A Aaze 2
2
Wẽnd do-paalgã ziiri
1Kiuug a yopoe soabã rasem pisi la a yembrã daare, Sẽn-Ka-Saab goma ne b no-rɛɛs a Aaze n yeel-a yaa: 2«Mam kot-f lame tɩ f gom ne a Saltiyɛll biig a Zorobabɛll sẽn yaa Zʋʋda gʋvɛrneerã, ne a Yehosadak biig a Zozoe sẽn yaa maan-kʋʋr kãsmã, ne neb a taabã n yeel-b yaa:
3 #
Ɛsd 3.12
Yãmb sʋkã nin-bʋg n dag n yãnd
Wẽnnaam doogã sẽn dag n tar ziir ningã?
La yãmb sẽn get-a rũndã wã, a yaa a wãn-wãna?
M mi tɩ yãmb yetame t'a ka baa fɩ yãmb nifẽ la?»
4Moasã, maam a Sẽn-Ka-Saab yetame:
«Zorobabɛlle, paam daoodo!
A Yehosadak biig a Zozoe sẽn yaa
maan-kʋʋr kãsmã, paam daoodo!
Yãmb a tẽngã gill fãa nebã, paam-y raoodo!
Yaa maam a Sẽn-Ka-Saab n yeele.
Tʋm-y-yã!
Bala, mam bee ne yãmba,
yaa maam a Saasẽ-Pãng-Soabã n yeele.
5 #
Yik 29.45,46 Yãmb sẽn wa n yit Ezɩpt tẽngã,
mam kõo yãmb m gomdã ne m sɩɩgã
sẽn be yãmb sʋkã.
Da zoe-y rabeem ye!»
6 #
Ebr 12.26
Bala, maam a Saasẽ-Pãng-Soabã yetame:
«Keta bilfu, keta bilf bala,
tɩ mam kɩt tɩ saasẽ la tẽng rigimdi,
la m kɩt tɩ ko-kãsengã ne tẽn-gãongã rigimdi.
7Mam na n kɩtame tɩ tẽmsã fãa zũndgi.
B na n wʋka laog nins fãa sẽn tar yõodã n wa,
la mam na n kɩtame tɩ ro-kãngã pid ne ziiri.
Yaa maam a Saasẽ-Pãng-Soabã n yeele.
8Wanzuri wã yaa maam n so,
la sãnemã me yaa maam n so.
Yaa maam a Saasẽ-Pãng-Soabã n yeele.»
9Ro-kãngã sẽn na n paam ziir ningã,
na n yɩɩga a sẽn dag n tar pĩndã.
Maam a Saasẽ-Pãng-Soabã n yeele.
Mam na n kɩtame tɩ vɩ-bãan zĩnd zĩ-kãngã.
Maam a Saasẽ-Pãng-Soabã n yeele.
B lenga nebã b sẽn dẽgem b mensã yĩnga
10Rĩm a Daryʋʋs sẽn deeg a naamã tɩ yʋʋm yiiblẽ, kiuug a wɛ wã rasem pisi la a naasã daare, Sẽn-Ka-Saab goma ne no-rɛɛs a Aaze n yeele: 11«Maam a Saasẽ-Pãng-Soabã yetame: ‹M kotame tɩ f sok maan-kʋʋdbã a woto: Ned sã n dɩk maoong nemd n ning a fuugẽ, 12ned sã n dɩk maoong nemd n sẽbg a fuug noorẽ, t'a fuugã noor sɩɩs buri, rɩɩbo, reezẽ rãam, kaam, wall sẽn yaa rɩɩb ning fãa, rẽ yĩnga, bõn-kãng me na n lebga bũmb sẽn welg toor bɩ?» La maan-kʋʋdbã leokame tɩ ayo! 13#Sõd 19.11-22Dẽ, a Aaze yeelame yaa: «La ned sã n sɩɩs kũum n dẽgem a menga, n sɩɩs bũmb a yembr bõn-kãensã sʋka, bõn-kãng lebga rẽgd bɩ?» La maan-kʋʋdbã leokame yaa: «N-yẽe, a lebga bõn-dẽgdo.» 14Dẽ, a Aaze yeelame yaa:
«Nin-bãmbã me yaa woto,
nimbuiidã sẽn yas mam taoorã me yaa a woto.
Maam a Sẽn-Ka-Saab n yeele.
Bãmb nusã tʋʋm fãa me yaa a woto.
B sẽn wat ne bũmb ning tẽn-kugrẽ wã
yaa bõn-dẽgdo.»
Gũus-m-meng yelle
15Mam kot-y lame tɩ y maan gũusg moasã.
Maag-y y meng n ges bũmb ning
sẽn na n maan sẽn sɩng ne rũndã daarã,
la wakat sẽn watã.
Sẽn deng b sẽn na n dɩk tãn-koeemd
n dogl a to zug Wẽnnaam doogã meeb wɛɛngẽ,
16b sã n dag n tog n paam ka-bɛɛl peoog pisi,
b wat n yasa ne ka-bɛɛl peoog piiga.
B sã n kẽng reezẽ rãam wẽkr n tẽed yʋy pis-nu,
b wat n yasa ne yʋy pisi bala.
17Mam kɩtame tɩ wãoongo, gãnem ne
la sapɩlem sãam y koodã, tɩ b zelge,
tɩ yãmb nusã tʋʋm lebg zaalem,
la yãmb baas n ka lebg n wa mam nengẽ ye.
Yaa maam a Sẽn-Ka-Saab n yeele.
18Mam kot-y lame tɩ y maan gũusg ne
bũmb ning sẽn na n maan sẽn sɩng
ne rũndã daarã,
la wakat sẽn watã.
Sẽn sɩng ne kiuug a wɛ soabã rasem pisi
la a naasã daare,
sẽn sɩng ne Wẽnnaam doogã yẽbgr daare,
bɩ y gũus n gese!
19Rẽ yĩnga, kood leb n keta baoorẽ sɩda?
Baa reezẽ tɩɩsã, kankamsã, gernaad tɩɩsã
ne oliiv tɩɩsã ka tol n wom ye.
Sẽn sɩng ne rũndã, mam na n leb n ninga barka.
Kãab-nood a Zorobabɛll yĩnga
20Kiuugã rasem pisi la a naasã daare, Sẽn-Ka-Saab leb n goma ne a Aaze naoor a yiibẽ soab n yeele:
21«Togs Zʋʋda gʋvɛrneer a Zorobabɛll
tɩ mam na n kɩtame tɩ saasẽ la tẽng rigimdi.
22Mam na n luba soolem-dãmbã nanambse.
Mam na n sãama bu-zẽmsã soolem-dãmbã pãnga.
Mam na n luba saar-dãmb ne b wed-rʋʋdba,
n kɩt tɩ wiid ne b wed-rʋʋdb rʋʋg tẽnga.
Ned kam fãa na n wẽneg n kʋ a ba-biig ne zabr sʋʋga.»
23Maam a Saasẽ-Pãng-Soabã yetame:
«Badaare, mam na n dɩka foom a Zorobabɛll
sẽn yaa mam tʋmtʋmd a Saltiyɛll biigã.
Maam a Sẽn-Ka-Saab n yeele,
tɩ m na n dɩka foom n kɩt tɩ f yɩ nug-tikr bãnde,
bala, yaa foom la mam yãk yã.
Maam a Saasẽ-Pãng-Soabã n yeele.»
Currently Selected:
A Aaze 2: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.