo.
M na n yika tao-tao n mong nin-bãmbã bʋʋm:
yaa bagbã, ne yoaadbã, la neb nins sẽn ka
pidsd b pʋlengã,
la sẽn zãmbd-b b tʋmtʋmdba,
ne pʋg-kõap la kɩɩbse,
la b maand sãamb pãnga, n ka zoet maamã.
6Bala, maam a Sẽn-Ka-Saab ka tek ye.
La yãmb dãmb sẽn yaa a Zakoob yagense,
b ka menes yãmb ye.»
Piig pʋɩɩr ne nonglem kũuni
7Hal sẽn sɩng ne y yaab-rãmbã wakate,
yãmb bʋdg n basa mam noyã,
yãmb ka sak-b ye.
Lebg-y n wa-y mam nengẽ,
tɩ mam me lebg n wa yãmb nengẽ.
Maam a Saasẽ-Pãng-Soabã n yeele.
La yãmb sokdame:
«Tõnd tog n maana bõe n lebg n wa?»
8Ad mam sẽn leokd yãmba:
«Dẽ yĩnga, ninsaal tog n zuu Wẽnnaam sɩda?
Yãmb yaool n zuuda maam,
la y sokdẽ: ‹Tõnd zuu yãmb ne bõe?›
Yaa piig pʋɩɩrã ne nonglem kũunã pʋg
la yãmb zuud maam!
9Ade, kãab-wẽng paamda yãmb buudã tõre,
bala, yãmb zuuda maam!»
10 #
Mk 27.30, Sõd 18.21-24, Tõ 12.6, 14.22-29, Neem 13.12 Ade, Saasẽ-Pãng-Soabã yetame:
«Tall-y piig pʋɩɩrã fãa n wa laogã bĩngr doogẽ,
tɩ rɩɩb tõe n zĩnd m doogẽ wã.
M kotame tɩ y mak maam a woto,
la mam na n paka yĩngr kʋɩlemsã y yĩnga,
n kɩt tɩ barkã sig yãmb zugu,
hal tɩ seke!
11Mam na n lenga sẽn sãamd-a wã,
n gɩdg-a t'a ra sãam y koodã ye.
La y reezẽ tɩɩsã ka na n pa n ka wom biis
y pʋtẽ wã ye.
Maam a Saasẽ-Pãng-Soabã n yeele.
12Buud toor-toorã fãa na n yeelame tɩ bark
bee yãmb zugu.
Bala, yãmb tẽngã na n yɩɩ tẽn-noogo.
Maam a Saasẽ-Pãng-Soabã n yeele.»
Sẽn-Ka-Saab tɩrlmã pukri
13Sẽn-Ka-Saab yetame:
«Ade, yãmb goma maam gom-kegemse,
la y yaool n yeele:
‹Tõnd goma yãmb yell wẽng ne taab a wãn-wãna?›
14Yãmb yeelame:
‹Tõnd sẽn sakd Wẽnnaamã yaa zaalem bala.
Tõnd sẽn maand bãmb tʋʋmdã,
la d kẽnd ne sũ-sãang Saasẽ-Pãng-Soabã yĩngã,
nafa tõnd ne bõe?
15Moasã, tõnd yetame tɩ tɩtaam dãmbã tara barka,
bala, bãmb maanda wẽnga, la ne rẽ fãa,
b tɩlgdame.
Bãmb makda Wẽnnaam, la b ka paamd sɩbgr ye!»
16Dẽ, sẽn zoet-b Sẽn-Ka-Saabã goma ne taaba.
Sẽn-Ka-Saab kɩlla b tʋbre, n wʋme.
B gʋlsa tẽegr sebr bãmb taoore,
n na n tẽegd neb nins sẽn zoet Sẽn-Ka-Saabo,
la b waoogd bãmb yʋʋrã yelle.
17Maam a Saasẽ-Pãng-Soabã yetame:
Bãmb na n yɩɩ mam dẽnda,
b na n yɩɩ mam mengã soolem,
daar ning mam sẽn segendã yĩnga.
Mam na n zoee bãmb nimbãanega,
wa ned sẽn zoet a biig sẽn sakd-a
nimbãanegã.
18Woto, yãmb na n leb n yãnda welgr
ning sẽn be nin-tɩrg ne nin-wẽng sʋka,
la welgr ning sẽn be sẽn sakd-b Wẽnnaam
ne sẽn ka sakd-b Wẽnnaamã sʋka.
19Bala, daarã watame,
a na n yɩɩ toog daare, wa bugum wʋnga.
Tɩtaam dãmbã ne sẽn maand-b wẽngã
na n yɩɩ wa moodo.
Daarã sẽn watã na n dɩɩ bãmb zãnga,
a ka na n tol n bas bãmb yẽgende,
tɩ b pa gomd b wilã ye.
Maam a Saasẽ-Pãng-Soabã n yeele.
20La ne yãmb dãmb sẽn zoet mam yʋʋrã,
tɩrlem wĩndg na n puka yãmb yĩnga,
la a na n waa ne maagre.
Yãmb na n yitame n yɩgd n tirsd wa
nag-bi sẽn be yãgrẽ.
21Ade, Saasẽ-Pãng-Soabã yetame:
«Daar ning mam sẽn segendã daare,
yãmb na n taba nin-wẽnsã,
bala, bãmb na n yɩɩ wa tompeglem yãmb
naoã tẽngre.»
A Eli sẽn na n lebg n wa
22«Tẽeg-y tõog ning m sẽn dag n kõ
m tʋmtʋmd a Moyiisã.
Orɛɛb tãngã zugu, mam dag n kõo yẽnda
noy la no-tũuds Israyɛll nebã fãa yĩngã.
23 #
Mat 11.14, 17.10-13, Mark 9.11-13, Luk 1.17, Zã 1.21 Mam tʋmda m no-rɛɛs a Eli yãmb nengẽ,
tɩ Sẽn-Ka-Saab daarã sẽn yaa ra-kãsenga,
la a kẽesd rabeemã nan ka ta ye.
24Daarã na n kɩtame tɩ ba-rãmb leb
n nong b kamba,
la a kɩt tɩ kamb leb n nong b ba-rãmba,
tɩ m da wa kãab tẽngã wẽng n kɩt
t'a sãam ye.»
Currently Selected:
A Malasɩ 3: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.