Matayo 22
22
Kyaaso kya walyi
(Luk 14:15-24)
1Nalyo Yesu karera lyingyi esheraa fyaaso kavavia, 2“Umangyi lwa Iruva mmbo lufwanani na nndu alealyikya mwana wakwe nka. 3Naasa kanderuma mashinga akwe andevaanga valya vakee vaarye nrumi vakavaangyo walyi lulya. Nawo valakunde isha. 4Kawuya karuma mashinga engyi, kavavia, ‘Endevieny valya vakee vaarye nrumi, shoonga takwa akati shantideesya. Shau takwa tanshishwa na nrasa takwa. Na findo fyoose fyandeesyo. Kusheyeny na walyiny.’ 5Vakamina vakakweengya kyawo, ulya umwi efo ireminy lyakwe, na ulya ungyi efo mbusheny yakwe. 6Na valya vengyi vasaa-u, vakatira mashinga alya akwe, vakavaila, vakavawaa. 7Nalyo mangyi ilya karooywa nngoo, karika vasikari vakwe, vakamamita vawai valya neekora muri ulya wawo. 8Nalyo kavia mashinga alya akwe, ‘Kya walyi lwemmba, lyo valya vekee vaarye nrumi mbalekisumanya-u-fo. 9Naasa kwiipoony mundefika efo shieny eto niini, na wo vandu mwambakooya-fo muvavaange vashe walyiny!’ 10Nalyo mashinga alya akakwiipoo, vakafika efo shieny eto. Na wo vandu valevakooya, vakavasanda woose, na ulya nkasha, na ulya nsha. Na efo walyiny kukaishwa vandu veny.” 11“Naasa mangyi kasha nau ishesengera veny valya. Kakooya-fo umwi nalaree soori ya walyiny. 12Kammbia, ‘Mbuya-akwa, a niinda kwasha na kunu, kularee nta soori ya walyiny?’ Nawe kafulukywa deny. 13Nalyo mangyi kavia valya vefurukannya-u, ‘Mfingeny marende na maako, mundemweera efo ireeminy lyiwoye efo poo. Mfo kundo kushekaa kiiyo na irafunya mayoo.’ ” 14Kimmba veevaangwa mmbeengyi na valya vasauwe vakaangwa.
Itaa kodi kwa Kaisari
(Mar 12:13-17; Luk 20:20-26)
15Nalyo Vafarisayo vakanderuvya shila, vandereiya Yesu na marero. 16Vakanrummya vakiloshyony kyawo varyani na vandu vatiri mbuya na Herode, vakaamba, “Ale llori! Lwiishi mmbo kukee nndu mwiirera fya dede na shia ya Iruva kwaveifunda kya dede, kulalolaa nta fisangu fya vandu. 17Naasany luvie mmbo kukusarye inda? A ndesa yuutya Kaisari usanu ni kindo kisumani ao ode?” 18Na Yesu kamanya uravi lwawo, kaamba, “A kimaruma mukasha isheesa nkyokyi yeni vandu vakunang'ari? 19Keshooreny fesa ya usanu-te!” Vakamweenngye. 20Nawe kavavesa, “A ufwanu elo lwiiyo llwa vi na kireiyo ekyo?” 21Vakarouwa, “Ni fya Kaisari.” Nawe kavavia, “Naasa, niingyeny Kaisari efyo fikwaani na Kaisari. Na efyo fikwaani na Iruva muvefiniinga Iruva.” 22Naasa vekiita indo, vakasongololo, vakanra-u vakakweengya kyawo.
Kya iruka lya vafu
(Mar 12:18-27; Luk 20:27-40)
23Naasa nkonu ulya mweni, kasheywa Mmasadukayo, mmbo vandu veshaambaa nkwiifo iruka lya vafu-fo. Vakammbesa, 24“Ale llori, Mose mmbo aambaye, ‘Nndu kafwa nalareeye-u mwana, naasa nka yeto wakwe, noorwa-se mmwanamaye nave nka wakwe, nawonisye mwanamaye ngyeeri. 25Naasa kunu kweru kweefo vanavanka mfungare. Ulya wa mbee kaalyika kafwa, nalareeye-u mwana. Kareeya mwanamaye nka ulya wakwe. 26Na ulya wa kavii kiwo, na ulya wa kararu kiwo-da, tana vasia woose mfungare. 27Na elyi lya numa ya woose nka ulya nawe kafwa. 28A elyi kwamfika yoo marukyony a vafu, nka yeto ashevaany wa ungau ndesa? Kimmba vemmoora woose?’ ” 29Naasa Yesu kaallwa kavavia, “Mmbo mwarekwa deny, mashika elyi mulaishi nta mareiyo nta finya ya Iruva. 30Mashika elyi kwamfika yoo marukyony a vafu, mmbakyaalyika-se-fo nta yaalyikwa-fo. Mmbo vashevaa sha vasu va iruveeu. 31Na kya iruka lya vafu a mmbo mulandesomi ekyo Iruva amuviiye kaamba, 32‘Yeny ni Iruva, wa Abrahamu na Iruva wa Isaki na Iruva wa Yakobo. Naasany, Iruva nshi akee wa vafu-fo, mmbo akee wa vamuu.’ ” 33Kyasia vandu valya vakuummbye-u elyi vamiita indo vakaising'ang'a kya kiloshyo kyakwe.
Ivavaso iniini
(Mar 12:28-34; Luk 10:24-28)
34Naasa elyi Vafarisayo vamiita amfindikira kana ka Vasadukayo, nawo vakandekuummbya ando amwi. 35Na umwi waawo akufundye mavavaso kasha immbesa amweesaa, 36kaamba, “Ale llori! A efo mavavasony ivavaso lyiifo lyikee iniini lyikailanya engyi llyingalyi?” 37Nawe kammbia, “Mmbo kushekundaa Nndumi Iruva wafo kunkunde na ngoo imwi nsi, na nrima umwi nsi, na makusaro amwi nsi. 38Llyo ivavaso iniini lyisongoye engyi. 39Lya kavii lyiifo lyifwanani nalyo, ‘Mmbo kushekundaa nndu uroo shaasa kukukunndye kumuni.’ 40Na mavavaso yoo avii nng'u arie mavavaso engyi moose na vakisuku.”
Kya Mwana wa Davidi
(Mar 12:35-37; Luk 20:41-44)
41Naasa elyi Vafarisayo vakuummbye-fo indo, Yesu kavavesa, 42Kaamba, “A ni inda mukusarye kya Kristo? Akee mwana wa vi?” Vakaamba, “Ni wa Davidi-te!” 43Nawe kavavia, “A kikavaany inda elyi Davidi ammbaanga ni Nndumi?” Mmbo aambaye afundwa ni Mumuyo wa Iruva kaamba,
44“Nndumi alevia Nndumi wakwa,
‘Kaa rembo yoo woko lwakwa usha,
shitani shaara vakiduva vafo si,
kuvaekerye marende afo.’ ”
45“Naasa elyi Davidi ammbaanngye ni Nndumi, ni inda ava mwana wakwe?” 46Nalyo kulawonike-fo nndu aidima imwaallwa, nta nndu nalakarye immbesa kindo uka nkonu ulya.
Currently Selected:
Matayo 22: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.