MI CILIMA 24
24
1Abalahama den kpeligi ki podi boncianla. Li Miali Diedo den seligi o li bonla kuli nni. 2Abalahama den maadi leni o naacemo yua n kpeligi ki cie bikuli o diegu nni, yua n den kubi o piama kuli ki yedi o: «N mia ŋa ŋan kuani a nuu n panli tiipo, 3n baa teni ŋan poli Li Miali Diedo nintuali yua n tie tanpoli leni ki tinga Tienu. A baa poli ke a kan taa n bijua po o pua Kanana yaaba yaa bisiaba yaa siiga min kaa yaaba yaa siiga. 4Ama a baa gedi n baadogu leni n diema nni ki taa o pua n bijua Isaaka po.»
5O naacemo den yedi o: «Daalinba ki bonpuoga kan bua ki ŋoadi nni u naa dogu nni. Naani li pundi ke min gedini a bijua ŋan den ñani yaa diema nni bi?» 6Abalahama den yedi: «Fangi a yuli ki da guani n bijua lipo. 7Li Miali Diedo tanpoli Tienu yua n den teni ke n ñani n baadiegu nni leni n diema nni, o den maadi leni nni ki bili npo li poli ki yedi nni: ‹N baa pa mi naa diema a yaa puoliŋuani.› Wani n baa soani o maleki a nintuali ke a baa taa o pua n bijua po laa dogu nni. 8O pua yaa bua ki yegi leni a, a baa faabi leni li naa poli min teni ke a poli yaali yeni. Ama a kan guani n bijua lipo abada.»
9O naacemo den kuani o nuu o diedo Abalahama panli tiipo ki poli ke o baa kubi laa bonla kuli. 10O naacemo den taa yuoyuodi piiga o diedo yuoyuodi siiga leni wan bua yaala kuli o diedo piama siiga ki fii ki taa u sanu. O den fii ki gedi Mesopotami diema nni ki pundi Nahola yaa dogu.
11O den teni ke ti yuoyuodi gbaani ki fuodi u dogu niinpo ki kuu leni li caali. Li den tie ku yenjuogu bi puoba n ña ki baa luuni mi ñima yaa yogunu. 12O den yedi: «Li Miali Diedo, n diedo Abalahama yaa Tienu, n mia ŋan tieni li *ŋanbili n diedo Abalahama po. 13Diidi n se ki kuu leni li ñinbunli, u dogu yaaba yaa bisiaba baa cua ki baa luuni mi ñima. 14N mia ŋa bu naa miabu. Min baa mia yaa jafaano ki yedi o: ‹N mia ŋa ŋan kpegini a cuali min ño› ke o baa goa ki yedi: ‹Ño ke n go baa pa a yuoyuodi mo n ño.› N mia ŋa ke laa jafaano n yaa tie ŋan gandi yua ki bili a naacemo Isaaka po. Yene ke n baa bandi ke a tieni li ŋanbili n diedo po.»
15O daa den maadi ki gbeni ke Lebeka den ñani u dogu nni ki bugi o cuali. O den tie Abalahama yaa waalo Nahola yaa pua Milika bijua Betuela yaa bisalo. 16O den tie yaa jafaano n pia ti jafandi bonŋanla ki tie li *powandiali, ja kuli naa den bani o. O den jiidi li ñinbunli kani ki baa gbieni o cuali, o den gbieni o cili ki ban cuoni. 17Abalahama naacemo den fii ki tuogi o ki yedi: «N mia ŋa pa nni a cuali nni ñima waamu min ño.» 18O den goa ki yedi o: «N diedo ño.» O den jaligi ki ñuani ki jiini o cuali o nuu po ki puni o ke o ñuni. 19Wan den puni o mi ñima ke o ñuni ki gbeni o den yedi o: «N go baa luuni a yuoyuodi yaa po hali bani mo n ño ki guo.»
20O den bidi o cuali ñima tontoni u yangalu nni ki go sani ki guani li caali po ki go luuni ti yuoyuodi kuli po. 21O ja den se ki nua leni li pakili, ki naa yedi liba ki baa le Li Miali Diedo yaa baa teni o sancenli n juodi ki ŋani bi bi li yaa kan ŋanbi. 22Ti yuoyuodi n den ñuni ki gbeni o ja den taa wula yaa ñoagima ke mi kpiagi ki pundi sikili boagidima leni biana lie ke a tie wula ki kpiagi ki pundi sikili piiga ki puni o jafaano. 23O den buali o: «Ŋan sinja npo, a tie ŋme bisalo yo? Naani a baadiegu pia u kaanu ke n baa fidi ki duani ku ñiagu?»
24O den goa ki yedi o: «N tie Betuela yaa bisalo, Milika n mali Nahola po yua.»
25O go den yedi o: «Ti denpo pia ti muadi leni ti yandi jiema boncianla. U kaanu go ye ke a baa fidi ki duani ku ñiagu.»
26Lani yaa po o ja den gbaani ki pugi Li Miali Diedo ki yedi: 27«Li Miali Diedo, n diedo Abalahama Tienu n baa ti pagidi, wani yua n doagidi o ŋanbicianli leni o dugidi n diedo yaa po. Li Miali Diedo gobidi nni ke n pundi n diedo yaa waamu diegu nni.»
28O jafaano den sani ki kuni o denpo ki waani o naa laa bonla kuli. 29Lebeka den pia o kpelo ke o yi Labana. Labana den ñani ki sani ki gedi o ja po li caali kani. 30O den laa mi ñoagima leni a biana o waalo nuu nni ki gbadi o waalo Lebeka maama yo ke o yedi: «O ja den maadi nni nanda leni nanda.» Lani yaa po o den pundi laa ja kani ke o se o yuoyuodi kani li caali kani ki yedi o: 31«Cua na Li Miali Diedo n seligi yua. Be yaa po ke a se nekanba niinpo? N ŋanbi li dieli ki go ŋanbi u kaanu ti yuoyuodi po.»
32O ja den kua ku diegu nni. Labana den teni ke bi tugidi ti yuoyuodi ki puni ti ti muadi leni mi jiema. O go den cuani mi ñima ke o ja leni yaa niba n ye leni o n nigidi bi taana. Lanwani o den teni o mi jiema ke wan je. 33Ama laa ja den yedi: «N da kan je se min kpa maadi min pia yaa maama.» Labana den yedi o: «Maadi.» 34Lanwani o den yedi: «N tie Abalahama yaa naacemo. 35Li Miali Diedo den seligi n diedo boncianla ke o baa u paalu. O den puni o ti yanbidi leni a yangbenga, ŋanjilifa leni wula leni a jatuada leni a potuada leni ti yuoyuodi leni i ŋunbi. 36N diedo pua Sala den mali n diedo po bonjaga o nikpedi yogunu. O den puni wani wan pia yaala kuli. 37N diedo den teni ke n poli ki yedi nni: ‹A kan taa n bijua po o pua Kanana yaaba yaa bisiaba siiga min kaa yaaba yaa diema nni. 38Ama a baa gedi n baadiegu nni leni n buolu yaaba siiga, ki ban taa o pua n bijua po.› 39N den yedi n diedo: ‹Daalinba o pua kan bua ki yegi leni nni.› 40O den goa ki yedi nni: ‹Li Miali Diedo, min cuoni ki ŋua yua baa soani o maleki wan yegi leni a ki teni a sancenli n juodi ki ŋani ke a baa taa n bijua po o pua, yua n tie n baa buolu leni o diegu nni yua. 41A yaa pundi n buolu yaaba kani a baa faabi leni ŋan den poli npo yaa poli. Bi yaa tuo ŋan taa o, a baa faabi leni ŋan den poli npo yaa poli.› 42Dinla, n bi pundi li caali kani ki yedi: ‹Li Miali Diedo, n diedo Abalahama yaa Tienu, a yaa baa teni n sancenli n juodi ki ŋani, 43diidi n se ki kuu leni li ñinbunli. Yaa jafaano n ñani ki baa luuni ke n yedi o: N mia ŋa, pa nni a cuali nni ñima waamu min ño. 44Li yaa tie ke o yedi nni: Ño fini aba ke n go baa luuni a yuoyuodi po. N mia ŋa ke laa jafaano n tua Li Miali Diedo n gandi ki bili yaa pua n diedo bijua po.› 45Lanwani hali ke n daa bi maadi n pali nni ki gbeni, Lebeka bi ñani ki bugi o cuali. O bi jiidi li ñinbunli po ki luuni mi ñima. N bi yedi o: ‹N mia ŋa, pa nni min ño.› 46O bi jiini o cuali o boacabili po tontoni ki yedi nni: ‹Ño ke n go baa pa a yuoyuodi mo n ño.› N bi ñuni ke o go teni ke n yuoyuodi mo ñuni. 47N bi buali o ki yedi o: ‹A tie ŋme yaa bisalo yo?› O bi goa ki yedi: ‹N tie Nahola leni Milika yaa bijua yaa bisalo.› N bi puni o mi ñoagima o miani po ki pilini o a biana. 48Lanwani n bi ñuani ki labini Li Miali Diedo nintuali ki pagi Li Miali Diedo, n diedo Abalahama yaa Tienu yua n den gobidi nni leni ti dugidi ke min taa n diedo yaa waalo yaa bisalo o bijua po. 49Moala yi yaa baa tieni li ŋanbili leni ti dugidi n diedo po yin waani nni. Yi yaa kan tieni mo yin waani nni ke n baa lebidi ki teli jienu po bi ganu po.»
50Labana leni Betuela den goa ki yedi: «Li naa bonla kuli ñani Li Miali Diedo kani, ti kan fidi ki maadi yaala n bia bi yaala n ŋani. 51Lebeka ye ne a nintuali, taa o ki gedi wan tua a diedo bijua pua nani Li Miali Diedo n yedi maama yeni.»
52Abalahama naacemo n den gbadi laa maama yeni o den labini hali tiipo Li Miali Diedo nintuali. 53O naacemo den ñani yaa bonla n tie ŋanjilifa leni wula leni ti tiadi ki puni Lebeka. O go den puni o kpelo leni o naa yaa paabu n ŋani boncianla. 54Lan den pendi, wani leni yaa niba n den yegi leni o den dini ki go ñuni ki duani ku ñiagu lankani. Ku tiŋaagu ban fii yaa yogunu o naacemo den yedi: «Pa nni mani u sanu min guani n diedo po.» 55Ki bonpuoga kpelo leni o naa den goa ki yedi: «O jafaano n go yaa ye leni ti yogunuba nani dana piiga banlu li yaa pendi o baa fidi gedi leni yi.»
56O den goa ki yedi ba: «Yin da teni min go waagi kelima Li Miali Diedo teni ke n sancenli juodi ki ŋani. Pa nni mani u sanu min guani n diedo kani.» 57Lanwani bi den goa ki yedi o: «Tin yini o jafaano ki buali o.»
58Bi den yini Lebeka ki yedi o: «Naani a bua ki yegi leni o naa ja?» O den goa ki yedi: «N baa yegi leni o.»
59Bi den cedi ke bi waalo Lebeka leni o yualo gedi leni Abalahama naacemo leni o niba. 60Bi den gaali Lebeka ki yedi o:
«Fini ti waalo,
Ŋan tua tuda tuda bam.
A puoliŋuani n diedi bi yibalinba yaa buliñoana.»
61Lebeka den fii leni o potuada ki jagini ti yuoyuodi ki ŋua o ja puoli. O naacemo den taa Lebeka ki fii ki kuni leni o.
62Laa yogunu Isaaka den guani Lakayi-Loi yaa caali kani ki kali ganu po yaa diema nni. 63Dayenli, ku yenjuogu Isaaka den ñani ki goadi ki kpaagi kpaagi i kuani nni. O den yaadi ki diidi ki laa ke ti yuoyuodi kpendi. 64Lebeka moko den yaadi ki diidi ki laa Isaaka ki jiidi o yoyuogu po. 65O den yedi o naacemo: «O naa ja tie ŋme yo, wani yua n kpendi i kuani nni ki togidi ti yeni?» O naacemo den yedi: «Li tie n diedo.» Lanyogunu Lebeka den taa bu kpalibu ki libini. 66O naacemo den waani Isaaka wan den tieni yaala kuli. 67Isaaka den kuani Lebeka o naa Sala gbandieli nni. O den taa Lebeka ke o tua o pua. O den bua o boncianla. Yeni Isaaka den baa i baagi o naa kuuma po.
Abalahama kuuma. O puoliŋuani bontoaba
Currently Selected:
MI CILIMA 24: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.