MALAKI 1
1
1Giidaheachta ng'asheanda NG'UTAMIIDA siitaw Malaki aba badahuuka fuga Israeli.
Bariinyeega NG'UTAMIIDA aba badayda fuga Israeli
2“Aniini ghaabwariinyeegwa,” Gwarugu NG'UTAMIIDA. Ak gooyeenyi agooga, “Gibwariiydaneasaan?” “Neada Esawu ea mii orjeeda geenyea Yakobohi?” Gwarugu NG'UTAMIIDA. “Iidu ghaabwariinyi Yakobo, 3amadu ghaasichi Esawu; ak ea neanuuschi ng'eanyiidaanyi bea heayeeniga ak ea naadawji hearaniischoadaanyi fureayoonga dareapcheeda.” 4Nea iyayi Edomu, “Sidataseasa ak gajeebiikta eadeasa heeda sinyarja,” gwarugu NG'UTAMIIDA bea lugweega, “Ghoamu ghwadeas, ak gaydabwaay, ea eeguura ng'eanyiida fuga munyas, fuga ghayi nyareeksa NG'UTAMIIDA damanda manda muudeanooda.” 5Ak gayghwadaah gheanyangeagwa gili, ak gajayeena, “NG'UTAMIIDA aahaw, ea ghwasuut moonghooda Israeli!”
NG'UTAMIIDA gwanyareeksa ashoohoodiga
6“Orjeeda gwasiniisa ghwaan mureeda, nea siida gadiyeeda gwasiniisa siidaanyi haw. Asi aniini iyeawooschi ghweanda, gwandeenu mureedeanyu? Ama eawooschi siida haw, gwandeenu gheawalmeedeanyu? gwarugu NG'UTAMIIDA bea lugweega, Ea ashoohoodiga, fool gheawungeasu. Ak gooyeenyi, ‘Neada aseasa geefooldiin gheawungaagu?’ 7Aba gideaba ghoayiinyi haleanjeeda ghadooweeda munyas heedeanyu bea wagiida. Ak gooyeenyi agooga, ‘Neada geenung' gamunyiitaan?’ Aba gideaba ghoaghanyi gili heeda wagiida bea NG'UTAMIIDA gichea eefool. 8Nea iissa iyoataydi diyeanga ng'oowi ghoah lukghumeeda neada ea mii muy? Ama eatayi gea badeeda ghana gea beadi, neada ea mii muy? Oatawa gidida sugoocheanda haw; heapi gayghabwariinyeegwa ghana ghoahiimneegwa alooheeda? gwarugu NG'UTAMIIDA bea lugweega. 9‘Asi ghamneawa geamuscheegwa amwaasha alooheeda ASEETA, ak abeeda ghabwaydaneasa.’ Aba gideaba gili siguun iileabu geatindaang'u, abeeda gaygoohiimsa alooheeda siida wassean aba jeedeang'wa? gwarugu NG'UTAMIIDA bea lugweega. 10Uuw, inyeeda gwachi gwanda jeedeang'wa siida jea ghwajap gidaghuudajeega, ak abeeda ea meayeadi beasta mwadaagha aba heedeanyu bea wagiida! Aniini meahoosani aba badahuukeagwa, gwarugu NG'UTAMIIDA bea lugweega, ak ea maydamwas haleanjeeda ghadooweeda oogoonyi aba geatingeagwa. 11Aba gideaba ghang'eada giirearnooda aseeta ea gamikta gheawungeasu ea hees aba jeeda eemoojiga, nea aba hiji wassean geatayda geediga ng'andidi aba gheawungeasu, was haleanjeeda ghadooweeda miyaas; aba gideaba gheawungeasu ea hees aba jeeda eemoojiga, gwarugu NG'UTAMIIDA bea lugweega. 12Amadu ghoabwari ririnnyeanda damanda ooyeani heeda wagiida bea NG'UTAMIIDA sibwara ririnnyeanda, nea hamita mida badayda geefool. 13‘Ak gooyeenyi, ng'asheanji goobuurdaneasaan,’ ak goofoolean aniini, gwarugu NG'UTAMIIDA bea lugweega. Hit gooyeadu gidasigeanda aba uurda ghana gida badeeda ghana ea bwaat ak gooyeadu gili ghoah haleanjeedeang'wa bea ghadooweeda! Gaydaang'waay gili aba geatindaang'u? gwarugu NG'UTAMIIDA. 14Asi deamwaashta siida reengani buuneeda mideawa lagweenda aba jeeda noagaaschi, ak ghwarat, amadu ghoadayda lukghumeeda Ng'utamiida aba gida mideawa badeeda; aba gideaba aniini geawooschi sugoocheanda haw, gwarugu NG'UTAMIIDA bea lugweega, nea gheang'deanyu geewali aba jeeda eemoojiga.
Currently Selected:
MALAKI 1: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.