Marko 12
12
Kyaaso kya nremi na irema lya misabibu
(Mat 21:33-46; Luk 20:9-19)
1Nalyo kapooka irera nawo eveeraa fyaaso, kaamba, “Kweefo nndu aleronga nnda wakwe wa misabibu. Kauringitya na uvare. Kasuma-fo ando eekammya sabibu. Katannya-fo na nganga yeeringa. Kawaarya varemi, numa kaipoo kyaaro. 2Naasa elyi kyeeri kyamfika karuma kishinga kulya kwa varemi valya nandewarya waavi lwa ndunda ta nnda ulya. 3Nawo vakantira, vakankapa nnu. Vakansama wa ruu parany. 4Nalyo kawuya karuma-se ishinga lyingyi kulya kwawo. Nawe-da vakavenkapa mariinga a nrwe, vakamwiinyala. 5Kawuya kaveruma-se ungyi. Nawe vakammbwaa. Na vengyi-se veengyi, maata vakavakapa na maata vakavawaa. 6Naasa kakooya atiri-se umwi, mmbwe mwana wakwe nkunde. Mmbwe alefurummya inruma kakusara, ‘Ammba mwana wakwa mmbo vashenreremyaa.’ 7Naasa varemi valya vakaviana, ‘Akakato muya ding'u! Ndifony lundemmbwaa, na ding'u yeyo ive yeeru luveni.’ 8Vakantira vakammbwaa. Vakandemweera efo poo ya nnda ulya.” 9A muni nnda yeto mmbo ashetanaa inda ndesa? Mmbo ashekwiipoo nanderumata varemi valya. Na nnda ulya naare-fo vengyi. 10A mmbo mulandesomi kilya kyikee kireiye kyeamba, “Iwe yelyo vetana mmba valelyiinyika, llyo elyo lyilewuya iva iwe lya ndumbeny. 11Mmbo kileva indo kyuuka efo kwa Nndumi. Kikava kindo kyeesongololo lulollye na miso eru.” 12Nalyo vakasia mwaanya weentira, vakawuya iiryaa mamwiingyi ulya wa vandu. Mashika elyi vaishi kyaaso kilya aamba nkyeevaronga wo. Vakanra-u vakeenda.
Kya itaa kodi
(Mat 22:15-22; Luk 20:20-26)
13Nalyo vakanrummya Vafarisayo vaangu variani na ngyama ta Herode vashenreiya na marero. 14Vakasha nang'u vakammbia, “Ale llosha lwiishi mmbo kukee nndu wa dede kulasarye nta nndu. Nyelyi kulakee nndu mwilola fisangu fya vandu. Mmbo kuloshye shia ya Iruva kya songosiny. A ndesa kwiifo mumu weevikya Kaisari ukamba ao oode? A lukanninga aa lukara?” 15Nawe kamanya ukunang'ari lwawo kavavia, “A ekyo mwasha isheesya nkyokyi? Sheengye dinari shiilole.” 16Nawo vakamweenngye. Nalyo kavavia, “A ufwanu yelu lwiiyoo ni lwa vi na kireiyo ekyo?” Nawo vakammbia, “Llwa Kaisari-te!” 17Naasa Yesu kavavia, “Kyasia, efyo fikwaani na Kaisari finiingeny Kaisari. Na efyo fikwaani na Iruva muvefiniinga Iruva.” Nalyo vakauma ng'any.
Mbony ta iruka lya vafu
(Mat 22:23-33; Luk 20:27-40)
18Naasa kasheywa ni Vasadukayo, mmbo vandu veshaambaa, nkwiifo iruka lya vafu-fo. Vakammbesa vakaamba, 19“Ale Llosha! Mose mmbo areiye kyeeluvia, ‘Kwakooya mwanamaye wa nndu afwa karau nka nalare-u mwana, naasa mwanamaye kuti naalyike nka ulya wakwe, naambo nalunngye-u mwanamaye ufyari.’ 20Naasa, kweefo vasero mfungare vekee vana va nka. Ulya wa mbee karwaa nka. Kafwa nalare-u mwana. 21Nalyo ulya wa kavii kanrwaa. Kavefwa nalare-u mwana. Na ulya wa kararu ni kiwo-da. 22Nalyo woose mfungare nkuiyo alera-u mwana-fo. Lyeefurummya nka ulya nawe kavefwa numa ya woose. 23A elyi kwamfika yoo marukyony elyi vandu vafu vasherukaa, nka yeto ashevaany wa ungau wa yewo woose? Mashika woose mfungare vemunrwaa.” 24Naasa Yesu kavavia, “A kindo kyamuniinga mukarekwa shia nshi elyi mulamanyaa efyo fikee fireiye nta finya ya Iruva? 25Mashika elyi vandu vafu varukaa mmbashealyikaa-se-fo, nta yaalyikwa-fo. Mmbo vashevaa sha vasu va efo iruveeu. 26Indi ekyo kya vafu shaasa vakaa varuke, a mmbo mulandesomi mbony tikee efo kitabuny kya Mose ta ngorosho ilya, ndesa Iruva alemmbia kaamba, Yeny ni Iruva wa Abrahamu, na Iruva wa Isaki, na Iruva wa Yakobo. 27Naasa Iruva nshi akee wa vafu-fo, mmbo akee wa vakee na muu. Mmbo mwarekywa mukaangya mbai deny.”
Ivavaso iniini
(Mat 22:34-40; Luk 10:25-28)
28Nalyo kukasha nau nndu wa efo kwa veelosha mavavaso, kaita verouwana indo. Kalollya eevarouwaa shaasa avaronga nisha, kammbesa, “A ivavaso elyo lyisongoye engyi moose llyingalyi?” 29Yesu kaallwa, “Elyo lya mbee lyikee ule, ‘Yewe Israeli arannya-dwa! Nndumi weeru Iruva ni Nndumi umwi. 30Neewe kunda Nndumi wafo Iruva kunkunde na ngoo imwi nsi, na nrima umwi nsi, na nrwe umwi nsi, na finya imwi nsi.’ 31Na lya kavii lyikee ule, ‘Kunda nndu uroo shaasa kukukunndye ku muni.’ Nta nkwiiyo ivavaso lyikee iniini ya yoo-fo.” 32Nalyo mwaarya ulya wa fitabu kammbia, “Mmbo kwarera nisha, kwaamba dede. We mmbwe yeto umwi nsi aiyo nta nkwiiyo ungyi kulaore mmbwe-fo. 33Na kya inkunda na ngoo imwi nsi na urango lumwi nsi, na finya imwi nsi, na kya ikunda uroye weeru shaasa nndu akukundye we muni, ekyo kyava kiniini-da, kikairya firaso fyoose fyeevivya murony.” 34Nalyo Yesu alollya amwaallwa nisha indo kammbia, “Yewe nkukee kwaasha na umangyi lwa Iruva-fo.” Nalyo kulakee-fo nndu akara immbesa-se kindo.
Mbony ta Mesiya
(Mat 22:41-46; Luk 20:41-44)
35Nalyo Yesu karouwa aloshaa efo mmba ya Iruva kaamba, “A kyava inda elyi veelosha mavavaso vaambaye Kristo ni Mwana wa Davidi? 36Davidi we muni mmbo alekaywa Mmumuyo Mweele karera kaamba,
We Nndumi alevia Nndumi wakwa,
‘Kaa rembo yoo woko lwakwa usha,
shitani shaara vakiduva vafo si,
vave kitima kyafo kyeekerya marende afo.’
37Kikavaany Davidi we muni mmbo ambaanngye ni Nndumi. A naidimi-se inda iva mwana wakwe?” Nalyo vandu valya vakuummbye-u nkuka vefurye nnu imwaarannya. 38Na elyi eefo aloshaa kaveamba, Kwiiseny na vaarya va fitabu, yewo vakunndye irua-rua varee soori shaasha na iidikirwa mmbandu ando a singira, 39na ikaa rembo fitiminy fya mbee efo mmba teeterevya, na ikaa marembo asongoye elyi vakee kilyiiyony kya shoonga. 40Nawo vakava vandu veemira mmba ta vaka va ding'u, na itereva Iruva fiterewo fyaasha kyikee kya ikoora efo vanduny tupu. Mmbo vashewonisaa uvingo uniini kilanya.
Kiraso kya nka wa ding'u
(Luk 21:1-4)
41Nalyo kandekaa rembo alya asumani na isanduku lyeesanyirya fesa ta mmba ya Iruva. Kalola vandu vakuummbye-fo shaasa vavika fesa tawo efo isandukuny. Masimba akasha meengyi, akavika findo fiingi. 42Naasa nka wa ding'u nkiva kasha nau. Kavika fiparwe fivii, nafyo fiinani na senti imwi. 43Nawe kavaanga valya vakiloshyony vakwe na yoo akai kavavia, Nkya dede shamuvia, “Nka yeto wa ding'u avekee indo nkiva mmbo avika kiniini kairya yewo vavika kindo efo isandukuny woose. 44Mashika woose mmbo vavika-fo vautye efo findony fyawo vatiri fya mmwasi, indi we kavika-fo auta efo findony fyakwe fyeerorwa kalekeya fyoose atiri, mfyo fyoose akee nafyo fyeelela muu wakwe.”
Currently Selected:
Marko 12: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.