MALAKI 2
2
1Yeni vakohani, wiikimbi elu llwany. 2Lyo mukanra, mulaita neeluvika nriminy mwiindye irina lyakwa mmbo nshemudengaa na mbora tany toose. Neeny shammetidenga, mashika elyi mulashiitaa. Ni Nndumi Iruva aamba indo. 3Mmbo nsheimaa mbeu tany tilammyi, na fisangu fyany shifitefuse, yee, utefusu lwa firaso fyany, musheerwa efo ando amwi nafyo. 4llyo mushemanyaa shelyi wiikimbi elu mmbo lwamusheya naambo Valevi vawarani na kyaasa kyakwa. Ni Nndumi Iruva wa matorito aamba indi. 5Kyaasa kyakwa na Valevi kyitiri muu na ufoo, shakivika naambo kyeerewa, nawo vakashitirya vio. 6Mmbo alerera kya usumanu, nalalasye ntambo. Keenda aryani neeny na ufoo na umamiri, keenduta na vengyi vakalakana na uravi. 7Mashika nkuti nkohani narere na urango, llyo na vandu vashensoraa, kimmba akee nrumi wa Nndumi Iruva muni matorito. 8Kyeendi yeni mmbo mulereta shia ya dede, mukeeveta na vengyi. Mukareta kyaasa kilya shilevika na Valevi, yeny Nndumi Iruva wa matorito. 9Nkyo kimakruma neeny shamura mukaminwa muve vakiva vanduny vengyi woose, kimmba neeni mulakeelatya shia takwa, mukeeveta usumanu.
Ukasha lwa Vandu kwa Iruva
10A yese loose llukee va Nde umwi na Iruva umwi aluumbye? A mmbo kyava indaany elyi wo umwi waany atannya ungyi findo filavaa, keemmbwa kyaasa kilya kya vande veru? 11Yuda mmbo atana kindo kilavaa, kikaende urekwa kunu Israeli na Yerusalemu. Yuda mmbo aletefusa weele lwa Nndumi Iruva, karwaa nka wa maruva engyi. 12Nndu mwitana indo mmbo asherauwaa nakee kwaasha na vandu vakwe, kiwo neeto ootya Nndumi Iruva wa matorito firaso. 13Yeni mmbo muketana indo mukeende misoru yoo meseny ya Nndumi Iruva mulakisaraa kya firaso efyo, elyi mwara mulatana kisumani. 14Lyo yeni mukaamba. Ni elyi Nndumi Iruva alelollya shaasa yewe kuletannya nka uravi mwikee vakoo, kulaore nta kwanrekyo kyaasa kilya kyany. 15Nkwii-fo nndu aletana indo naleshi-fo. A ndesa kwiifo nndu akunndye mwana wakwe alave mwiindya Iruva? Kwiiseny nnu kya mirima yaany. Kulave nndu atanya nka wakwe mwiiya kindo kya kiila. 16Yeny shisuuye nnu elyi nndu na nka valakana, ni yeny Nndumi Iruva, Iruva wa Israeli sharera.
Nkonu wa Mwaandu Wansha
17Mmbo mwaarisa Nndumi Iruva na marero any. Mukawuya yaamba. A mmbo lwamwaarisa inda? Kimmba mukusarye itana uravi nkitiri mwaandu kwa Nndumi Iruva-fo, vai mmbo afuraa, ao mukaamba, Iruva yeto atiri uvingo nkwi akai?
Currently Selected:
MALAKI 2: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.