Marko 9
9
Yesu aalashika fwana
(Mat 17:1-13; Luk 9:28-36)
1Nawe kavavia, “Nkya dede shamuvia, vandu vasalali yaa indi kwiifo valasheshosha ufu kulaore vallollya umangyi lwa Iruva lushe na finya.” 2Nalyo mikonu ikaira-u irindaru Yesu kaipoo Petro na Yakobo na Yohane. Kavasaamisa ifumbuny yaasha vakee kyaanya kyawo wo veni. Nalyo kaalashika fwana yakwe valollye. 3Na soori takwe tikamika tikava shaa pyai. Na kunu urukeny nta kulaifo mwiisangya soori ashiidimaa itiilisa indo-fo. 4Nalyo Elia kasha na Mose ishekoora nawe. Vakarera nawe. 5Naasa Petro karouwa kavia Yesu, “Llosha, ni kisha elyi yese lukee ya neese lukunndye itana matengo araru, lyafo lyimwi, na lya Mose lyimwi na lya Elia.” 6Mashika nalaishi kindo arera kyeerouwa, Nyelyi vatirwa mmbweerei. 7Nalyo ifishi lyikasha lyikavavikya nruve. Na unyanga lukarera luuka efo ifishiny lushaambaa, “Yeu mmbwe mwana wakwa nkunde, mwaaranyiny-te!” 8Nalyo yeni elyi velolaa valalollye nndu, kulaore ni Yesu muni-da, eekee nawo. 9Na elyi vee-fo vashoolokaa efo ifumbuny kavavavasa valendeeongoya nndu kilya valollya na kutani elyi Mwana yeto wa Nndu arukaa ooka kwa vafu. 10Naasa kirero ekyo vakakiwarya, vakavesana-vesana wo veni na veni, a iruka elyo na yuuka kwa vafu mmbo lyikee inda ndesa? 11Vakammbesa vakaamba, “A elyi veelosha mavavaso vaambaye mmbo kyikee kideerye Elia nasonngwe isha mbele?” 12Nawe kavavia, “Ee-da ni indo vaambaye Elia asheshaa navauwe findo fyoose fishie sha elyo mbee. Indi kwakooya ni indo, a kyavaany inda elyi kikee kireiye kya Mwana yeto wa nndu nandeliswa ukiva wiingyi na iminwa? 13Kya indi yeny shamuvia, Elia isha alemeesha, nawo vakantannya shaasa vakukunndya, shaasa kyekee kireiye kyakwe.”
Yesu ashiisa mwana atirwa mmumuyo nkasha
(Mat 17:14-21; Luk 9:37-43a)
14Naasa vakafika kulya vakiloshyony vakwe vakai. Vakalolya vandu mamwiingyi nniini varingitye riti ma vaarya, va fitabu vellyaa nawo ulai. 15Nalyo yeni elyi mamwiingyi ulya wa vandu moose wallollya Yesu, nawo vakamatuka deny. Vakandenrishya, vakamwiidikira. 16Nawe Yesu kavavesa, “A kindo mwiifo mwiilyaa nawo ulai nkyokyi?” 17Nalyo nndu wa efo mamwiinginy ulya kamwaallwa, “Llosha mmbo shemeende mwana wakwa na kunu kwafo atirwa m mumuyo mbimbi. 18Nato wo kyeeri wammeentafukya ukamwaaruva. Nawe kava mweende mavia na irafunnya mayoo. Kaenda anaa-naa. Na yeny shavia vakiloshyony yewo vafo vawaante, valaidimi.” 19Nawe kaallwa kavavia, “Eele mukee irika liturye kikusiryo! A shikee neeni shifike indii? A shimusisirye mfike kwi? Kyemweendeny na yaa shikai!” 20Vakamweende na alya akai. Naasa mumuyo ulya elyi walyollya ukansisika. Kawa yoo si kakwaalala-alala-u arosaa mavia. 21Nawe kavesa ndeye, “A mfyeeri fifye inda uka kindo ekyo kimmusheya?” Nawe kaamba, “Uka elyo akee n-du. 22Nato keengyi ukava umweeraa efo murony na mureny kufii umbwaa. Indi kwakooya yewe kushiidimaa kindo, lweekye kwiilusaryaa ukiva!” 23Naasa Yesu kammbia, “Elyi kwaamba, ‘Kwakooya kushiidima!’ Findo fyoose mmbo fishiidimikaa-da efo kwa yeto akusirye-u!” 24Nalyo yeni ndeye wa mwana ulya kaonisa unyanga, kaamba, “Shikusirye-u-da. Na yoo shalemmywa ikusirya-u kuveshitarama, mbee!” 25Naasa Yesu kalollya vandu nkuka veefo vasheengeraa irishya-u, nawe kakeemmya mumuyo ulya wa utefusu kauvia, “Yewe mumuyo wa mbimbi kwaveva na mfu maarwi, yeny mmbo shakuvavasaany uka nndu yeu, nta kulakimwaange-se!” 26Nato ukansisika kyuumu, ukammbuka. Nawe kava sheelyi amfwa. Valya vaiyo vakaamba, “Ankumba muu.” 27Naasa Yesu kantira woko, kamwiinwa. Nalyo kasalala. 28Kyasia, na elyi amaanga na efo mmba, valya vakiloshyony vakammbesa kyama, “A kimaruma yese lulaidimi yuuta nkikyi?” 29Nawe kavavia, “Ngata yeyo nkwiifo kindo uvaa yaanta nakyo kulaore ni kiterewo-fo.”
Yesu arera lyingyi kya ufu lwakwe
(Mat 17:22-23; Luk 9:43b-45)
30Nalyo vakakwiipoo-fo, vakeenda, vakarumbwa na kulya Galilaya. Nawe nalakunde nndu nammanyi. 31Neelyi eefo alosha vakiloshyony vakwe, kavavia, “Mwana yeto wa nndu eefo arambikywaa efo maakony a vandu, na immbwaa vammbwae. Nawe kammewaawa namae mikonu iraru, naruke-ny.” 32Nawo valaitumuso elyi aamba indo, vakairyaa immbesa.
Mmbi nniini?
(Mat 18:1-5; Luk 9:46-48)
33Naasa vakafika kulya Kapernaumu na elyi ammaanga efo mmba kavavesa, “A kindo mweefo mweereraa muveni na muveni efo shia nkyokyi?” 34Vakamalallya mashika kindo valerera wo veni na veni vakee efo shia ni yeto akee nniini wa wooroye ni vi? 35Nalyo kakaa rembo kavaanga valya ikumi na vavii na yoo akai, kavavia, “Kwakooya nndu akunda iva wa mbee, we kuti naaluke nave wa numa ya woose na mwiifurukannya woose.” 36Nalyo keende kimwana kakyiseleesa yoo nnang'ani yaawo kakyikushya maakony kavavia, 37“Wo nndu ammbwarya fivana efi kimwi kyawo kyikee kya ishikummbwa yeny, mmbo ashiwarya yeny. Na nndu ashiwarya yeny, nshi yeny ashiwarya-fo, mmbo awarya yeu aleshiruma.”
Nndu nalandelulema mmbo akee kyaalu kyeru
(Luk 9:49-50)
38Naasa Yohane kaamba, “Llosha lulelollya nndu asendaa irina lyafo ashaantaa nalyo mimuyo mikasha, nawe nta nalakee nndu alulatye. Neese lukamwiima kimmba nalakee nndu alulatye.” 39Naasa Yesu kaamba, “Nta mulamwiimi-fo, mashika nkwiifoo nndu asendaa irina lyakwa katana nalyo kindo kya wiidimi, nalyo yeni kamanya ishirera ukasha-fo. 40Nndu nalalusuuye mmbo ava wa kyaalu kyeru. 41Mashika wo nndu amurita mura na upata kyikee kya ishikummbwa yeny elyi mukee vandu va Kristo, ndede shamuvia, isina lyakwe llyikaa lyireke-se-fo, na lyikafika kwi!”
Kya misindara
(Mat 18:6-9; Luk 17:1-2)
42Na yewo vafwafwa vakusirye neeny naakwa ni yeto umwi-da, wo nndu ammbiiya nsindara weentuula si, kya nndu yeto mmbo kyava kisha kilanya nafinngywa isewe lyirungutwaa ni nshungu efo singony yakwe, nandeolotwa efo yeeveny. 43Na kwakooya woko lwafo lushekweenngyee nsindara, lurummbwe! Mmbo kikee kisha kilanya kukooye ikwiirya neefo muuny kukee kisaya, ngeta elyi kwatira maako ai avii kweenda ifika efo Gehena, efo murony ularumikaa. [ 44Nafo sava ya vayo ilashefwaa na muro wa vayo ulasherumikaa.] 45Na kwakooya urende lwafo lushekweenngyee nsindara, lurummbwe! Mmbo kyikee kisha kilanya kukooye ikwiirya na efo muuny kukee kitongororo, ngeta elyi kwatira marende yoo ai avii kweenda yeerwa efo gehena. [ 46Nafo sava ya vayo ilashefwaa na muro yeto wa vayo ulasherumikaa.] 47Na kwakooya iriso lyafo lyishekweenngyee nsindara, lyiillwe! Mmbo kyikee kisha kilanya kukooye ikwiirya na efo umanginy lwa Iruva, kukee wa iriso lyimwi, ngeta elyi kwatira miso yoo ai avii kweenda yeerwa yefo Gehena. 48Nafo sava ya wayo ilashefwaa na muro yeto wa vayo ulasherumikaa. 49Mashika wo nndu kindo asheroliswaa nakyo ni muro. 50Mmbala ni kindo kisha, kwakooya wanreta nrolo wa vayo, a nkyokyi musheurolisaa nakyo? Kevekeeny mutiri mmbala efo nnang'ani yaany, muvekaa na ufoo mu veni na veni.
Currently Selected:
Marko 9: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.