MI CILIMA 16
16
1Abalama yaa pua Salai naa den mali opo biga. Salai den pia o potuado ke o tie Ejipiti yua ki yi Agala. 2Salai den yedi o calo Abalama: «Diidi Li Miali Diedo teni ke n tie ŋoaliga lanwani n mia ŋa, ŋan kua n potuado kani. Daalinba n baa baa a bila kelima o yaa po.» Abalama den tuo Salai maama. 3Lanwani Abalama pua Salai den taa o potuado Ejipiti yua Agala ki teni o calo Abalama ke wan tua o pua. Li yogunu den sua ke Abalama kali Kanana diema nni ki tieni bina piiga. 4Abalama den kua Agala kani ke o punbi. Wan den sua ke o punbi o den diidi o cannaa leni mi kafaama. 5Salai den yedi Abalama: «Yaa kafaabiadima n tiendi nni ne, n guani a yaa kani. N den puni a n potuado. Wan di sua ke o punbi yaa yogunu o diidi nni leni mi kafaama. Li Miali Diedo n tua o bujialo mini leni fini yaa siiga.» 6Abalama den goa ki yedi Salai: «Diidi fini n die a potuado, ŋan tieni opo nani ŋan sua ke li dagidi maama.» Lanwani Salai den faligi o ke Agala den sani ki foagidi leni o. 7Li Miali Diedo maleki den laa o ke o ye li ñinbunli kani mi fanpienma nni, yaa ñinbunli n ye Sula yaa sanu po. 8O den yedi Agala, Salai yaa potuado: «A ñani le? A caa lepo yo?» O den goa ki yedi o: «N sani ki bua ki foagidi leni n cannaa Salai.» 9Li Miali Diedo yaa maleki den yedi o: «Ŋan guani a cannaa kani ki miini a yuli o nuu nni.» 10Li Miali Diedo yaa maleki den yedi o: «N baa teni a yaabila n yaa pugidi. Bi baa yabidi hali ke bi kan fidi ki coadi ba.»
11Li Miali Diedo maleki den yedi o:
«Diidi a punbi
A baa ma bonjaga
Ki cili o yeli Isimayeli.#16.11 Isimayeli bundi Ebilu yaaba maama nni «U Tienu tuba gba.»
Kelima Li Miali Diedo den gbadi a miabu a falaciamo nni.
12O baa tie nani o fuaŋunbo,
O baa yie bi niba kuli,
Bi niba kuli baa yie o.
O baa piadi ki yaa ye o bebe
Ki foagidi leni o kpiiba kuli.»
13Agala den buali o yuli yaa buali n tie na: «Naani n li laa U Tienu moamoane ki baa se leni li miali?» Li yaa puoli, o den puni Li Miali Diedo yua n den maadi leni o yaa yeli n tie na: «U Tienu yua n nua nni.» 14Lani yaa po yo ke bi yi yaa caali n ye Kadesa leni Baleda siiga «Yua n fo ki nua nni yaa caali.» 15Agala den mali bonjaga Abalama po, Abalama den cili Agala n den mali opo yaa biga yaa yeli Isimayeli.#Gal 4.22 16Agala n den mali Abalama po ki biga, Isimayeli yaa yogunu Abalama den pia piinii n bina luoba.
Abalama yeli lebidi ki tua Abalahama
Currently Selected:
MI CILIMA 16: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.