Marko 7
7
Ufundo lwa vakuu
(Mat 15:1-9)
1Nalyo Vafarisayo vakashekuumbya yoo akai vasangyi na veelosha mavavaso valya maata vauka kulya Yerusalemu. 2Vakalolya vakiloshyony vakwe maata velyaa shoonga na maako arindye, maako nalakee masangye. 3Mashika Vafarisayo naakwa na Vayuda woose mmbeelyaa shoonga, kulaore vasangya maako keengyi-fo. Vakava veeringa indo ngyufundo tilya valereeywa ni vakuu vawo. 4Na elyi vashuukaa singireny kulaore vapooka ikusangya mmbeelyaa shoonga-fo. Kukavekaa-fo na findo fingyi-se fiingyi valereeywa fyeeringa, sha mirumwa yeefwallya ngyupata mura na ndima na nungu. 5Naasa, Vafarisayo valya vasangyi na vaarya valya va fitabu vakasha immbesa, “A nkikyi elyi vakiloshyony vafo valaendaa kisumani na ngyufundo ta vakuu veru? Na ilya vakaveelya shoonga na maako arindye?” 6Nawe kavavia, “Yesaya mmbo alemuronga yeni vakunang'ari ashaauyaa kisuku kyeamba,
‘Vandu yeva ni kana kawo vashiindyaa nako,
indi ngoo tawo tikakaa kwaasha na yeny.
7Mmbo vashireremmya kikee kyaruu parany,
kimmba mavavaso yoo a kivandu,
mmbo ava mbony tawo teelosha.’ ”
8“Yeni mmbo mureeye ivavaso lya Iruva mukawuya ikushya ngyufundo yeto ta kivandu.” 9Kawuya kavavia, “Ni indo kyikai: Ivavaso lya Iruva llyo mwalyifullwa naambo mwiidimi iringa ngyufundo yeto tany. 10Mashika Mose mmbo avavasye kyeamba, ‘Indya ndoo na mau. Na yeto aruma ndeye na maye ifwa nafwe.’ 11Neeni mukawuya yaamba, ‘Nndu kavia ndeye ao maye ni Korbani,’ kikee sheelyi kyaambawa, ‘Efyo mweewaryaa kwakwa fyeemulela akakafyo shammeefivika waavi lwa mmba ya Iruva. 12Mmukillekeyaa-se katannya ndeye ao maye kindo-fo.’ 13Kikavaany mmbo mwamina kirero kya Iruva kimaruma kya ngyufundo yeto tany mulereeywa mukatifitya vandu. Na findo fifwanani na fya ngata yeyo mukatana fiingyi.”
Kindo kitefusaa nndu
(Mat 15:10-20)
14Nalyo kavaanga-se lyingyi mamwiingyi ulya wa vandu vashekuummbya yoo akai. Kavavia, “Shaaranyiny moose mwiitumuso! 15Nkwiifo kindo kyikee kipoo ya nndu kyikamwiira na efo nnang'ani kishiidimaa imwaalwa ntefusu-fo. Kya indi yekyo kishuuka efo nnang'ani yakwe nkyo kishaallwaa nndu kava ntefusu. [ 16Naasa yeto atiri maarwi earannya navearannya!]”
17Naasa elyi vamaanga na efo mmba anrau mamwiingyi ulya, valya vakiloshyony vakwe vakashembesa kya kyaaso kilya. 18Nalyo kavavia, “Na yeni da mmbo mukee vandu valamanyaa kindo? A mmbo mulaishi wo kindo kya kipoo kyoose kishangaa nnduny, nshikyo kishiidimaa imwaallwa ntefusu-fo. 19Mashika kundo kishangaa nafo nshi efo ngoony-fo, ni efo ndewuny. Kikawuya yuuka-fo kikaenda irininy.” Nawe elyi arera indo, kikava nkyo aallwa nakyo shoonga toose tikava shivaramu.
20Naasa kaamba, “Ekyo kishuukaa efo nnduny, nkyo kindo kyamwaallwa kava ntefusu. 21Kimmba efo ngoony ta vandu mfo kundo kuukye makusaro yoo meesi, na fya urui, na fya wiivi, na fya uwai, 22na fya utuusi, na fya unying'u, na fya ngoo-shuu, na ntambo, na ngata ya ngula, na iriso yeesi, na kyaararo na ngata ya kinyala, na ngata ya nria. 23Naasa findo efyo fyeesi fyoose, mmbo fyuukye efo kimmba, nafyo mfyo fyaallwa nndu kava ntefusu.”
Nka atiri kikusiryo kiniini
(Mat 15:21-28)
24Naasa kakwiipoo-fo kandefika kulya myuungony ya Tiro na Sidoni. Kaira na efo mmba ya nndu nalakunndye kimanyike. Nawe nalaidimi ikusuruma. 25Indi nndu nka eefo akooya atiri mwana wa kyeny atirwa mmumuyo wa utefusu. Kaita mbony tilya takwe. Nalyo yeni kaanga nafo kamoolokya si yoo marendeny akwe. 26Nawe akee nka aishi irera Kigriki aukye Foinike ya kulya Siria. Nawe kamooshora-dwa naante mumuyo ulya nkasha uuke mwana ulya wakwe wa kyeny. 27Nawe kammbia, “Ra fivana fiwuure mbele! Nshi kisha iipoo shoonga ya fivana na indeerya fite-fo!” 28Nawe karouwa kammbia, “Ee-da Nndumi! Naakwa ni fite mmbo fishekulyiiyaa misaaro yeyo ya vana.” 29Nalyo kammbia, “Kimmba kwamaamba indo, kweengyeeny! Mwana yeto wafo ammbukwa ni mumuyo yeto nkasha.” 30Nalyo kakwiipoo, keenda kyeny kwakwe. Kakooya kimwana kilya kyakwe kilele rony efo kitareny na mumuyo ulya nkasha wammeemmbuka.
Yesu ashiisa mbimbi na mfu maarwi
31Nalyo kawara shia kooka kulya taari ya kulya Tiro, karummbwa na shia ya kulya Sidoni. Katana afika kulya kwiiduvani na yeeve ilya ya Genesareti kulya muungony wa miri ikumi. 32Naasa, vandu vakamweenngye nndu akee mfu maarwi na ulumi lwakwe lukava utambasi. Vakashemooshora namweekerye maako. 33Nawe kallakanisa efo vanduny vakuummbye-u nkuka, kandenrwaa kyaanya. Kaita nni efo maarwiny akwe, kawuya kafisha maare, kapaana ulumi lulya lwakwe. 34Kainuya miso efo uwe iruveeu. Kadia kaamba, “Efata!” Nakyo kikee sheelyi kyaambawa, “Tarambuka!” 35Nalyo yeni maarwi alya akwe akawuya itarambuka na kitambisa kya ulumi lwakwe kikatambashuka, kawuya irera nisha. 36Nawe kavavavasa valandeekivia nta nndu. Indi we asheengeraa ivavavasa nawo vakeengera ivambisa. 37Vandu vakaising'ang'a nnu. Vakaamba, “Ate efyo atannyi fyaveshia fyoose! Valya vafiiye maarwi kaveekya vakaita, na valya vakee mbimbi kaveekya vakarera.”
Currently Selected:
Marko 7: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.